Ezekiele 13:1-23
13 Ebuna ndinga ya Yehowa kwisilaka mono diaka nde:
2 “Mwana ya muntu, bikula sambu na bambikudi ya Izraele,+ mpi tubila bantu yina ke ganga bambikudulu na bo mosi*+ nde, ‘Beno wa ndinga ya Yehowa.
3 Yehowa Mfumu ya Kuluta Nene me tuba nde: “Mawa na bambikudi ya bazoba, bayina ke landa ntima na bo mosi, na ntangu bo me mona ata kima mosi ve!+
4 O Izraele, bambikudi na nge me kuma bonso mikengi na kati-kati ya mayumbu.
5 Beno ta kwenda ve na bisika ya kubukana yina kele na bibaka ya matadi sambu na kutunga yo diaka sambu na nzo ya Izraele,+ na mpila nde Izraele kubikala ya kutelama na bitumba na kilumbu ya Yehowa.”+
6 “Bo me mona bambona-meso ya luvunu mpi me tuba luvunu na ntwala, bayina ke tuba nde, ‘Ndinga ya Yehowa kele,’ ntangu Yehowa me tinda bo ve, mpi bo ke vingila nde mambu yina bo tubaka kulungana.+
7 Keti yo kele ve mbona-meso ya luvunu ya beno me mona mpi luvunu ya beno me tuba na ntwala ntangu beno ke tuba nde, ‘Ndinga ya Yehowa kele,’ ntangu mono me tuba ve ata kima?”’
8 “‘Yo yina, Yehowa Mfumu ya Kuluta Nene me tuba nde: “‘Sambu beno me tuba mambu ya luvunu mpi bambona-meso na beno kele ya luvunu, mono ke menga beno,’ Yehowa Mfumu ya Kuluta Nene muntu me tuba.”+
9 Diboko na mono ke kwisa kunwanisa bambikudi yina bambona-meso na bo kele ya luvunu mpi bayina ke tubilaka luvunu na ntwala.+ Bo ta vanda ve na kati ya bantu yina mono ke telaka kinsweki; bo ta sonika bo mpi ve na mukanda ya bazina ya nzo ya Izraele; bo ta vutuka mpi ve na insi ya Izraele; ebuna beno ta zaba nde mono kele Yehowa Mfumu ya Kuluta Nene.+
10 Yai yonso sambu bo me vidisa bantu na mono nzila ntangu bo ke tuba nde, “Ngemba kele!” kansi ngemba kele ve.+ Kana bo tunga kibaka mosi na kati ya nzo mpi kibaka yina kele ngolo ve, bo ke pakula yo mpemba.’*+
11 “Songa bantu yina ke pakula mpemba yina nde yo ta bwa. Mvula ya ngolo ta kwisa, mvula ya matadi* ta noka, mpi mipepe ya ngolo kibeni ta bwisa yo.+
12 Ebuna ntangu kibaka yina ta bwa, bo ta yula beno nde, ‘Wapi mpemba yina beno pakulaka?’+
13 “Yo yina, Yehowa Mfumu ya Kuluta Nene me tuba nde: ‘Mono ta sala nde mipepe ya ngolo kibeni kubula ngolo sambu na nganzi na mono, mvula ya ngolo kibeni sambu na makasi na mono, mpi mvula ya matadi sambu na makasi ya ke fwaka.
14 Mono ta buka kibaka yina beno pakulaka mpemba mpi ta bwisa yo na ntoto, ebuna fondasio na yo ta monana. Ntangu mbanza ta bwa, beno ta fwa na kati na yo; ebuna beno ta zaba nde mono kele Yehowa.’
15 “‘Ntangu mono ta yambula kibeni makasi na mono na zulu ya kibaka mpi na zulu ya bantu yina pakulaka yo mpemba, mono ta tubila beno nde: “Kibaka kele diaka ve, mpi bantu yina ke pakulaka yo mpemba kele diaka ve.+
16 Bambikudi ya Izraele kele diaka ve, bayina ke bikula sambu na Yeruzalemi mpi ke mona bambona-meso ya ngemba sambu na yandi, na ntangu ngemba kele ve,”’+ Yehowa Mfumu ya Kuluta Nene muntu me tuba.
17 “Kansi nge mwana ya muntu, tula luse na nge na ndambu ya bana-bankento ya bantu na nge bayina ke ganga bambikudulu na bo mosi, mpi bikula sambu na bo.
18 Songa bo nde, ‘Yehowa Mfumu ya Kuluta Nene me tuba nde: “Mawa na bankento yina ke tunga babande sambu na maboko* yonso mpi ke sala bilele ya kufika ntu sambu na ba-ntu ya mitindu yonso sambu na kuzomba luzingu* ya bantu! Keti beno ke zomba luzingu* ya bantu na mono mpi ke sala yonso sambu na kutanina luzingu* na beno mosi?
19 Keti beno ta vweza mono na kati ya bantu na mono sambu na kubaka mwa diboko ya orze mpi bitini ya mampa,+ na ntangu beno ke fwa bantu* yina fwete fwa ve mpi ke bika na luzingu bantu* yina fwete zinga ve, mpi beno ke sala mutindu yina na nzila ya mambu na beno ya luvunu ya beno ke tela bantu na mono, bayina ke wa mambu na beno ya luvunu?”’+
20 “Yo yina, Yehowa Mfumu ya Kuluta Nene me tuba nde: ‘O bankento, mono ke nwanisa babande na beno yina beno ke sadila sambu na kuzomba bantu* bonso nde bo vandaka bandeke, mpi mono ta pasula yo na maboko na beno mpi ta gulusa bantu yina beno ke zomba bonso bandeke.
21 Mono ta pasula bilele na beno ya kufika ntu mpi ta gulusa bantu na mono na maboko na beno, ebuna bo ta vanda diaka ve kima yina beno fwete kanga na mutambu; ebuna beno ta zaba nde mono kele Yehowa.+
22 Beno me lembisa ntima ya muntu ya lunungu ti mambu na beno ya luvunu+ na ntangu mono vandaka ve kupesa yandi mpasi, mpi beno me kumisa maboko ya muntu ya mbi ngolo,+ yo yina yandi ke yambula ve nzila na yandi ya mbi sambu na kubikala na luzingu.+
23 Yo yina, beno bankento, beno ta mona diaka ve bambona-meso ya luvunu mpi ta zabisa diaka ve na ntwala mambu yina ta bwa;+ mono ta gulusa bantu na mono na maboko na beno, ebuna beno ta zaba nde mono kele Yehowa.’”
Banoti na nsi ya lutiti
^ To “bantu yina ke bikula mambu ya ke katuka na ntima na bo mosi.”
^ Disongidila, kutunga kibaka mosi ya kati ya kukonda ngolo mpi kupakula yo mpemba sambu na kusosa kumonisa nde yo kele ngolo.
^ Na kisina, “mpi nge, O mvula ya matadi.”
^ Disongidila, babande ya mazi ya bo vandaka kulwata na binkoso ya maboko to na maboko.
^ To “mioyo.”
^ To “mioyo.”
^ To “mioyo.”
^ To “mioyo.”
^ To “mioyo.”
^ To “mioyo.”
