Ezekiele 42:1-20
42 Ebuna yandi nataka mono na kibansala ya nganda yina kele na ndambu ya nordi.+ Yandi nataka mono na kimvuka ya basuku ya kudila madia yina vandaka pene-pene ya kisika ya pululu,+ na nordi ya nzo yina kangamaka ti tempelo.+
2 Nda na yo na ndambu ya munoko ya nordi vandaka maboko* 100, mpi nene na yo maboko 50.
3 Yo vandaka na kati-kati ya kibansala ya kati yina vandaka nene maboko 20 ti pavema ya kibansala ya nganda.+ Banzila na yo ya kulutila vandaka kutalana mpi yo vandaka ba etaze tatu.
4 Nzila mosi vandaka na ntwala ya basuku ya kudila madia,*+ nene na yo vandaka maboko 10 mpi nda na yo maboko 100,* mpi minoko na yo ya kukotila vandaka na ndambu ya nordi.
5 Na nzo yina, basuku ya kudila madia yina vandaka na zulu vandaka fioti kuluta basuku ya kudila madia yina vandaka na ba etaze ya nsi ti ya kati-kati, sambu banzila ya kukotila bakaka bisika na yo mingi.
6 Sambu yo vandaka ba etaze tatu, kansi yo vandaka ve ti makunzi bonso makunzi ya bibansala. Yo yina bo bakaka bisika mingi na pavema ya etaze yina ya zulu kuluta na etaze ya nsi ti ya kati-kati.
7 Nda ya kibaka ya matadi yina vandaka na nganda pene-pene ya basuku ya kudila madia na ndambu ya kibansala ya nganda yina vandaka kutala na ndambu ya basuku ya nkaka ya kudila madia vandaka maboko 50.
8 Nda ya basuku ya kudila madia yina vandaka na ndambu ya kibansala ya nganda vandaka maboko 50, kansi ya basuku ya kudila madia yina vandaka kutala na kisika ya santu vandaka maboko 100.
9 Kuvandaka ti nzila ya kukotila na ndambu ya esti yina vandaka kutombuka tii na basuku yina ya kudila madia katuka na kibansala ya nganda.
10 Kuvandaka mpi ti basuku ya kudila madia na kati* ya kibaka ya matadi ya kibansala yina kele na ndambu ya esti, pene-pene ya kisika ya pululu mpi ya nzo.+
11 Kuvandaka ti nzila mosi na ntwala na yo bonso yina ya basuku ya kudila madia ya nordi.+ Nene mpi nda na yo vandaka kiteso mosi, mpi bisika na yo ya kubasikila mpi mutindu bo salaka yo vandaka kiteso mosi. Bakielo na yo
12 vandaka bonso bakielo ya basuku ya kudila madia yina vandaka na ndambu ya sudi. Kuvandaka ti kielo na luyantiku ya nzila, na ntwala ya kibaka ya matadi yina vandaka pene-pene, na ndambu ya esti, kisika muntu lendaka kukotila.+
13 Ebuna yandi tubilaka mono nde: “Basuku ya kudila madia ya nordi ti basuku ya kudila madia ya sudi yina kele pene-pene ya kisika ya pululu+ kele basuku ya kudila madia ya santu, kisika banganga-nzambi ya ke kwendaka pene-nene na Yehowa ke diaka makabu ya kuluta santu.+ Kuna, bo ke tulaka makabu ya kuluta santu, dikabu ya mbuma, dikabu sambu na disumu, mpi dikabu sambu na makambu, sambu kisika yina kele ya santu.+
14 Kana banganga-nzambi kukota, bo fwete basika ve na kisika ya santu sambu na kukwenda na kibansala ya nganda kukonda kukatula ntete bilele yina bo sadilaka kisalu,+ sambu yo kele ya santu. Bo ta lwata bilele ya nkaka sambu na kupusana pene-pene ya bisika yina bo pesaka bantu nswa.”
15 Ntangu yandi manisaka kutesa kisika ya tempelo ya kati,* yandi basisaka mono na nzila ya kielo yina ke tala na ndambu ya esti,+ mpi yandi tesaka kisika yina yonso.
16 Yandi tesaka ndambu ya esti ti lukengi ya kutesila. Na kutadila lukengi ya kutesila,* ba-nda na yo vandaka balukengi 500 katuka na ndambu mosi tii na ndambu ya nkaka.
17 Yandi tesaka ndambu ya nordi, mpi na kutadila lukengi ya kutesila, ba-nda na yo vandaka balukengi 500.
18 Yandi tesaka ndambu ya sudi, mpi na kutadila lukengi ya kutesila, ba-nda na yo vandaka balukengi 500.
19 Yandi balukaka na ndambu ya westi. Yandi tesaka ba-nda balukengi 500 ti lukengi ya kutesila.
20 Yandi tesaka yo na bandambu yonso iya. Yo vandaka ti kibaka na nziunga na yo+ yina nda na yo vandaka balukengi 500 mpi nene na yo+ balukengi 500, sambu na kukabisa kisika ya santu ti kisika ya bantu yonso.+
Banoti na nsi ya lutiti
^ Yo ke tubila maboko ya nda. Tala Bangindu ya Ngika B14.
^ To “ya basuku.”
^ Na kutadila mbalula ya Kigreki ya Septante, “nda maboko 100.” Masonama ya Kiebreo ke tuba nde: “Nzila ya diboko mosi.” Tala Bangindu ya Ngika B14.
^ Na kisina, “na bunene.”
^ Na kisina, “nzo ya kati.”
^ Tala Bangindu ya Ngika B14.
