Bazuzi 21:1-25
-
Bo me gulusa dikanda ya Benyamini (1-25)
21 Ntangu yai bantu ya Izraele diaka ndefi yai na Mispa:+ “Ata muntu mosi ve na kati na beto ta pesa mwana na yandi ya nkento na muntu ya Benyamini sambu na kuvanda nkento na yandi.”+
2 Yo yina, bantu kwisaka na Betele+ mpi vandaka kuna na ntwala ya Nzambi ya kieleka tii na nkokila, bo vandaka kuboka mpi kudila ngolo kibeni.
3 Bo vandaka kutuba nde: “O Yehowa Nzambi ya Izraele, sambu na nki diambu yai me salama na Izraele? Sambu na nki dikanda mosi fwete konda bubu yai na Izraele?”
4 Na kilumbu yina landaka, bantu telamaka na suka-suka mpi tungaka mesa-kimenga kuna sambu na kupesa makabu ya kuyoka mpi makabu ya kinduku.+
5 Ebuna bantu ya Izraele tubaka nde: “Inki dikanda na kati ya makanda yonso ya Izraele tombukaka ve sambu na kuvukana na ntwala ya Yehowa?” sambu bo diaka ndefi mosi ya nene nde bo ta fwa kibeni konso muntu yina tombukaka ve na Yehowa na Mispa.
6 Yo yina, bantu ya Izraele waka mawa sambu na mambu yina bwilaka mpangi na bo Benyamini. Bo tubaka nde: “Bubu yai bo me katula dikanda mosi na Izraele.
7 Inki beto fwete sala sambu na kupesa bankento na bantu yina me bikala, awa ya beto me zenga kieleka na Yehowa+ nde beto ta pesa bo ve bana na beto ya bankento sambu na kuvanda bankento na bo?”+
8 Bo yulaka nde: “Nani na kati ya makanda ya Izraele tombukaka ve na Yehowa na Mispa?”+ Yo salamaka nde ata muntu mosi ve ya Yabeshi-gileadi kwendaka na camp kisika yina dibundu vandaka.
9 Ntangu bo tangaka bantu, bo monaka nde ata muntu mosi ve na kati ya bantu ya Yabeshi-gileadi vandaka kuna.
10 Yo yina, bantu ya Izraele tindaka kuna bantu 12 000 na kati ya bantu ya kuluta ngolo. Bo songaka bo nde: “Beno kwenda mpi beno fwa bantu ya Yabeshi-gileadi na mbele ya bitumba, yo vanda bankento mpi bana.+
11 Kima ya beno fwete sala yo yai: Konso bakala mpi konso nkento yina me vukisaka nitu ti bakala, beno fwete fwa yandi.”
12 Na kati ya bantu ya Yabeshi-gileadi, bo monaka bana-bankento 400 yina vandaka bamwense, bayina me vukisaka ntete ve nitu ti babakala. Yo yina, bo nataka bo na camp na Shilo,+ yina kele na insi ya Kanana.
13 Ebuna bantu yonso ya Izraele tindilaka bantu ya Benyamini ndinga na ditadi ya Rimoni+ sambu na kusonga bo nde bitumba me mana.
14 Yo yina, Benyamini kwisaka kuvutuka na ntangu yina. Bo pesaka bo bankento yina bo bikaka na luzingu na kati ya bankento ya Yabeshi-gileadi,+ kansi bankento yina bo monaka vandaka fioti sambu na bo.
15 Ebuna bantu ya Izraele waka mawa sambu na mambu yina bwilaka Benyamini+ sambu Yehowa salaka nde makanda ya Izraele kukabwana.
16 Bankuluntu ya bantu ya Izraele tubaka nde: “Inki beto fwete sala sambu na kupesa bankento na babakala yina me bikala, awa ya bankento yonso ya Benyamini me mana?”
17 Bo vutulaka nde: “Dikabu fwete vanda sambu na bantu ya Benyamini yina me guluka, na mpila nde ata dikanda mosi ve kukatuka na Izraele.
18 Kansi beto kele ve ti nswa ya kupesa bo bankento na kati ya bana na beto ya bankento, sambu bantu ya Izraele zengaka kieleka nde: ‘Bo fwete singa muntu yina ke pesa Benyamini nkento.’”+
19 Ebuna bo tubaka nde: “Tala! Konso mvula ke vandaka ti nkinsi sambu na Yehowa na Shilo,+ yina kele na nordi ya Betele mpi na esti ya nzila ya nene yina ke katuka na Betele mpi ke tombuka na Shekemi mpi na sudi ya Lebona.”
20 Yo yina, bo songaka bantu ya Benyamini nde: “Beno kwenda mpi beno tula bantu bo bumbana na bilanga ya vinu.
21 Ntangu beno ta mona bana-bankento* ya Shilo ke basika sambu na kukwisa kukina makinu na bo ya kuziunga, konso muntu na kati na beno fwete basika na bilanga ya vinu mpi kukanga nkento mosi na kati ya bana-bankento ya Shilo, ebuna beno fwete vutuka na insi ya Benyamini.
22 Kana batata na bo to bampangi na bo ya babakala kukwisa kubokutila beto, beto ta songa bo nde, ‘Beno wila beto mawa sambu na bo, sambu beto kukaka ve kupesa konso muntu nkento na kati ya bankento yina beto bakaka na bitumba+ mpi kana beno bantu pesaka bo bankento, beno zolaka kusala mbi.’”+
23 Yo yina bantu ya Benyamini salaka kaka mutindu yina, mpi konso muntu bakaka nkento na kati ya bankento yina vandaka kukina. Na nima, bo vutukaka na ntoto na bo yina vandaka dikabu na bo mpi tungaka diaka bambanza na bo+ mpi zingaka na kati na yo.
24 Na ntangu yina bantu ya Izraele panzanaka kuna, konso muntu kwendaka na dikanda na yandi mpi na dibuta na yandi, ebuna bo katukaka kuna, konso muntu kwendaka na ntoto na yandi yina vandaka dikabu na yandi.
25 Na bilumbu yina, ntotila vandaka ve na Izraele.+ Konso muntu vandaka kusala mambu yina vandaka mbote na meso na yandi mosi.*
Banoti na nsi ya lutiti
^ Na kisina, “baleke ya bankento.”
^ To “mambu yina yandi vandaka kuyindula nde yo kele mbote.”
