Ezekiele 46:1-24
46 “Yehowa Mfumu ya Kuluta Nene me tuba nde: ‘Kielo ya kibansala ya kati yina ke tala na ndambu ya esti+ fwete bikala ya kukanga+ bilumbu sambanu ya kisalu,+ kansi na kilumbu ya Kisabatu mpi na kilumbu ya ngonda ya mpa bo fwete kangula yo.
2 Mfumu ta katuka na nganda mpi ta kota na nzila ya kisika ya kukotila ya kielo,+ mpi yandi ta telama pene-pene ya dikunzi ya kielo. Banganga-nzambi ta tambika dikabu na yandi ya mvimba ya kuyoka ti bimenga na yandi ya kinduku, ebuna yandi ta fukama na nsi ya munoko ya kielo mpi na nima yandi ta basika. Kansi bo fwete kanga ve kielo yina tii na nkokila.
3 Bantu ya insi ta fukama mpi na ntwala ya Yehowa na munoko ya kielo yina na Bisabatu mpi na bangonda ya mpa.+
4 “‘Dikabu ya mvimba ya kuyoka yina mfumu ta pesa Yehowa na kilumbu ya Kisabatu fwete vanda bana-mameme sambanu ya babakala ya kukonda kifu mpi dimeme mosi ya bakala ya kukonda kifu.+
5 Dikabu ya mbuma ta vanda efa* mosi sambu na dimeme ya bakala mpi konso kima yina yandi lenda pesa sambu na bana-mameme ya babakala, mpi hini* mosi ya mafuta ti konso efa.+
6 Na kilumbu ya ngonda ya mpa, dikabu ta vanda mwana-ngombe ya bakala ya kukonda kifu ya kimvuka ya bangombe, bana-mameme sambanu ya babakala, mpi dimeme mosi ya bakala; yo fwete vanda bambisi ya kukonda kifu.+
7 Yandi fwete pesa bonso dikabu ya mbuma efa mosi sambu na mwana-ngombe ya bakala, efa mosi sambu na dimeme ya bakala, mpi konso kima yina yandi lenda pesa sambu na bana-mameme ya babakala. Yandi fwete pesa hini mosi ya mafuta ti konso efa.
8 “‘Ntangu mfumu ke kota, yandi fwete kota na nzila ya kisika ya kukotila ya kielo, mpi yandi fwete basika kaka na nzila yina.+
9 Ntangu bantu ya insi ke kwisa na ntwala ya Yehowa na nsungi ya bankinsi,+ bayina ke kotila na kielo ya nordi+ sambu na kukwisa kusambila fwete basikila na kielo ya sudi,+ mpi bayina ke kwisa kukotila na kielo ya sudi fwete basikila na kielo ya nordi. Ata muntu mosi ve fwete vutukila na kielo yina yandi kotilaka, sambu bo fwete basikila na kielo yina ke talana ti bo.
10 Na yina me tala mfumu yina kele na kati na bo, yandi fwete kota ntangu bo ke kota, mpi yandi fwete basika ntangu bo ke basika.
11 Na bankinsi mpi na bansungi ya bankinsi, dikabu ya mbuma fwete vanda efa mosi sambu na mwana-ngombe ya bakala, efa mosi sambu na dimeme ya bakala, mpi konso kima yina yandi lenda pesa sambu na bana-mameme ya babakala, mpi hini mosi ya mafuta ti konso efa.+
12 “‘Kana mfumu kupesa dikabu ya mvimba ya kuyoka to bimenga+ ya kinduku bonso dikabu ya luzolo ya mbote na Yehowa, bo ta kangudila yandi kielo yina ke tala na ndambu ya esti, ebuna yandi ta pesa dikabu na yandi ya kuyoka ya mvimba mpi bimenga na yandi ya kinduku mutindu yandi ke salaka na kilumbu ya Kisabatu.+ Kana yandi basika, bo fwete kanga kielo yina.+
13 “‘Konso kilumbu nge fwete pesa mwana-dimeme ya bakala ya kukonda kifu yina kele na mvula na yo ya ntete bonso dikabu ya mvimba ya kuyoka na Yehowa.+ Nge fwete sala yo konso suka.
