Bazuzi 1:1-36
1 Na nima ya lufwa ya Yozue,+ bantu ya Izraele* yulaka Yehowa+ nde: “Nani na kati na beto ta tombuka ntete sambu na kunwanisa bantu ya Kanana?”
2 Yehowa vutulaka nde: “Yuda ta tombuka.+ Tala! Mono ke pesa* insi yina na diboko na yandi.”
3 Ebuna Yuda tubilaka mpangi na yandi Simeoni nde: “Kwisa kutombuka ti mono na teritware ya bo me pesa mono*+ sambu na kunwanisa bantu ya Kanana. Na nima mono ta kwenda ti nge na teritware ya bo me pesa nge.” Ebuna Simeoni kwendaka ti yandi.
4 Ntangu Yuda tombukaka, Yehowa pesaka bantu ya Kanana ti bantu ya Perizi na maboko na bo,+ ebuna bo bedisaka bantuc 10 000 na Bezeki.
5 Bo monaka Adoni-bezeki na Bezeki, mpi kuna bo nwanisaka yandi mpi bedisaka bantu ya Kanana+ ti bantu ya Perizi.+
6 Ntangu Adoni-bezeki tinaka, bo landaka yandi, bo kangaka yandi, mpi bo zengaka misapi na yandi ya nene ya maboko ti misapi na yandi ya nene ya makulu.
7 Ebuna Adoni-bezeki tubaka nde: “Kele ti bantotila 70 yina bo zengaka misapi ya nene ya maboko ti misapi ya nene ya makulu mpi yina ke lokuta madia na nsi ya mesa na mono. Kaka mutindu mono salaka, Nzambi me vutudila mono.” Na nima, bo nataka yandi na Yeruzalemi+ mpi yandi fwaka kuna.
8 Diaka, bantu ya Yuda nwanisaka Yeruzalemi+ mpi botulaka yo; bo fwaka yo na mbele ya bitumba, mpi tulaka mbanza yina tiya.
9 Na nima, bantu ya Yuda kulumukaka sambu na kunwanisa bantu ya Kanana yina vandaka kuzinga na ntoto ya bangumba, na Negebi mpi na Shefela.+
10 Mpidina Yuda kwendaka kunwanisa bantu ya Kanana yina vandaka kuzinga na Ebroni (ntete zina ya Ebroni vandaka Kiriati-arba), ebuna bo fwaka Sheshai, Ahimani, mpi Talmai.+
11 Bo katukaka kuna mpi kwendaka kunwanisa bantu ya Debire.+ (Ntete zina ya Debire vandaka Kiriati-sefere.)+
12 Ebuna Kalebi+ tubaka nde: “Muntu yina ta nwanisa Kiriati-sefere mpi ta botula yo, mono ta pesa yandi mwana na mono ya nkento Aksa sambu yandi kuma nkento na yandi.”+
13 Otniele+ mwana ya Kenazi,+ leke ya Kalebi, botulaka yo. Yo yina Kalebi pesaka yandi mwana na yandi ya nkento Aksa sambu yandi kuma nkento na yandi.
14 Ntangu Aksa vandaka kukwenda na nzo ya bakala na yandi, Aksa siamisaka Otniele na kulomba tata na yandi kilanga. Ebuna Aksa tulukaka na mpunda na yandi.* Kalebi yulaka yandi nde: “Nge ke zola inki?”
15 Aksa tubilaka yandi nde: “Pardo, sakumuna mono, sambu nge me pesa mono kitini ya ntoto na sudi;* pesa mono mpi Guloti-mayimi.”* Yo yina Kalebi pesaka yandi Guloti ya Zulu mpi Guloti ya Nsi.
16 Bana ya muntu ya Keni,+ bokilo ya Moize ya bakala,+ katukaka na mbanza ya maba+ ti bantu ya Yuda mpi tombukaka na ntoto-makanga ya Yuda na sudi ya Aradi.+ Bo kwendaka kuna mpi zingaka na kati ya bantu.+
17 Kansi Yuda kwendaka ti mpangi na yandi Simeoni, mpi bo nwanisaka bantu ya Kanana yina vandaka kuzinga na Sefati mpi bo fwaka yo.+ Ebuna bo pesaka mbanza yina zina Orma.*+
