Ezekiele 32:1-32
32 Na mvula ya 12, na ngonda ya 12, na kilumbu ya ntete ya ngonda, ndinga ya Yehowa kwisilaka mono diaka nde:
2 “Mwana ya muntu, yimba nkunga ya mawa* sambu na Farao ntotila ya Ezipte, mpi tubila yandi nde,‘Nge vandaka bonso mwana- ntambu mosi* ya ngolo ya makanda,Kansi bo me kanga nge munoko.
Nge vandaka bonso mbisi ya boma+ ya nzadi-mungwa, nge vandaka kudibula-bula ngolo na kati ya banzadi na nge,Mpi nge vandaka kufunsula bamasa ti makulu na nge mpi kukumisa banzadi yina* mvindu.’
3 Yehowa Mfumu ya Kuluta Nene me tuba nde:
‘Mono ta sadila kimvuka ya makanda mingi sambu na kulosa bukondi na mono na zulu na nge,Ebuna bo ta benda nge na bukondi na mono.
4 Mono ta yambula nge na insi yina;Mono ta losa nge na nseke.
Mono ta sala nde bandeke yonso ya zulu kubwa na zulu na nge,Ebuna mono ta sala nde ba- mbisi ya mfinda ya ntoto ya mvimba kufuluka misuni na nge.+
5 Mono ta losa misuni na nge na bangumbaMpi ta fulusa miwanda ti bitini ya mvumbi na nge.+
6 Mono ta podisa insi yina ti menga na nge ya mingi ya ke basika ntinu-ntinu, tii na bangumba,Ebuna yo ta fulusa bamasa.’*
7 ‘Ntangu mono ta fwa nge, mono ta fika zulu mpi ta kumisa bambwetete na yo mpimpa.
Mono ta fika ntangu ti matuti,Mpi ngonda ta pesa ve nsemo na yo.+
8 Mono ta sala nde bima yonso ya ke pesaka nsemo na zulu kukuma mudidi sambu na nge,Ebuna mono ta sala nde mpimpa kufika insi na nge,’ Yehowa Mfumu ya Kuluta Nene muntu me tuba.
9 ‘Mono ta pesa bantima ya bantu mingi mpasi ntangu mono ta nata bampika na nge na makanda ya nkaka,Na bansi yina nge zabaka ve.+
10 Mono ta sala nde bantu mingi kuyituka ngolo,Ebuna bantotila na bo ta tekita na boma sambu na nge ntangu mono ta songa bo mbele na mono ya bitumba.
Bo ta tekita ntangu yonso, konso muntu ta wa boma sambu na luzingu na yandi,Na kilumbu yina nge ta bwa.’
11 Sambu Yehowa Mfumu ya Kuluta Nene me tuba nde:
‘Mbele ya bitumba ya ntotila ya Babilone ta kwisa na zulu na nge.+
12 Mono ta sala nde bimvuka na nge ya nene ya bantu kubwa na bambele ya bitumba ya basoda ya ngolo;Bo yonso kele makanda ya kuluta nku.+
Bo ta kulumusa lulendo ya Ezipte, ebuna bimvuka na yandi yonso ya nene ya bantu ta mana.+
13 Mono ta fwa bitwisi na yandi yonso pene-pene ya bamasa na yandi ya mingi,+Mpi ata dikulu mosi ve ya muntu to diboto ya kitwisi ta kumisa yo diaka poto-poto.’+
14 ‘Na ntangu yina, mono ta kumisa bamasa na yo bunkete,Ebuna mono ta sala nde banzadi na yo kukulumuka bonso mafuta,’ Yehowa Mfumu ya Kuluta Nene muntu me tuba.
15 ‘Ntangu mono ta kumisa Ezipte kisika ya me bikalaka mpamba, insi ya bo me katulaka bima yonso yina fulusaka yo,+Ntangu mono ta fwa bantu yonso ya ke zingaka na kati na yo,Bo ta zaba nde mono kele Yehowa.+
16 Yo kele nkunga ya mawa, mpi bantu ta yimba yo kibeni;Bana-bankento ya makanda ta yimba yo.
Bo ta yimbila yo Ezipte mpi bimvuka na yo yonso ya nene ya bantu,’ Yehowa Mfumu ya Kuluta Nene muntu me tuba.”
17 Ebuna na mvula ya 12, na kilumbu ya 15 ya ngonda, ndinga ya Yehowa kwisilaka mono nde:
18 “Mwana ya muntu, dila bimvuka ya nene ya bantu ya Ezipte mpi kulumusa yandi na nsi ya ntoto, yandi ti bana-bankento ya makanda ya ngolo, ti bayina ke kulumuka na dibulu.*
19 “‘Nge me luta nani na kitoko? Kulumuka, mpi lala ti bantu ya kukonda kuyotisa!’
20 “‘Bo ta bwa na kati ya bantu yina bo ta fwa na mbele ya bitumba.+ Bo me pesa yandi na maboko ya bambeni; benda yandi kumosi ti bimvuka na yandi yonso ya nene ya bantu.
