Esdrasi 5:1-17
5 Ebuna mbikudi Agai+ ti mbikudi Zekaria+ mutekolo ya Ido+ bikulaka sambu na Bayuda yina vandaka na Yuda mpi na Yeruzalemi, na zina ya Nzambi ya Izraele yina vandaka kuyala bo.
2 Yo vandaka na ntangu yina Zorobabele+ mwana ya Shealtiele+ mpi Yeshua mwana ya Yehosadaki yantikaka kutunga diaka nzo ya Nzambi+ yina vandaka na Yeruzalemi; ebuna bambikudi ya Nzambi vandaka ti bo mpi sadisaka bo.+
3 Na ntangu yina, Tatenai mfumu ya mbanza ya ntoto yina kele na Simu ya Nzadi,* Shetare-bozenai, mpi bantu na bo ya nkaka yina vandaka kusala ti bo kwisaka kisika bo vandaka mpi yulaka bo nde: “Nani me pesa beno nswa ya kutunga nzo yai mpi ya kumanisa bibaka* yai?”
4 Ebuna bo yulaka bo nde: “Bantu yina ke sala kisalu ya kutunga nzo yai, bazina na bo banani?”
5 Kansi Nzambi vandaka kukeba* bankuluntu ya Bayuda,+ mpi bo kangaka bo ve nzila tii kuna bo tindilaka Dariusi nsangu mpi bo vutudilaka bo mukanda yina katukaka na bamfumu sambu na diambu yai.
6 Yai mambu yina vandaka na mukanda yina Tatenai mfumu ya mbanza ya ntoto yina kele na Simu ya Nzadi, Shetare-bozenai, mpi bantu na yandi ya nkaka yina vandaka kusala ti yandi, bamfumu ya nkaka ya bambanza ya ntoto yina kele na Simu ya Nzadi, tindilaka ntotila Dariusi;
7 bo tindilaka yandi nsangu, mpi yai mambu yina bo sonikaka:
“Na ntotila Darius:
“Bika nde ngemba yonso kuvanda na nge!
8 Bika nde ntotila kuzaba nde beto kwendaka na provense* ya Yuda na nzo ya Nzambi ya nene, mpi bo ke tunga yo ti matadi ya nene mpi bo ke tula mabaya na bibaka. Bantu ke sala kisalu na kikesa yonso mpi yo ke kwenda na ntwala na nsadisa ya bikesa na bo.
9 Ebuna beto yulaka bankuluntu na bo nde: ‘Nani me pesa beno nswa ya kutunga nzo yai mpi ya kumanisa bibaka* yai?’+
10 Beto yulaka bo mpi bazina na bo sambu na kusonga nge, na mpila nde beto sonika bazina ya bantu yina ke twadisa kisalu yina.
11 “Yai mvutu ya bo pesaka beto: ‘Beto kele bansadi ya Nzambi ya zulu ti ya ntoto, mpi beto kele na kutunga diaka nzo yina bo tungaka bamvula mingi me luta, yina ntotila mosi ya nene ya Izraele tungaka mpi manisaka.+
12 Kansi, sambu batata na beto pesaka Nzambi ya zulu makasi,+ yandi pesaka bo na maboko ya Nebukadenezare+ ntotila ya Babilone, muntu ya Kaldea, yina fwaka nzo+ yai mpi nataka bantu na kimpika na Babilone.+
13 Kansi, na mvula ya ntete ya Sirusi ntotila ya Babilone, ntotila Sirusi pesaka nsiku ya kutunga diaka nzo yai ya Nzambi.+
14 Diaka, ntotila Sirusi basisaka na tempelo ya Babilone malonga ya wolo ti ya arza ya nzo ya Nzambi yina Nebukadenezare bakaka na tempelo na Yeruzalemi mpi nataka na tempelo ya Babilone.+ Bo pesaka yo na muntu mosi zina na yandi Sheshbasare,*+ yina Sirusi tulaka mfumu ya mbanza.+
15 Sirusi tubilaka yandi nde: “Baka malonga yai. Kwenda mpi tula yo na tempelo yina kele na Yeruzalemi, mpi bika nde bo tunga diaka nzo ya Nzambi na kisika yina yo vandaka ntete.”+
16 Ebuna Sheshbasare yai kwisaka, mpi yandi tulaka bafondasio ya nzo ya Nzambi,+ yina kele na Yeruzalemi; mpi yantika ntangu yina tii bubu yai bo ke tunga yo kaka, kansi yo me mana ntete ve.’+
17 “Ntangu yai kana yo kele mbote na meso ya ntotila, bika nde bo zikisa na kisika ya kubumba bimvwama ya ntotila kuna na Babilone, sambu na kuzaba kana ntotila Sirusi pesaka nsiku ya kutunga diaka nzo yina ya Nzambi na Yeruzalemi;+ mpi bika nde bo songa beto lukanu yina ntotila ta baka na diambu yai.”
Banoti na nsi ya lutiti
^ To “na Simu ya Nkaka ya Efrate.”
^ To “banti.”
^ Na kisina, “disu ya Nzambi na bo vandaka na zulu ya.”
^ To “distrike yina kele na nsi ya luyalu mosi.”
^ To “banti.”
