Ezekiele 31:1-18
-
Kubwa ya Ezipte, nti ya sedre ya nda (1-18)
31 Na mvula ya 11, na ngonda ya tatu, na kilumbu ya ntete ya ngonda, ndinga ya Yehowa kwisilaka mono diaka nde:
2 “Mwana ya muntu, tubila Farao ntotila ya Ezipte mpi bimvuka na yandi ya nene ya bantu+ nde,‘Nge kele bonso nani na bunene na nge?
3 Kuvandaka ti muntu mosi ya Asiria, nti ya sedre na Libani,Yina vandaka ti balutangu ya kitoko bonso kimvuka ya banti ya madidi, mpi ya nda kibeni;Nsongi na yo vandaka kusimba matuti.
4 Bamasa kumisaka yo nene, banto ya masa ya mudindu kumisaka yo nda.
Bamasa vandaka bisika yonso yina bo kunaka yo;Banzila ya bamasa na yo vandaka kunata masa na banti yonso ya kilga.
5 Yo yina yo kumaka nda mingi kuluta banti yonso ya nkaka ya kilanga.
Balutangu na yo ya nene kumaka mingi, mpi balutangu na yo ya fioti kumaka ndaSambu na masa mingi yina vandaka na banto na yo.
6 Bandeke yonso ya zulu tulaka babuyamba na bo na balutangu na yo ya nene,Bambisi yonso ya mfinda butaka na nsi ya balutangu na yo ya fioti,Mpi makanda yonso yina kele ti bantu mingi vandaka kuvanda na nsi ya madidi na yo.
7 Yo kumaka kitoko kibeni mpi balutangu na yo kumaka nda kibeni,Sambu misisa na yo kotaka tii na nsi ya bamasa mingi.
8 Ata nti mosi ve ya sedre na kilanga ya Nzambi+ lendaka kufwanana ti yo.
Ata nti mosi ve ya yenevriye vandaka ti balutangu ya nene bonso yo,Mpi ata nti mosi ve ya pla- tane lendaka kufwanana ti balutangu na yo.
Ata nti ya nkaka ve na kilanga ya Nzambi lendaka kutesana ti kitoko na yo.
9 Mono kumisaka yo kitoko, ti matiti mingi,Mpi banti yonso ya nkaka ya Edeni, kilanga ya Nzambi ya kieleka, vandaka kulula yo.’
10 “Yo yina, Yehowa Mfumu ya Kuluta Nene me tuba nde: ‘Sambu yo* kumaka nda mutindu yina, yo tombulaka nsongi na yo tii na matuti, mpi ntima na yo kumaka lulendo sambu na nda na yo,
11 mono ta pesa yo na maboko ya mfumu ya ngolo ya makanda.+ Yandi ta sala yo mbi kibeni, mpi mono ta buya yo sambu na mbi na yo.
12 Ebuna banzenza, makanda ya kuluta nku, ta zenga yo, mpi bo ta yambula yo na zulu ya bangumba, ebuna matiti na yo ta bwa na miwanda yonso, mpi balutangu na yo ta bukana mpi ta bwa na bamasa yonso ya insi.+ Bantu yonso ya ntoto ta katuka na madidi na yo mpi ta yambula yo.
13 Bandeke yonso ya zulu ta zinga na kitini ya nti na yo ya me bwa, mpi bambisi yonso ya mfinda ta zinga na balutangu na yo.+
14 Yo ta vanda mutindu yina sambu ata nti mosi ve ya kele pene-pene ya bamasa kukuma nda mingi to kutombula nsongi na yo tii na matuti mpi sambu ata nti mosi ve ya ke bakaka masa mingi kukuma nda kiteso mosi ti yo. Bo ta pesa yo yonso na lufwa, na nsi ya ntoto, kumosi ti bana ya bantu, bayina ke kulumuka na dibulu.’*
15 “Yehowa Mfumu ya Kuluta Nene me tuba nde: ‘Na kilumbu yina yo ta kulumuka na Maziamu,* mono ta sala nde bantu kudila. Yo yina, mono ta fika bamasa ya mudindu mpi ta kanga bamasa na yo na mpila nde bamasa mingi kukangama. Mono ta bwisa mpimpa na Libani sambu na yo, ebuna banti yonso ya mfinda ta yuma.
16 Na makelele ya kubwa na yo, mono ta sala nde makanda kutekita ntangu mono ta kulumusa yo na Maziamu* kumosi ti bantu yonso yina ke kulumuka na dibulu,* ebuna banti yonso ya Edeni,+ ya kuluta kitoko mpi ya kuluta mbote ya Libani, banti yonso yina ke bakaka masa mingi, ta lembama na nsi ya ntoto.
17 Bo me kulumuka na Maziamu* ti yandi, na bantu yina bo me fwaka na mbele ya bitumba,+ kumosi ti bansadisi* na yandi, bayina vandaka kuzinga na nsi ya madidi na yandi na kati ya makanda.’+
18 “‘Inki nti na kati ya banti ya Edeni vandaka bonso nge na nkembo mpi na bunene?+ Kansi ya kieleka bo ta bwisa nge na nsi ya ntoto ti banti ya Edeni. Nge ta lala ti bayina bo me yotisaka ve, ti bayina bo me fwaka na mbele ya bitumba. Diambu yai ta kumina Farao ti bimvuka na yandi yonso ya nene ya bantu,’ Yehowa Mfumu ya Kuluta Nene muntu me tuba.”
Banoti na nsi ya lutiti
^ Na kisina, “nge.”
^ To “maziamu.”
^ To “Sheole,” disongidila, maziamu ya bantu yonso. Tala Bantendula ya Bangogo.
^ To “Sheole,” disongidila, maziamu ya bantu yonso. Tala Bantendula ya Bangogo.
^ To “maziamu.”
^ To “Sheole,” disongidila, maziamu ya bantu yonso. Tala Bantendula ya Bangogo.
^ Na kisina, “diboko.”