21 “‘Basoda ya kuluta ngolo ta tubila yandi ti bansadisi na yandi katuka na nsi kibeni ya Maziamu.* Bo ta kulumuka kibeni mpi ta lala, kaka bonso bantu ya kukonda kuyotisa, bantu ya bo ta fwa na mbele ya bitumba.
22 Asiria kele pana ti kimvuka na yandi yonso ya bantu. Maziamu na bo kele na nziunga na yandi, bo yonso ya me bwaka na mbele ya bitumba.+
23 Maziamu na yandi kele na nsi kibeni ya dibulu,* mpi kimvuka na yandi ya bantu kele na nziunga ya maziamu na yandi, bo yonso ya me fwaka na mbele ya bitumba, sambu bo pesaka boma na insi ya bantu ya moyo.
24 “‘Elami+ kele pana ti bimvuka na yandi yonso ya nene ya bantu na nziunga ya maziamu na yandi, bo yonso ya me bwaka na mbele ya bitumba. Bo me kulumuka ya kukonda kuyotisa na nsi ya ntoto, bayina pesaka boma na insi ya bantu ya moyo. Ntangu yai, bo ta wa nsoni ti bayina ke kulumuka na dibulu.*
25 Bo me sadila yandi mbeto na kati ya bantu ya bo me fwaka, kumosi ti bimvuka na yandi yonso ya nene ya bantu na nziunga ya maziamu na yandi. Bo yonso kele ya kukonda kuyotisa, bantu yina bo me fwaka na mbele ya bitumba, sambu bo pesaka boma na insi ya bantu ya moyo; ebuna bo ta wa nsoni ti bayina ke kulumuka na dibulu.* Bo me tula yandi na kati ya bantu ya bo me fwaka.
26 “‘Mesheki, Tubale,+ ti bimvuka na bo* yonso ya nene ya bantu kele kuna. Maziamu na yandi kele na nziunga na yandi. Bo yonso kele ya kukonda kuyotisa, bantu ya bo me tobulaka na mbele ya bitumba, sambu bo pesaka boma na insi ya bantu ya moyo.
27 Keti bo ta lala ve ti basoda ya ngolo ya kukonda kuyotisa yina me bwaka, bayina kulumukaka na Maziamu* ti binwaninu na bo ya bitumba? Bo ta tula bambele na bo ya bitumba na nsi ya ba-ntu* na bo mpi masumu na bo na zulu ya mikwa na bo, sambu basoda yai ya ngolo pesaka insi ya bantu ya moyo boma.
28 Kansi nge, bo ta fwa nge na kati ya bantu ya kukonda kuyotisa, ebuna nge ta lala ti bantu yina bo me fwaka na mbele ya bitumba.
29 “‘Edomi+ kele kuna, ti bantotila na yandi mpi bamfumu na yandi yonso; ata bo vandaka ngolo mingi, bo tulaka bo na kati ya bantu yina bo fwaka na mbele ya bitumba; bo mpi ta lala ti bantu ya kukonda kuyotisa+ mpi ti bantu yina ke kulumuka na dibulu.*
30 “‘Bamfumu* yonso ya nordi kumosi ti bantu yonso ya Sidoni+ kele kuna, bayina me kulumukaka na nsoni ti bantu ya bo me fwaka, ata ngolo na bo vandaka kupesa boma. Bo ta lala ya kukonda kuyotisa ti bantu yina bo fwaka na mbele ya bitumba mpi ta wa nsoni ti bantu yina ke kulumuka na dibulu.*
31 “‘Farao ta mona mambu yai yonso, mpi yandi ta lembama sambu na mambu yonso yina kuminaka bimvuka na yandi ya nene ya bantu;+ bo ta fwa Farao ti basoda na yandi yonso ya ngolo na mbele ya bitumba,’ Yehowa Mfumu ya Kuluta Nene muntu me tuba.
32 “‘Sambu yandi pesaka boma na insi ya bantu ya moyo, Farao ti bimvuka na yandi yonso ya nene ya bantu ta lala sambu na kupema ti bantu ya kukonda kuyotisa, ti bantu yina bo me fwaka na mbele ya bitumba,’ Yehowa Mfumu ya Kuluta Nene muntu me tuba.”
Banoti na nsi ya lutiti
^ Na kisina, “na bo.”
^ To “mwana-ntambu yina kele ti mika mingi na nkingu.”
^ To “nkunga ya mafwa.”
^ Na kisina, “Ebuna bambeto ya banzadi ta fuluka na (ti) nge.”
^ To “maziamu.”
^ To “Sheole,” disongidila, maziamu ya bantu yonso. Tala Bantendula ya Bangogo.
^ To “maziamu.”
^ To “maziamu.”
^ To “maziamu.”
^ Na kisina, “na yandi.”
^ To “Sheole,” disongidila, maziamu ya bantu yonso. Tala Bantendula ya Bangogo.
^ Ziku yo ke tubila basoda yina bo zikaka ti bambele na bo ya bitumba, ti lukumu ya bo ke pesaka na basoda.
^ To “maziamu.”
^ To “Bantwadisi.”
^ To “maziamu.”
