Ezekiele 41:1-26
41 Ebuna yandi nataka mono na suku ya nganda ya kisika ya santu,* mpi yandi tesaka makunzi ya balweka; nene na yo vandaka maboko* sambanu na ndambu mosi, mpi maboko sambanu na ndambu ya nkaka.
2 Nene ya munoko ya kukotila vandaka maboko kumi, mpi bibaka ya balweka ya munoko* ya kukotila vandaka maboko tanu na ndambu mosi, mpi maboko tanu na ndambu ya nkaka. Yandi tesaka nda na yo, yo vandaka maboko 40, mpi nene na yo maboko 20.
3 Ebuna yandi kotaka na kati* mpi tesaka dikunzi ya lweka ya munoko ya kukotila, nene na yo vandaka maboko zole, mpi nene ya munoko ya kukotila vandaka maboko sambanu. Bibaka ya balweka ya munoko ya kukotila* vandaka maboko nsambwadi.
4 Na nima, yandi tesaka suku ya ke talana ti suku ya nganda ya kisika ya santu, nda na yo vandaka maboko 20 mpi nene na yo maboko 20.+ Mpi yandi tubilaka mono nde: “Yai kele Kisika ya Kuluta Santu.”+
5 Ebuna yandi tesaka kibaka ya tempelo, mpi nene na yo vandaka maboko sambanu. Nene ya basuku yina vandaka na balweka na nziunga ya tempelo vandaka maboko iya.+
6 Basuku yina vandaka na balweka vandaka ya ba etaze tatu, mosi na zulu ya nkaka, mpi konso etaze vandaka ti basuku 30. Kuvandaka ti mabaya na nziunga ya kibaka ya tempelo yina vandaka kusadisa na kusimba basuku yina vandaka na balweka, na mpila nde bima yina vandaka kusimba yo kotaka ve na kibaka ya tempelo yo mosi.+
7 Kuvandaka ti nzila mosi ya nioka-nioka* na bandambu yonso zole ya tempelo, yo vandaka kukuma nene ntangu yo vandaka kutombuka na basuku ya zulu.+ Yo vandaka kukuma nene na konso etaze kana muntu kukatuka na etaze ya nsi mpi kuluta na etaze ya kati-kati sambu na kutombuka na etaze ya zulu.
8 Mono monaka nde kibaka mosi ya nkufi vandaka me ziunga tempelo, mpi bafondasio ya basuku yina vandaka na balweka vandaka lukengi mosi ya maboko sambanu tii na kinkonko.
9 Nene ya kibaka ya nganda ya basuku yina vandaka na balweka vandaka maboko tanu. Kuvandaka ti kisika mosi ya pululu* na balweka yonso ya kibaka ya basuku yina vandaka na balweka ya tempelo.
10 Kuvandaka ti kisika mosi na kati ya tempelo ti basuku ya kudila madia,*+ nene na yo vandaka maboko 20 na konso ndambu.
11 Kuvandaka ti kielo mosi na kati ya basuku yina vandaka na balweka ti kisika ya pululu yina vandaka na ndambu ya nordi, mpi kielo ya nkaka na ndambu ya sudi. Nene ya kisika yina ya pululu vandaka maboko tanu na bandambu yonso.
12 Nzo yina vandaka na ndambu ya westi mpi ya ke tala kisika ya pululu vandaka nene maboko 70 mpi nda maboko 90; nene ya kibaka ya nzo yina vandaka maboko tanu na bandambu yonso.
13 Yandi tesaka tempelo, mpi nda na yo vandaka maboko 100. Nda ya kisika ya pululu, nda ya nzo,* ti nda ya bibaka na yo vandaka mpi maboko 100.
14 Nene ya ntwala ya tempelo yina ke tala na ndambu ya esti mpi kisika ya pululu vandaka maboko 100.
15 Yandi tesaka nda ya nzo yina vandaka kutala kisika ya pululu na ndambu ya nima, kumosi ti banzila na yo ya kulutila na bandambu yonso zole, yo vandaka maboko 100.
