Bingana 14:1-35
14 Nkento ya mayele kibeni ke tungaka nzo na yandi,+Kansi nkento ya zoba ke bwisaka yo na maboko na yandi mosi.
2 Muntu yina ke tambulaka na kusungama na yandi ke waka Yehowa boma,Kansi muntu yina banzila na yandi kele ya luvunu* ke vwezaka yandi.
3 Kutuba ya lulendo ya zoba kele bonso fimbu,Kansi munoko ya bantu ya mayele ta tanina bo.
4 Kisika bangombe kele ve, kidikilu ke vandaka bunkete,Kansi ngolo ya ngombe ya bakala ke salaka nde bima kubasika mingi.
5 Mbangi ya kwikama ta kusa ve,Kansi mbangi ya luvunu ke kusaka ntangu yonso.+
6 Muntu ya ke vwezaka ke sosaka mayele mpi yandi ke monaka yo ve,Kansi nzayilu ke kwisaka kukonda mpasi na muntu yina kele ti mayele ya kubakisa mambu.+
7 Vanda ntama ti zoba,Sambu nge ta mona ve nzayilu na munoko na yandi.+
8 Na mayele na yandi, muntu ya luswasukusu ke bakisaka nzila yina yandi ke kwenda,Kansi bo ke kusaka bazoba* na buzoba na bo.+
9 Bazoba ke sekaka ata bo me nata makambu,*+Kansi luzolo ya kuwakana* ke vandaka na kati ya bantu ya mbote.
10 Ntima ke zabaka bululu na yo,*Mpi muntu ya nkaka ve lenda vukana na kiese na yo.
11 Nzo ya bantu ya mbi ta bwa,+Kansi tenta ya bantu ya mbote ta toma.
12 Kele ti nzila yina ke monanaka mbote na meso ya muntu,+Kansi na nsuka yo ke nataka na lufwa.+
13 Ata na maseka, ntima lenda vanda na mpasi,Mpi kiese lenda suka na mawa.
14 Muntu yina kele ntima-ngolo ta buka mbuma ya banzila na yandi,+Kansi muntu ya mbote ke bakaka lufutu ya mambu ya yandi ke salaka.+
15 Muntu ya kukonda mayele ke ndimaka mambu yonso,Kansi muntu ya mayele ke tadilaka konso kitambi na yandi.+
16 Muntu ya mayele kele ngangu mpi ke tinaka mambu ya mbi,Kansi zoba kele mafu-mafu* mpi ke kuditudilaka ntima kuluta ndilu.
17 Muntu yina ke waka makasi nswalu ke salaka mambu na buzoba,+Kansi muntu yina ke tadilaka mambu mbote-mbote,* bo ke mengaka yandi.
18 Bantu ya kukonda mayele ta kuma bazoba,Kansi bantu ya mayele ke lwataka nzayilu bonso mpu ya kimfumu.+
19 Bantu ya mbi ta fukama na ntwala ya bantu ya mbote,Mpi bantu ya mbi ta fukama na bakielo ya muntu ya lunungu.
20 Bantu yonso ke mengaka nsukami, ata nkweno na yandi,+Kansi mvwama ke vandaka ti banduku mingi.+
21 Muntu yina ke vweza nkweno na yandi ke sala disumu,Kansi muntu yina ke wilaka muntu ya kukonda mfunu mawa ke vandaka na kiese.+
22 Keti bantu yina ke kanaka mambu ya mbi ta vila ve nzila?
Kansi bantu yina kele ti lukanu ya kusala mambu ya mbote ta baka zola ya kwikama mpi kwikama.+
23 Lufutu ke vandaka na konso kisalu ya ngolo,Kansi bituba-tuba ke nataka na kinsukami.+
24 Mpu ya kimfumu ya bantu ya mayele kele kimvwama na bo;Kansi buzoba ya bazoba kele kaka buzoba.+
25 Mbangi ya kieleka ke gulusaka bantu,*Kansi muntu ya luvunu ke kusaka ntangu yonso.
26 Kana muntu ke wa Yehowa boma yandi ke tudilaka yandi ntima mingi,+Mpi yo ta vanda kitininu sambu na bana na yandi.+
27 Boma ya Yehowa kele nto ya luzingu,Sambu na kukatula muntu na mitambu ya lufwa.
28 Ntotila ke vandaka na lukumu kana bantu kele mingi,+Kansi mfumu yina me konda bantu, kiyeka na yandi ta suka.
29 Muntu yina ke waka ve makasi nswalu kele ti luswasukusu mingi,+Kansi muntu ya lupupu ke monisaka buzoba na yandi.+
30 Ntima ya pima ke pesaka luzingu* na nitu,Kansi kimpala kele maladi yina ke diaka mikwa.+
31 Muntu yina ke kusa muntu ya kukonda mfunu ke finga muntu yina salaka yandi,+Kansi muntu yina ke wilaka nsukami mawa ke pesaka yandi lukumu.+
32 Mambu ya mbi yina muntu ya mbi ke salaka ta bwisa yandi,Kansi muntu ya lunungu ta baka kitininu na kwikama na yandi.+
33 Mayele ke vandaka na pima na ntima yina kele ti mayele ya kubakisa mambu,+Kansi yo fwete zabana yo mosi na kati ya bazoba.
34 Lunungu ke tombulaka dikanda,+Kansi disumu kele nsoni sambu na bantu.
35 Ntotila ke waka kiese na nsadi yina ke salaka ti mayele ya kubakisa mambu mbote-mbote,+Kansi yandi ke wilaka muntu yina ke salaka mambu na nsoni makasi.+
Banoti na nsi ya lutiti
^ To “nioka-nioka.”
^ To mbala ya nkaka, “bazoba ke kusaka bankaka.”
^ To “bo me lomba ndolula.”
^ To “luzolo ya mbote.”
^ To “bululu ya moyo na yo.”
^ To “ke waka makasi.”
^ To “yina kele ti mayele ya kuyindula.”
^ To “mioyo.”
^ To “mavimpi.”
