Ezekiele 34:1-31
34 Ndinga ya Yehowa kwisilaka mono diaka nde:
2 “Mwana ya muntu, bikula mambu ya mbi sambu na bangungudi ya Izraele. Bikula, mpi tubila bangungudi yina nde, ‘Yehowa Mfumu ya Kuluta Nene me tuba nde: “Mawa na bangungudi ya Izraele,+ bayina ke dia bo mosi! Keti bangungudi fwete disa ve bitwisi?+
3 Beno ke dia mafuta, beno ke lwata lene, mpi beno ke fwa mbisi ya kuluta mafuta,+ kansi beno ke disa ve bitwisi.+
4 Beno me pesa ve bayina me lemba kikesa, beno me belula ve yina ke bela, beno me kanga ve babande na yina me lwala, beno me vutula ve yina ke yungana-yungana, mpi beno me sosa ve yina me vila;+ kansi, beno me yala bo ti makasi mpi nku.+
5 Yo yina bo panzanaka sambu ngungudi vandaka ve;+ bo panzanaka mpi kumaka madia sambu na bambisi yonso ya mfinda.
6 Mameme na mono vandaka kuyungana-yungana na bangumba yonso ya nene mpi na bangumba yonso ya fioti ya nda; mameme na mono panzanaka na ntoto ya mvimba, ata muntu mosi ve sosaka bo to salaka ngolo sambu na kumona bo.
7 “‘“Yo yina, beno bangungudi, beno wa ndinga ya Yehowa:
8 ‘“Ya kieleka mutindu mono kele na luzingu,” Yehowa Mfumu ya Kuluta Nene muntu me tuba, “sambu mameme na mono me kuma bambisi ya kudia, madia sambu na bambisi yonso ya mfinda, sambu ata ngungudi mosi ve vandaka, mpi bangungudi na mono sosaka ve mameme na mono; kansi, bo landaka kudia bo mosi mpi bo disaka ve mameme na mono,”’
9 beno bangungudi, beno wa ndinga ya Yehowa.
10 Yehowa Mfumu ya Kuluta Nene me tuba nde: ‘Mono ke kwisa kunwanisa bangungudi, mpi mono ta lomba bo na kuvutula munoko sambu na mameme na mono,* ebuna mono ta kula bo sambu bo disa* diaka ve mameme na mono,+ mpi bangungudi yina ta dia diaka ve bo mosi. Mono ta gulusa mameme na mono na munoko na bo, ebuna bo ta vanda diaka ve madia sambu na bo.’”
11 “‘Yehowa Mfumu ya Kuluta Nene me tuba nde: “Mono yandi yai, mono ta sosa mameme na mono mono mosi, mpi mono ta keba bo.+
12 Mono ta keba mameme na mono bonso ngungudi yina me mona mameme na yandi yina panzanaka mpi ke disa bo.+ Mono ta gulusa bo na bisika yonso yina bo panzanaka na kilumbu ya matuti mpi ya mpimpa ya ngolo.+
13 Mono ta basisa bo na kati ya bantu mpi ta vukisa bo kisika mosi na bansi mpi ta nata bo na insi na bo ebuna mono ta disa bo na bangumba ya Izraele,+ pene-pene ya bamasa ti ya bisika yonso ya insi yina bantu ke zingaka.
14 Mono ta disa bo na nseke ya mbote, ebuna insi yina bo ta dia matiti ta vanda na bangumba ya kunanguka ya Izraele.+ Bo ta lala kuna na insi ya mbote ya kudia matiti,+ mpi bo ta dia na banseke ya kuluta mbote na zulu ya bangumba ya Izraele.”
15 “‘“Mono ta disa mameme na mono mono mosi,+ mpi mono mosi ta sala nde bo lala,”+ Yehowa Mfumu ya Kuluta Nene muntu me tuba.
