Ezekiele 12:1-28
12 Ndinga ya Yehowa kwisilaka mono diaka nde:
2 “Mwana ya muntu, nge ke zinga na nzo ya me kolamaka. Bo kele ti meso sambu na kumona, kansi bo ke mona ve, mpi makutu sambu na kuwa, kansi bo ke wa ve,+ sambu bo kele nzo ya me kolamaka.+
3 Kansi nge, mwana ya muntu, yidika bifunda na nge bonso muntu ya bo ke nata na insi ya nzenza. Ebuna, na mwini ntangu bo ke tala, nge fwete kwenda na insi ya nzenza. Katuka na nzo na nge mpi kwenda na insi ya nzenza ntangu bo ke tala. Ziku bo ta tula dikebi, ata bo kele nzo ya me kolamaka.
4 Na mwini ntangu bo ke tala, basisa bifunda na nge ya kukanga sambu na kukwenda na insi ya nkaka, ebuna na nkokila na ntangu bo ke tala, nge fwete kwenda bonso muntu mosi ya bo ke nata na insi ya nkaka.+
5 “Ntangu bo ke tala, tobula dibulu na kibaka, mpi basisa bima na nge na dibulu yina.+
6 Ntangu bo ke tala, tula bima na nge na zulu ya dipeka na nge mpi basisa yo na mpimpa. Fika luse na nge na mpila nde nge mona ve ntoto, sambu mono ke kumisa nge kidimbu sambu na nzo ya Izraele.”+
7 Mono salaka kaka mutindu bo songaka mono. Na mwini, mono basisaka bifunda na mono bonso bifunda ya muntu ya ke kwenda na insi ya nkaka, mpi na nkokila mono tobulaka dibulu na kibaka na maboko. Ntangu mpimpa bwaka, mono basisaka bima na mono, mono nataka yo na zulu ya dipeka na mono na meso na bo.
8 Na suka, ndinga ya Yehowa kwisilaka mono diaka nde:
9 “Mwana ya muntu, keti nzo ya Izraele, nzo yina me kolamaka, yulaka nge ve nde, ‘Inki nge ke sala?’
10 Songa bo nde, ‘Yehowa Mfumu ya Kuluta Nene me tuba nde: “Nsangu yai ke tadila mfumu+ yina kele na Yeruzalemi mpi nzo ya mvimba ya Izraele na kati ya mbanza.”’
11 “Tuba nde, ‘Mono kele kidimbu sambu na beno.+ Kaka mutindu mono me sala, bo ta sala bo mpi mutindu yina. Bo ta nata bo na insi ya nzenza, na kimpika.+
12 Mfumu yina kele na kati na bo ta nata bima na yandi na zulu ya dipeka mpi ta kwenda na mudidi. Yandi ta tobula dibulu na kibaka mpi ta basisa bima na yandi na dibulu yina.+ Yandi ta fika luse na yandi na mpila nde yandi mona ve ntoto.’
13 Mono ta losa bukondi na mono na zulu na yandi, mpi yandi ta kangama na bukondi na mono ya kuzomba.+ Ebuna mono ta nata yandi na Babilone, na insi ya bantu ya Kaldea, kansi yandi ta mona yo ve; mpi yandi ta fwa kuna.+
14 Bantu yonso yina kele na nziunga na yandi, bansadisi na yandi ti basoda na yandi, mono ta panza bo na bandambu yonso;+ ebuna mono ta basisa mbele ya bitumba sambu na kulanda bo.+
15 Ebuna bo ta zaba nde mono kele Yehowa ntangu mono ta panza bo na kati ya makanda mpi na kati ya bansi.
16 Kansi mono ta gulusa ndambu ya bantu na kati na bo sambu bo fwa ve na mbele ya bitumba, na nzala, mpi na kipupa, mpidina bo ta tubila mambu na bo yonso ya mbi na kati ya makanda yina bo ta kwenda; ebuna bo ta zaba nde mono kele Yehowa.”
17 Ndinga ya Yehowa kwisilaka mono diaka nde:
18 “Mwana ya muntu, nge fwete dia dimpa na nge ti matekita mpi kunwa masa na nge ti ntima zulu-zulu mpi ti susi.+
19 Tubila bantu ya insi nde, ‘Yehowa Mfumu ya Kuluta Nene me tubila bantu ya Yeruzalemi na insi ya Izraele nde: “Bo ta dia dimpa na bo ti susi mpi ta nwa masa na bo ti boma ya ngolo, sambu insi na bo ta bikala kibeni ya mpamba+ sambu na mubulu ya bantu yonso yina ke zingaka muna.+
20 Bambanza yina bantu ke zingaka ta beba, mpi insi ta kuma ntoto mosi ya mpamba;+ ebuna beno ta zaba nde mono kele Yehowa.”’”+
21 Ndinga ya Yehowa kwisilaka mono diaka nde:
22 “Mwana ya muntu, inki kingana yai ya beno kele na yo na Izraele ya ke tuba nde, ‘Bilumbu ke luta, kansi bambona-meso yonso ke lungana ve’?+
23 Yo yina tubila bo nde, ‘Yehowa Mfumu ya Kuluta Nene me tuba nde: “Mono ta sala nde bantu kutuba diaka ve mambu yai, mpi bo ta sadila yo diaka ve bonso kingana na Izraele.”’ Kansi songa bo nde, ‘Bilumbu me finama,+ ebuna bambona-meso yonso ta lungana.’
24 Na kati ya nzo ya Izraele,+ yo ta vanda diaka ve ata ti mbona-meso mosi ya luvunu mpi bantu ta zabisa diaka ve na ntwala mambu yina ta bwa ya ke lebaka.*
25 ‘“Sambu mono, Yehowa, mono ta tuba. Konso diambu yina mono ke tuba ta lungana kukonda kusukinina diaka.+ O nzo ya me kolamaka, na bilumbu na beno,+ mono ta tuba diambu yina mpi ta lungisa yo,” Yehowa Mfumu ya Kuluta Nene muntu me tuba.’”
26 Ndinga ya Yehowa kwisilaka mono diaka nde:
27 “Mwana ya muntu, bantu* ya Izraele ke tuba nde, ‘Mbona-meso yina yandi ke mona kele sambu na ntangu mingi yantika na ntangu yai, mpi yandi ke bikula na yina me tala bilumbu ke kwisa na ntwala.’+
28 Yo yina tubila bo nde, ‘Yehowa Mfumu ya Kuluta Nene me tuba nde: “‘Ata ngogo na mono mosi ve ta sukinina; konso diambu ya mono ke tuba ta lungana,’ Yehowa Mfumu ya Kuluta Nene muntu me tuba.”’”
