Ezekiele 23:1-49
23 Ndinga ya Yehowa kwisilaka mono diaka nde:
2 “Mwana ya muntu, kuvandaka ti bankento zole yina vandaka bana ya mama mosi.+
3 Bo kumaka bandumba na Ezipte;+ yantika kileke na bo, bo vandaka kusala kindumba. Bantu bweta-bwetaka mabele na bo kuna, mpi bo simba-simbaka mabele na bo ya kimwense.
4 Zina ya mbuta vandaka Ohola,* mpi zina ya mpangi na yandi ya nkento vandaka Oholiba.* Bo kumaka ya mono mpi bo butaka bana-babakala mpi bana-bankento. Na yina me tala bazina na bo, Ohola kele Samaria,+ mpi Oholiba kele Yeruzalemi.
5 “Ohola yantikaka kusala kindumba+ ntangu yandi vandaka ya mono. Yandi vandaka ti nzala ya ngolo ya kuvukisa nitu ti bantu yina ke zolaka yandi ngolo,+ bantu ya Asiria bayina ke zingaka pene-pene na yandi.+
6 Bo vandaka bamfumu ya bambanza yina me lwata bilele ya ble mpi bilandi ya bamfumu—baleke ya babakala yonso ya kitoko ya ke tambulaka na zulu ya bampunda.
7 Yandi landaka kusala kindumba ti bana yonso ya kuluta kitoko ya Asiria, mpi yandi kudikumisaka mvindu+ ti biteki ya nzanzi* ya bantu yina yandi vandaka ti nzala ya ngolo ya kuvukisa nitu ti bo.
8 Yandi yambulaka ve kindumba yina yandi vandaka kusala na Ezipte, sambu bo lalaka yandi na kileke na yandi, mpi bo simba-simbaka mabele na yandi ya kimwense mpi manisilaka yandi nzala na bo ya ngolo ya kuvukisa nitu.*+
9 Yo yina mono pesaka yandi na maboko ya bantu yina vandaka kuzola yandi ngolo, bana ya Asiria,+ bayina yandi vandaka ti nzala ya ngolo ya kuvukisa nitu ti bo.
10 Bo monisaka kinkonga na yandi+ na meso ya bantu yonso, bo kangaka bana na yandi ya babakala ti ya bankento,+ mpi bo fwaka yandi ti mbele ya bitumba. Yandi zabanaka na mutindu ya mbi na kati ya bankento mpi bo sambisaka yandi mpi pesaka yandi ndola.
11 “Ntangu mpangi na yandi ya nkento Oholiba monaka yo, nzala na yandi ya ngolo ya kuvukisa nitu kumaka diaka ngolo kuluta, ebuna kindumba na yandi kumaka ngolo kuluta yina ya mpangi na yandi ya nkento.+
12 Yandi waka nzala ya ngolo ya kuvukisa nitu ti bana ya Asiria+ bayina ke zingaka pene-pene na yandi, bamfumu ya bambanza mpi bilandi ya bamfumu yina lwataka bilele ya lukumu mpi vandaka kutambula na zulu ya bampunda—baleke ya babakala yonso ya kitoko.
13 Ntangu yandi kudikumisaka mvindu, mono monaka nde bo yonso zole landaka nzila ya mutindu mosi.+
14 Kansi yandi landaka kusala diaka mingi kindumba na yandi. Yandi monaka bifwanisu ya babakala ya bo me sala na kibaka, bifwanisu ya bantu ya Kaldea ya bo me sala ti mukubu ya mbwaki,
15 bo me lwata mikaba na luketo na bo, ti batirbani ya ke lela na ba-ntu na bo, bo vandaka kumonana bonso basoda, bo yonso vandaka kumonisa bantu ya Babilonia, bayina me butukaka na insi ya bantu ya Kaldea.
16 Yandi yantikaka kuwa nzala ya ngolo ya kuvukisa nitu ti bo kaka na ntangu yandi monaka bo, mpi yandi tindilaka bo binati-nsangu na Kaldea.+
17 Yo yina bana ya Babilone landaka kukwisa na mbeto na yandi sambu na kuvukisa nitu ti yandi, mpi bo kumisaka yandi mvindu ti nzala na bo ya ngolo ya kuvukisa nitu.* Ntangu bo kumisaka yandi mvindu imene, yandi* buyaka bo sambu na nzanzi.
