Bazuzi 10:1-18
10 Na nima ya Abimeleki, Tola mwana ya Pua, mwana ya Dodo, muntu ya Isakare,+ basikaka sambu na kugulusa Izraele. Yandi vandaka kuzinga na Shamire na ntoto ya bangumba ya Efrayimi.
2 Yandi sambisaka Izraele bamvula 23. Na nima yandi fwaka mpi bo zikaka yandi na Shamire.
3 Na nima na yandi, Yaire muntu ya Gileadi basikaka mpi sambisaka Izraele bamvula 22.
4 Yandi vandaka ti bana-babakala 30 yina vandaka kunata bampunda 30, mpi bo vandaka ti bambanza 30, yina bo ke bingaka Avoti-yaire+ tii bubu yai; yo kele na ntoto ya Gileadi.
5 Na nima, Yaire fwaka mpi bo zikaka yandi na Kamoni.
6 Diaka, bantu ya Izraele salaka mambu ya mbi na meso ya Yehowa,+ mpi bo yantikaka kusadila Babaale,+ biteki ya Ashtoreti, banzambi ya Arami,* banzambi ya Sidoni, banzambi ya Moabi,+ banzambi ya bantu ya Amoni,+ mpi banzambi ya bantu ya Filistia.+ Bo yambulaka Yehowa mpi bo sadilaka yandi ve.
7 Ebuna Yehowa wilaka Izraele makasi, mpi yandi tekaka bo na maboko ya bantu ya Filistia mpi ya bantu ya Amoni.+
8 Yo yina bo bedisaka mpi niokulaka bantu ya Izraele ngolo kibeni na mvula yina—bamvula 18 bo niokulaka bantu ya Izraele yonso yina vandaka na simu ya Yordani yina vandaka ntete insi ya bantu ya Amore na Gileadi.
9 Bantu ya Amoni vandaka mpi kusabuka Yordani sambu na kunwanisa Yuda, Benyamini mpi nzo ya Efrayimi; Izraele vandaka na mpasi kibeni.
10 Ebuna bantu ya Izraele bingaka Yehowa sambu na kulomba lusadisu,+ bo tubaka nde: “Beto me sala disumu na meso na nge, sambu beto me yambula Nzambi na beto mpi beto me sadila Babaale.”+
11 Kansi Yehowa tubilaka bantu ya Izraele nde: “Keti mono gulusaka beno ve na Ezipte+ mpi na maboko ya bantu ya Amore,+ ya bantu ya Amoni, ya bantu ya Filistia,+
12 ya bantu ya Sidoni, ya Amaleki, mpi ya Madiani ntangu bo vandaka kuniokula beno? Ntangu beno didilaka mono, mono gulusaka beno na maboko na bo.
13 Kansi beno yambulaka mono mpi beno sadilaka banzambi ya nkaka.+ Yo yina mono ta gulusa beno diaka ve.+
14 Beno kwenda na banzambi yina beno solaka mpi beno binga sambu na kulomba lusadisu.+ Bika nde bo gulusa beno na ntangu na beno ya mpasi.”+
15 Kansi bantu ya Izraele tubilaka Yehowa nde: “Beto me sala disumu. Sala beto konso kima yina kele mbote na meso na nge. Kansi gulusa beto bubu yai, pardo.”
16 Ebuna bo katulaka banzambi ya banzenza na kati na bo mpi bo sadilaka Yehowa,+ na mpila nde yandi lendaka diaka ve kupesa nzila* nde Izraele kumona mpasi.+
17 Na nima, bo bingaka bantu ya Amoni+ na kuvukana kisika mosi mpi bo salaka camp na Gileadi. Ebuna bana ya Izraele vukanaka kisika mosi mpi salaka camp na Mispa.
18 Bantu mpi bamfumu ya Gileadi tubaka bo na bo nde: “Nani ta baka ntwala na kunwana ti bantu ya Amoni?+ Bika yandi kuma mfumu ya bantu yonso ya ke zingaka na Gileadi.”