16 “Mono ta sosa+ yina me vila, mono ta vutula yina ke yungana-yungana, mono ta kanga babande na yina me lwala, mpi mono ta pesa yina me lemba kikesa; kansi mono ta fwa yina kele mafuta-mafuta mpi yina kele ngolo. Mono ta sambisa yo mpi ta pesa yo ndola ya me fwana.”
17 “‘Sambu na beno, mameme na mono, Yehowa Mfumu ya Kuluta Nene me tuba nde: “Mono ke zola kusambisa mameme, mameme ya babakala ti bankombo ya babakala.+
18 Keti kudia matiti ya kuluta mbote me fwana ve sambu na beno? Keti beno fwete niata mpi na makulu na beno matiti na beno yina me bikala? Mpi na nima ya kunwa masa ya kuluta bunkete, keti beno fwete niata yo na makulu na beno sambu na kukumisa yo mvindu?
19 Keti ntangu yai mameme na mono fwete dia matiti yina makulu na beno me niata mpi kunwa masa yina makulu na beno me kumisa mvindu?”
20 “‘Yo yina Yehowa Mfumu ya Kuluta Nene me songa bo nde: “Mono yandi yai, mpi mono ta sambisa dimeme ya mafuta-mafuta mpi dimeme ya kukonda,
21 sambu beno landaka kupusa ti bampanzi na beno mpi dipeka na beno, mpi beno landaka kupusa ti bibongo na beno bayina yonso vandaka ya kubela tii kuna beno panzaka bo.
22 Ebuna mono ta gulusa mameme na mono, mpi bo ta vanda diaka ve kima ya kukanga;+ mono ta sambisa mameme.
23 Mono ta basisila bo ngungudi mosi,+ nsadi na mono Davidi,+ mpi yandi ta disa bo. Yandi mosi ta disa bo mpi ta kuma ngungudi na bo.+
24 Mono, Yehowa, mono ta kuma Nzambi na bo,+ mpi nsadi na mono Davidi ta kuma mfumu na kati na bo.+ Mono mosi, Yehowa, muntu me tuba.
25 “‘“Mono ta sala ti bo kuwakana mosi ya ngemba,+ mpi mono ta katula bambisi ya mfinda ya makasi na insi yina,+ na mpila nde bo zinga na lutaninu na ntoto-makanga mpi bo lala na bamfinda.+
26 Mono ta sala nde bo mpi kisika yina kele na nziunga ya ngumba na mono ya fioti kukuma lusakumunu,+ mpi mono ta sala nde mvula kunoka na ntangu yina me fwana. Balusakumunu ta kulumuka bonso mvula.+
27 Banti ya mfinda ta buta mbuma na yo, ntoto ta pesa bima na yo,+ mpi bo ta zinga na lutaninu na insi yina. Ebuna bo ta zaba nde mono kele Yehowa ntangu mono ta buka banti na bo ya vangu+ mpi ta gulusa bo na maboko ya bantu yina kumisaka bo bampika.
28 Bo ta kuma diaka ve kima yina makanda ta kanga, bambisi ya mfinda ya ntoto ta dia bo diaka ve, mpi bo ta zinga na lutaninu, ata muntu mosi ve ta pesa bo boma.+
29 “‘“Mono ta tudila bo kilanga ya lukumu,* bo ta fwa diaka ve nzala na insi yina,+ mpi makanda ta pesa bo diaka ve nsoni.+
30 ‘Ebuna bo ta zaba nde mono, Yehowa Nzambi na bo, mono kele ti bo mpi nde bo, nzo ya Izraele, bo kele bantu na mono,’+ Yehowa Mfumu ya Kuluta Nene muntu me tuba.”’
31 “‘Kansi beno, mameme na mono,+ mameme yina mono ke kebaka, beno kele kaka bantu, mpi mono kele Nzambi na beno,’ Yehowa Mfumu ya Kuluta Nene muntu me tuba.”
Banoti na nsi ya lutiti
^ To “Mono ta lomba mameme na mono na maboko na bo.”
^ To “keba.”
^ Na kisina, “sambu na zina mosi.”