18 “Ntangu yandi landaka kusala kindumba kukonda kuwa nsoni mpi kusonga kinkonga na yandi+ na meso ya bantu yonso, mono buyaka yandi sambu na nzanzi, kaka mutindu mono* buyaka mpangi na yandi ya nkento sambu na nzanzi.+
19 Ebuna yandi landaka kusala kindumba na yandi diaka mingi,+ yandi vandaka kuyibuka bilumbu ya kileke na yandi ntangu yandi vandaka kusala kindumba na insi ya Ezipte.+
20 Yandi vandaka kuwa nzala ya ngolo ya kuvukisa nitu ti bo bonso bamakangu ya babakala yina kibakala na bo kele bonso ya mpunda mpi bayina kibakala na bo kele bonso ya mpunda ya bitumba.
21 Nge vandaka kuzola mingi mambu ya nsoni yina nge vandaka kusala na kileke na nge na Ezipte+ ntangu bo vandaka kusimba-simba mabele na nge, mabele na nge ya kileke.+
22 “Yo yina Oholiba, yai mambu Yehowa Mfumu ya Kuluta Nene me tuba: ‘Tala, mono ke tedimisa bantu yina vandaka kuzola nge,+ bayina nge* buyaka sambu na nzanzi, mpi mono ta baka bo na bandambu yonso+ mpi ta nata bo sambu na kunwanisa nge,
23 bana ya Babilone+ mpi bantu yonso ya Kaldea,+ babakala ya Pekodi,+ Shoa mpi Koa, kumosi ti bana yonso ya Asiria. Bo yonso kele baleke ya babakala ya kitoko, bamfumu ya bambanza mpi bilandi ya bamfumu, basoda mpi bantu ya bo me solaka mbote-mbote,* bo yonso ke tambulaka na zulu ya bampunda.
24 Bo ta nwanisa nge ti bapusu-pusu ya bitumba ya ke tulaka makelele mpi makulu ya bapusu-pusu, ti kimvuka ya nene ya basoda, ti kitaninu ya nene mpi kitaninu ya fioti,* ti mpu. Bo ta telama na nziunga na nge, mpi mono ta pesa bo nswa ya kusambisa, ebuna bo ta sambisa nge mutindu bo me zola.+
25 Mono ta monisila nge nganzi na mono, mpi bo ta sadila nge mambu na makasi na bo. Bo ta zenga mbombo na nge mpi makutu na nge, ebuna bantu na nge yina ta bikala ta bwa na mbele ya bitumba. Bo ta nata bana na nge ya babakala ti bana na nge ya bankento, mpi bantu na nge yina ta bikala tiya ta yoka bo.+
26 Bo ta katula nge bilele+ mpi ta botula mayaka na nge ya kitoko.*+
27 Mono ta sukisa mambu na nge ya nsoni mpi kindumba na nge,+ yina yantikaka na insi ya Ezipte.+ Nge ta talaka bo diaka ve, mpi nge ta yibuka Ezipte diaka ve.’
28 “Yehowa Mfumu ya Kuluta Nene me tuba nde: ‘Tala, mono ke zola kupesa nge na maboko ya bantu yina nge ke mengaka, bayina nge* buyaka sambu na nzanzi.+
29 Bo ta sadila nge mambu ti kumenga yonso mpi ta baka bima yonso yina nge salaka ngolo+ sambu na kubaka mpi ta bikisa nge kinkonga na meso ya bantu yonso. Nsoni ya kinkonga ya pite na nge, mambu na nge ya nsoni, mpi kindumba na nge ta monana na meso ya bantu yonso.+
30 Bo ta sala nge mambu yai sambu nge landaka makanda bonso nkento ya ndumba,+ sambu nge kudikumisaka mvindu ti biteki na bo ya nzanzi.+
31 Nge me landa nzila ya mpangi na nge ya nkento,+ ebuna mono ta tula dikopa na yandi na diboko na nge.’+
32 “Yehowa Mfumu ya Kuluta Nene me tuba nde:
‘Nge ta nwa dikopa ya nda mpi ya nene ya mpangi na nge ya nkento,+Mpi nge ta kuma kima ya bo ke seka mpi ya bo ke vweza, yina kele mingi na kati ya dikopa.+
33 Nge ta lawuka kibeni* malafu mpi ta vanda na mawa ya nene,Dikopa ya kuyituka mpi ya ke bebisaka,Dikopa ya mpangi na nge ya nkento, Samaria.
34 Nge ta nwa yo, nge ta manisa yo yonso+ mpi nge ta tatika bipesi na yo ya ntotoMpi na nima tumuna mabele na nge.
“Sambu mono muntu me tuba,” Yehowa Mfumu ya Kuluta Nene muntu me tuba.’
35 “Yo yina Yehowa Mfumu ya Kuluta Nene me tuba nde: ‘Sambu nge me vila mono mpi nge me vweza mono kibeni,*+ nge ta buka mbuma ya bikalulu na nge ya nsoni mpi ya kindumba na nge.’”
