Ezekiele 19:1-14
-
Nkunga ya mawa sambu na bamfumu ya Izraele (1-14)
19 “Nge fwete yimba nkunga ya mawa* sambu na bamfumu ya Izraele
2 mpi kutuba nde,‘Mama na nge vandaka muntu ya nki mutindu? Ntambu ya nkento na kati ya bantambu ya babakala.
Yandi vandaka kulala na kati ya bana-bantambu ya ngolo* mpi vandaka kusansa bana na yandi.
3 Yandi yedisaka mwana mosi na kati ya bana na yandi, mpi mwana yina kumaka mwana-ntambu ya ngolo.+
Yandi longukaka mutindu ya kuzenga-zenga mbisi yina yandi me kanga,Nkutu yandi diaka bantu.
4 Makanda waka nsangu na yandi mpi kangaka yandi na dibulu na bo,Ebuna bo kotisaka yandi bandobo na mbombo+ mpi nataka yandi na insi ya bantu ya Ezipte.
5 Yandi vingilaka, mpi nsuka- nsuka yandi monaka nde kivuvu ya kuvutuka vandaka ve sambu na yandi.
Yo yina yandi bakaka mwana na yandi ya nkaka mpi tindaka yandi bonso mwana-ntambu ya ngolo.
6 Yandi tambula-tambulaka mpi na kati ya bantambu ebuna yandi kumaka mwana-ntambu ya ngolo.
Yandi longukaka mutindu ya kuzenga-zenga mbisi yina yandi kangaka, mpi nkutu yandi diaka bantu.+
7 Yandi tambula-tambulaka na kati ya banzo-zulu na bo ya kele ti bibaka ya ngolo mpi bebisaka bambanza na bo,Na mpila nde insi yina ya me bikalaka mpamba fulukaka ti makelele ya kungana na yandi.+
8 Makanda yina katukaka na bateritware ya nziunga kwisaka kunwanisa yandi sambu na kulosa bukondi na bo na zulu na yandi,Ebuna yandi kangamaka na dibulu na bo.
9 Bo sadilaka bandobo yina sambu na kutula yandi na kati ya kamwa-nzo mosi mpi bo nataka yandi na ntotila ya Babilone.
Kuna bo kangaka yandi, sambu ndinga na yandi kuwakana diaka ve na zulu ya bangumba ya Izraele.
10 Mama na nge vandaka bonso nti ya vinu+ na kati ya menga na nge,* yina bo me kuna pene-pene ya bamasa.
Nti yango butaka mbuma mpi yo vandaka ya kufuluka ti balutangu sambu masa vandaka mingi.
11 Yo basisaka balutangu ya ngolo,* ya me fwana na kuvanda mihangu ya bamfumu.
Yo yelaka, yo lutaka banti ya nkaka na nda,Mpi yo kumaka kumonana sambu yo vandaka nda mingi mpi sambu yo vandaka ti matiti mingi.
12 Kansi bo tumunaka yo na makasi yonso+ mpi bo losaka yo na ntoto,Ebuna mupepe ya esti yumisaka bambuma na yo.
Bo bukaka balutangu na yo ya ngolo ebuna yo yumaka,+ mpi tiya yoka- ka yo.+
13 Ntangu yai bo me kuna nti yina ya vinu na ntoto-makanga,
Na insi mosi ya kukonda masa+ mpi ya kuyuma.
14 Tiya katukaka na balutangu* na yo mpi panzanaka, ebuna yo yokaka matiti na yo ti bambuma na yo,
Ata lutangu mosi ve ya ngolo bikalaka, mpi ata muhangu mosi ve sambu na kuyala.+
“‘Yai nkunga ya mawa, mpi yo ta vanda bonso nkunga mosi ya mawa.’”
Banoti na nsi ya lutiti
^ To “nkunga ya mafwa.”
^ To “na kati ya bana-bantambu yina kele ti mika mingi na nkingu.”
^ To mbala ya nkaka, “bonso nti ya vinu na kilanga na nge ya vinu.”
^ To “banti.”
^ To “banti.”