18 Na nima, Yuda botulaka Gaza+ ti teritware na yo, Ashkeloni+ ti teritware na yo, mpi Ekroni+ ti teritware na yo.
19 Yehowa vandaka ti Yuda, ebuna bo bakaka ntoto ya bangumba, kansi bo kukaka ve kukula bantu ya ntoto ya kukonda ngumba, sambu bo vandaka ti bapusu-pusu ya bitumba ya bibende.*+
20 Bo pesaka Kalebi Ebroni, kaka mutindu Moize silaka,+ ebuna yandi kulaka bana tatu ya Anaki kuna.+
21 Kansi bana ya Benyamini kulaka ve bantu ya Yebusi yina vandaka kuzinga na Yeruzalemi, yo yina bantu ya Yebusi ke landaka kuzinga ti bana ya Benyamini na Yeruzalemi tii bubu yai.+
22 Na ntangu yina, nzo ya Yozefi+ tombukaka sambu na kunwanisa Betele, ebuna Yehowa vandaka ti bo.+
23 Nzo ya Yozefi vandaka kutala Betele na mayele (nkutu, zina ya mbanza yina vandaka ntete Luzi),+
24 mpi bantu yina vandaka kutala na mayele monaka bakala mosi ke basika na mbanza yina. Yo yina bo tubilaka yandi nde: “Pardo, songa beto nzila ya kukota na mbanza, ebuna beto ta sadila nge mambu na mawete yonso.”*
25 Yo yina bakala yina songaka bo nzila ya kukota na mbanza, ebuna bo fwaka mbanza yina ti mbele ya bitumba, kansi bo bikisaka bakala yina ti dibuta na yandi yonso bo kwenda.+
26 Bakala yina kwendaka na insi ya bantu ya Heti mpi tungaka mbanza mosi ebuna yandi pesaka yo zina Luzi, zina na yo yo yina tii bubu yai.
27 Manase bakaka ve Bete-sheani ti babwala yina kele na nziunga* na yo, Tanaki+ ti babwala yina kele na nziunga na yo, bantu ya Dore ti babwala yina kele na nziunga na yo, bantu ya Ibleami ti babwala yina kele na nziunga na yo, mpi bantu ya Megido ti babwala yina kele na nziunga na yo.+ Bantu ya Kanana landaka kuzinga na insi yai.
28 Ntangu Izraele kumaka ngolo, bo pusaka bantu ya Kanana na kusala kisalu ya ngolo,+ kansi bo kulaka bo yonso ve.+
29 Efrayimi mpi kulaka ve bantu ya Kanana yina vandaka kuzinga na Gezere. Bantu ya Kanana landaka kuzinga na kati na bo na Gezere.+
30 Zebuloni kulaka ve bantu ya ke zingaka na Kitroni ti bantu ya Nahaloli.+ Bantu ya Kanana landaka kuzinga na kati na bo mpi bo pusaka bo na kusala bisalu ya ngolo.+
31 Asere kulaka ve bantu ya Ako ti bantu ya Sidoni,+ na Ahlabi, na Akzibi,+ na Elba, na Afiki,+ mpi na Rehobi.+
32 Yo yina bantu ya Asere landaka kuzinga na kati ya bantu ya Kanana yina ke zingaka na insi yina, sambu bo kulaka bo ve.
33 Naftali kulaka ve bantu ya Bete-shemeshi ti bantu ya Bete-anati,+ kansi bo landaka kuzinga na kati ya bantu ya Kanana yina ke zingaka na insi yina.+ Bantu ya ke zingaka na Bete-shemeshi ti bantu ya Bete-anati kumaka bantu ya ke sadilaka bo kisalu ya ngolo.
34 Bantu ya Amore kulaka bantu ya Dani tii na ntoto ya bangumba, bo pesaka bo ve nzila ya kukwisa kukulumuka na ntoto ya kukonda ngumba.+
35 Yo yina bantu ya Amore landaka kuzinga na Ngumba ya Eresi, na Ayaloni,+ mpi na Shaalbimi.+ Kansi ntangu ngolo* ya bantu ya nzo ya Yozefi kumaka mingi,* bo pusaka bo na kusala kisalu ya ngolo.
36 Teritware ya bantu ya Amore yantikaka na ngumba ya Akrabimi,+ katuka na Sela mpi tombuka.
Banoti na nsi ya lutiti
^ Na kisina, “bana ya Izraele.”
^ To “me pesa.”
^ Na kisina, “na dikabu na mono.”
^ To mbala ya nkaka, “bulaka maboko ntangu yandi vandaka na zulu ya mpunda.”
^ To “Negebi.”
^ Yo ke tendula “Malonga (Babolo) ya Masa.”
^ Yo ke tendula “Ya Bo Fwete Fwa.”
^ To “bapusu-pusu ya bitumba yina kele ti bambele na makulu na yo.”
^ Na kisina, “ta monisila nge zola ya kwikama.”
^ To “lweka.”
^ Na kisina, “diboko.”
^ Na kisina, “kumaka kilo.”