36 Ebuna Yehowa tubilaka mono nde: “Mwana ya muntu, keti nge ta sambisa Ohola mpi Oholiba+ mpi ta monisa bo mambu na bo ya nzanzi?
37 Bo me sala bizumba,*+ mpi bo kele ti menga na maboko na bo. Bo me sala ve kaka bizumba ti biteki na bo ya nzanzi, kansi bana yina bo butilaka mono, bo me yoka* bo mpi na tiya bonso madia sambu na biteki na bo.+
38 Diaka, bo me sala mono mambu yai: Bo kumisaka kisika na mono ya santu mvindu na kilumbu yina mpi bo vwezaka bisabatu na mono.
39 Na nima ya kufwa bana na bo bonso bimenga sambu na biteki na bo ya nzanzi,+ bo kwisaka kukota na kisika na mono ya santu sambu na kuvweza yo+ kaka na kilumbu yina. Yai kele mambu yina bo salaka na kati ya nzo na mono.
40 Nkutu bo tindaka kinati-nsangu sambu na kubinga babakala na kukwisa katuka na kisika ya ntama.+ Ntangu bo vandaka kukwisa, nge yobilaka mpi pakulaka bima na meso na nge mpi kudikumisaka kitoko ti bima ya ke kumisaka nitu kitoko.+
41 Mpi nge vandaka na zulu ya kiti mosi+ ya kitoko ti mesa ya bo tulaka na ntwala na yo,+ mpi nge tulaka ndumbu na mono+ mpi mafuta na mono+ na zulu na yo.
42 Makelele ya kimvuka ya bantu yina ke zingaka kukonda kudiyangisa vandaka kuwakana kuna, mpi kuvandaka ti bantu ya ke lawukaka malafu na kati na bo, bayina bo nataka tuka ntoto-makanga. Bo tulaka mitaku na maboko ya bankento mpi bampu ya kimfumu na ba-ntu na bo.
43 “Ebuna mono tubaka sambu na yandi, muntu yina me lemba sambu na bizumba nde: ‘Ntangu yai yandi ta landa kusala kindumba na yandi.’
44 Yo yina bo landaka kukwenda na yandi, mutindu muntu ke kwendaka na nkento ya ndumba. Yai kele mutindu bo kwendaka na Ohola mpi na Oholiba, bankento ya mambu ya nsoni.
45 Kansi bantu ya lunungu ta pesa yandi ndola yina me fwana sambu na bizumba+ mpi menga yina me tiamukaka;+ sambu bo kele bankento ya bizumba, mpi bo kele na menga na maboko na bo.+
46 “Yehowa Mfumu ya Kuluta Nene me tuba nde: ‘Basoda ta kwisa kunwanisa bo sambu na kukumisa bo kima ya ke pesa boma mpi bo ta botula bima na bo.+
47 Basoda ta losila bo matadi+ mpi ta fwa bo na mbele ya bitumba. Bo ta fwa bana na bo ya babakala ti ya bankento+ mpi bo ta yoka banzo na bo tiya.+
48 Mono ta sukisa mambu ya nsoni na insi, mpi bankento yonso ta baka dilongi mpi ta landa ve mambu na beno ya nsoni.+
49 Bo ta pesa beno ndola sambu na bikalulu na beno ya nsoni mpi sambu na masumu ya beno me salaka ti biteki na beno ya nzanzi; ebuna beno ta zaba nde mono kele Yehowa Mfumu ya Kuluta Nene.’”+
Banoti na nsi ya lutiti
^ Yo ke tendula “Tenta na Mono Kele na Kati na Yandi.”
^ Yo ke tendula “Tenta na Yandi.”
^ Ngogo ya Kiebreo ya bo me sadila awa lenda vanda na kuwakana ti ngogo “tufi” mpi bo me sadila yo sambu na kuvweza.
^ To “mansoni na bo.”
^ To “moyo na yandi.”
^ To “ti mansoni na bo.”
^ To “moyo na mono.”
^ To “moyo na nge.”
^ Na kisina “bantu ya bo me bingaka.”
^ Kitaninu mosi ya fioti, mbala mingi bantu ya ke sadilaka munduki ya tolo-tolo bantu vandaka kulwata yo.
^ To “bima na nge ya kukumisa nitu kitoko.”
^ To “moyo na nge.”
^ Na kisina, “ta fuluka ti.”
^ Na kisina, “nge me losa mono na nima ya mukongo na nge.”
^ Na kisina, “me lutisa.”
^ Disongidila, bizumba ya kimpeve.
