Ezekiele 35:1-15
-
Mbikudulu sambu na bangumba ya Seire (1-15)
35 Ndinga ya Yehowa kwisilaka mono diaka nde:
2 “Mwana ya muntu, balula luse na nge na ndambu ya ntoto ya bangumba ya Seire,+ mpi bikula mambu ya mbi sambu na yo.+
3 Tubila yo nde, ‘Yehowa Mfumu ya Kuluta Nene me tuba nde: “Mono ke nwanisa nge, O ntoto ya bangumba ya Seire, mpi mono ta tandula diboko na mono sambu na kupesa nge ndola mpi kukumisa nge ntoto ya me bikalaka mpamba.+
4 Mono ta kumisa bambanza na nge mayumbu, mpi nge ta kuma kisika ya me bikalaka mpamba;+ ebuna nge ta zaba nde mono kele Yehowa.
5 Sambu nge monisaka kimbeni ya ke manaka ve,+ mpi nge pesaka bantu ya Izraele na mbele ya bitumba na ntangu ya mpasi na bo, na ntangu ya ndola na bo ya nsuka.”’+
6 “‘Yo yina, ya kieleka mutindu mono kele na luzingu,’ Yehowa Mfumu ya Kuluta Nene muntu me tuba, ‘mono ta yidika nge sambu na kutiamuna menga, mpi menga yina tiamukaka ta landa nge.+ Sambu nge mengaka menga, menga yina tiamukaka ta landa nge.+
7 Mono ta kumisa ntoto ya bangumba ya Seire kisika ya me bikalaka mpamba,+ mpi mono ta katula na kati na yo konso muntu yina ke lutila kuna mpi konso muntu yina ke vutuka.
8 Mono ta fulusa bangumba na yo ti bantu ya bo me fwa; mpi bantu yina bo me fwa na mbele ya bitumba ta bwa na bangumba na nge ya fioti, na miwanda na nge, mpi na bamasa na nge yonso.
9 Mono ta kumisa nge mayumbu ya kimakulu, mpi bantu ta zinga ve na bambanza na nge;+ ebuna beno ta zaba nde mono kele Yehowa.’
10 “Sambu nge tubaka nde, ‘Makanda yai zole mpi bansi yai zole ta kuma ya mono, mpi beto ta baka yo yonso zole,’+ ata Yehowa yandi mosi vandaka kuna,
11 ‘yo yina, ya kieleka mutindu mono kele na luzingu,’ Yehowa Mfumu ya Kuluta Nene muntu me tuba, ‘mono ta sadila nge mambu na kutadila makasi mpi kimpala yina nge monisaka sambu nge vandaka kumenga bo;+ mpi mono ta sala nde bo zaba mono na kati na bo ntangu mono ta sambisa nge.
12 Ebuna nge ta zaba nde mono Yehowa, mono me wa mambu yonso ya kukonda luzitu yina nge tubaka sambu na bangumba ya Izraele ntangu nge tubaka nde, “Bo me bika yo ya mpamba mpi bo me pesa beto yo sambu na kudia.”*
13 Beno tubilaka mono na lulendo yonso, mpi beno kumisaka bangogo na beno mingi sambu na kutubila mono.+ Mono waka yo yonso.’
14 “Yehowa Mfumu ya Kuluta Nene me tuba nde: ‘Ntoto ya mvimba ta wa kiese ntangu mono ta kumisa nge kisika ya me bikalaka mpamba.
15 Kaka mutindu nge waka kiese ntangu dikabu ya nzo ya Izraele bikalaka mpamba, mono ta sadila nge mambu mutindu yina.+ Nge ta kuma kisika ya me bikalaka mpamba, O ntoto ya bangumba ya Seire, ee, Edomi+ ya mvimba; ebuna bo ta zaba nde mono kele Yehowa.’”
Banoti na nsi ya lutiti
^ Na kisina, “bonso madia.”