Yandi tesaka mpi suku ya nganda ya kisika ya santu, suku ya kati ya kisika ya santu,+ bisika ya kukotila ya kibansala,
16 mpi bansi ya minoko ya bakielo, banela yina bakadrema na yo vandaka nene na kati mpi fioti na nganda,+ mpi banzila ya kulutila yina vandaka na bisika yina tatu. Pene-pene ya nsi ya munoko ya kielo, kuvandaka ti mabaya ya bo me yidika mbote+ katuka na ntoto tii na banela; mpi banela yango vandaka ya kufika.
17 Bo tesaka zulu ya munoko ya kukotila, tempelo ya kati mpi nganda mpi kibaka ya mvimba na bandambu yonso.
18 Yo vandaka ti bifwanisu ya basherube+ ti ya maba,+ mpi konso diba vandaka na kati-kati ya basherube zole, mpi konso sherube vandaka ti baluse zole.
19 Luse ya muntu vandaka kutala diba yina vandaka na ndambu mosi, mpi luse ya ntambu* vandaka kutala diba yina vandaka na ndambu ya nkaka.+ Bo salaka yo mutindu yina na tempelo ya mvimba.
20 Bifwanisu ya basherube ti ya maba vandaka na kibaka ya kisika ya santu katuka na ntoto tii na kisika yina vandaka na zulu ya munoko ya kukotila.
21 Bandambu yonso ya makunzi ya kielo* ya kisika ya santu vandaka kiteso mosi.+ Na ntwala ya kisika ya kuluta santu, kuvandaka ti kima mosi bonso
22 mesa-kimenga ya mabaya+ yina nda na yo katuka na ntoto tii na zulu vandaka maboko tatu mpi nda na yo maboko zole. Yo vandaka ti makunzi ya binkonko, mpi bo salaka nsi* na yo ti balweka na yo na mabaya. Ebuna yandi tubilaka mono nde: “Yai kele mesa yina kele na ntwala ya Yehowa.”+
23 Suku ya nganda ya kisika ya santu vandaka ti bakielo zole, kisika ya kuluta santu mpi vandaka ti bakielo zole.+
24 Bakielo vandaka ti bikangilu zole yina vandaka kubaluka-baluka, bikangilu zole sambu na konso kielo.
25 Bifwanisu ya basherube ti ya maba vandaka na bakielo ya kisika ya santu, bonso bifwanisu yina vandaka na bibaka.+ Kuvandaka mpi ti kima mosi ya dibaya* yina basikaka mwa fioti na ntwala ya kisika ya kukotila na nganda.
26 Kuvandaka mpi ti banela yina bakadrema na yo vandaka nene na nganda mpi fioti na kati+ ti bifwanisu ya maba na bandambu yonso zole ya kisika ya kukotila, mpi na bandambu yonso ya basuku yina vandaka na balweka ya tempelo ti ya bima yina basikaka mwa fioti.
Banoti na nsi ya lutiti
^ Na kisina, “tempelo.” Na kapu 41 ti 42, ngogo yai ke tadila nganda ya kisika ya santu (Kisika ya Santu) to kisika ya santu ya mvimba (tempelo tanga mpi Kisika ya Santu ti Kisika ya Kuluta Santu).
^ Yo ke tubila maboko ya nda. Tala Bangindu ya Ngika B14.
^ Na kisina, “mpi balweka ya munoko.”
^ Disongidila, na kati ya kisika ya santu, to Kisika ya Kuluta Santu.
^ Na kisina, “Nene ya munoko ya kukotila.”
^ Yo ke monana bonso nde yo ke tubila bimatilu ya kubaluka-baluka.
^ Yo ke monana bonso nde yo ke tubila nzila mosi ya fioti na nziunga ya tempelo.
^ To “ti basuku.”
^ Disongidila, nzo yina kele na westi ya kisika ya santu.
^ To “mwana-ntambu yina kele ti mika mingi na nkingu.”
^ Na kisina, “nti ya kielo.” Yo ke monana bonso nde yo ke tubila munoko ya ke nataka na Kisika ya Santu.
^ Na kisina, “nda.”
^ To “kamwa-ludi.”