14 Kumosi ti yo, nge fwete pesa konso suka ndambu mosi na kati ya bandambu sambanu ya efa bonso dikabu ya mbuma, kumosi ti ndambu mosi na kati ya bandambu tatu ya hini ya mafuta ya kumwanga na fufu ya kitoko bonso dikabu ya mbuma ya bo fwete pesa mbala na mbala na Yehowa. Yo kele nsiku ya mvula na mvula.
15 Bo fwete pesa mwana-dimeme ya bakala, dikabu ya mbuma, mpi mafuta konso suka bonso dikabu ya mvimba ya kuyoka ya bo fwete pesa mbala na mbala.’
16 “Yehowa Mfumu ya Kuluta Nene me tuba nde: ‘Kana mfumu kupesa kado mosi na konso mwana na yandi bonso dikabu, yo ta kuma kima ya bana na yandi. Yo kele kima na bo yina bo me baka na dikabu.
17 Kansi kana yandi pesa nsadi mosi na kati ya bansadi na yandi kado yina yandi me baka na dikabu na yandi, yo ta vanda ya yandi tii na mvula ya kimpwanza;+ ebuna na nima yo ta vutuka na mfumu yina. Kaka dikabu ya bana na yandi ta vanda ntangu yonso ya bo.
18 Mfumu fwete kula ve bantu na kingolo-ngolo na ntoto na bo sambu na kubaka dikabu na bo ata mosi. Yandi fwete pesa bana na yandi dikabu yina ta katuka na ntoto na yandi mosi, mpidina na kati ya bantu na mono bo lenda kula ve ata muntu mosi na ntoto na yandi.’”
19 Ebuna yandi nataka mono na nzila ya kukotila+ yina vandaka pene-pene ya kielo yina ke nataka na basuku ya kudila madia ya santu* ya banganga-nzambi, yina vandaka kutala na ndambu ya nordi,+ mpi kuna mono monaka kisika mosi na nima na ndambu ya westi.
20 Yandi tubilaka mono nde: “Yai kele kisika yina banganga-nzambi ta tokisa dikabu sambu na makambu ti dikabu sambu na disumu mpi kisika yina bo ta yoka dikabu ya mbuma,+ mpidina bo ta nata ve ata kima mosi na kibansala ya nganda mpi ta lutisa ve busantu na* bantu.”+
21 Yandi basisaka mono mpi nataka mono na kibansala ya nganda, ebuna yandi lutisaka mono na binkonko yonso iya ya kibansala, mpi mono monaka kibansala mosi na konso kinkonko ya kibansala ya nganda.
22 Na binkonko yonso iya ya kibansala, kuvandaka ti tu-bibansala ya fioti, nda na yo maboko* 40 mpi nene na yo maboko 30. Yo yonso iya vandaka nene mpi nda kiteso mosi.*
23 Kuvandaka ti mabaya* na nziunga ya tu-bibansala yina iya, mpi na nsi ya mabaya yina kuvandaka ti bisika ya bo tungaka sambu na kutokisa makabu.
24 Ebuna yandi tubilaka mono nde: “Yai kele banzo yina bansadi ya tempelo ke tokisaka kimenga yina bantu ke nataka.”+
Banoti na nsi ya lutiti
^ Tala Bangindu ya Ngika B14.
^ Tala Bangindu ya Ngika B14.
^ To “basuku ya santu.”
^ Na kisina, “ta santisa ve.”
^ Yo ke tubila maboko ya nda. Tala Bangindu ya Ngika B14.
^ To “Yo yonso iya mpi mutindu bo salaka yo na binkonko vandaka nda mpi nene kiteso mosi.”
^ To “bandonga.”
