Ezekiele 7:1-27
7 Ndinga ya Yehowa kwisilaka mono diaka nde:
2 “Kansi nge, mwana ya muntu, Yehowa Mfumu ya Kuluta Nene ke tuba na insi ya Izraele nde: ‘Nsuka! Nsuka me kwisa na binkonko yonso iya ya insi.
3 Ntangu yai nsuka me kwisila nge, ebuna mono ta wila nge makasi, mpi mono ta sambisa nge na kutadila banzila na nge mpi mono ta sambisa nge sambu na mambu na nge yonso ya nzanzi.
4 Disu na mono ta wila nge ve mawa; mono ta monisa mpi ve ntima ya mawa,+ sambu mono ta sala nde nge buka mbuma ya banzila na nge, mpi nge ta mona mpasi sambu na mambu ya mbi ya nge ke salaka.+ Ebuna beno ta zaba nde mono kele Yehowa.’+
5 “Yehowa Mfumu ya Kuluta Nene me tuba nde: ‘Tala! Mpasi, mpasi mosi ya me swaswana ti bampasi ya nkaka, ke kwisa.+
6 Nsuka ke kwisa; nsuka ta kwisa; yo ta telama* sambu na kunwanisa nge. Tala! Yo ke kwisa.
7 Ntangu na nge me lunga,* nge muntu ya ke zingaka na insi yai. Ntangu ke kwisa, kilumbu me kuma pene-pene.+ Mambu me kuma kisaka-saka na zulu ya bangumba, kansi milolo ya kiese kele ve.
8 “‘Kubika fioti kibeni, mono ta monisila nge nganzi na mono+ mpi mono ta wila nge makasi kibeni,+ mpi mono ta sambisa nge na kutadila banzila na nge mpi mono ta sambisa nge sambu na mambu na nge yonso ya nzanzi.
9 Disu na mono ta wa ve mawa; mono ta monisa mpi ve ntima ya mawa.+ Mono ta sala nde nge buka mbuma ya banzila na nge, mpi nge ta mona mpasi sambu na mambu ya mbi ya nge ke salaka. Ebuna beno ta zaba nde mono, Yehowa, muntu ke bula beno.+
10 “‘Tala kilumbu! Tala yo ke kwisa!+ Ntangu na nge me lunga;* nti me basisa bintuntu mpi lulendo me basisa matiti.
11 Nku me kuma mingi mpi yo me kuma nti ya mambu ya mbi.+ Ata kima mosi ve ta guluka, yo vanda bo, kimvwama na bo, bimvuka na bo ya bantu, to lukumu na bo.
12 Ntangu ta lunga, kilumbu ta kwisa. Bika nde muntu ya ke sumba kusepela ve, mpi bika nde muntu ya ke teka kuwa ve mawa, sambu Nzambi me wila kimvuka na bo yonso ya bantu makasi.*+
13 Sambu muntu yina ke teka ta vutukila ve kima yina yandi tekaka, ata bo bika yandi na luzingu, sambu mbona-meso kele sambu na bantu yonso. Ata muntu mosi ve ta vutuka, mpi ata muntu mosi ve ta tanina luzingu na yandi sambu na kifu na yandi.*
14 “‘Bo me bula mpungi,+ mpi konso muntu me yilama, kansi ata muntu mosi ve ke kwenda na bitumba, sambu mono me wila bantu yonso makasi.+
15 Mbele ya bitumba kele na nganda,+ kipupa mpi nzala kele na kati. Konso muntu yina kele na nseke ta fwa na mbele ya bitumba, mpi nzala ti kipupa ta fwa bantu yina kele na kati ya mbanza.+
16 Bantu na bo yina ta guluka, bayina ta nunga na kutina, bo ta kwenda na bangumba, mpi bonso bapizio ya miwanda, konso muntu ta dila sambu na kifu na yandi.+
17 Maboko na bo yonso ta kuma pete-pete mpi ta lela, mpi mabolongo na bo yonso ta nokisa masa mingi.*+
18 Bo me lwata basaki,+ mpi matekita me simba* bo. Konso muntu ta wa nsoni, mpi konso ntu ta kuma ti dibandi.*+
19 “‘Bo ta losa arza na bo na babala-bala, mpi wolo na bo ta kuma kima ya mbi kibeni na meso na bo. Ata arza na bo to wolo na bo ta kuka ve kugulusa bo na kilumbu ya makasi ya Yehowa.+ Bo* ta fuluka ve, bo ta fulusa mpi ve mavumu na bo, sambu yo* me kuma kima ya ke budisa sakuba yina ke nata bo na kusala kifu.
20 Bo tulaka lulendo na kitoko ya bima na bo ya ke kumisaka nitu kitoko, mpi bo sadilaka yo* sambu na kusala bifwanisu na bo ya mbi, biteki na bo ya nzanzi.+ Yo yina mono ta kumisa yo kima mosi ya mbi kibeni sambu na bo.
21 Mono ta pesa yo* na maboko ya banzenza sambu bo yiba yo mpi na bantu ya mbi ya ntoto sambu bo botula yo, ebuna bo ta vweza yo.
22 “‘Mono ta katula luse na mono na ndambu na bo,+ mpi bo ta vweza kisika na mono ya kubumbana,* ebuna miyibi ta kotila yo mpi ta vweza yo.+
23 “‘Sala muniololo,*+ sambu insi me fuluka ti lusambisu+ ya kele ti batashe ya menga mpi mbanza me fuluka ti nku.+
24 Mono ta kwisa kunata makanda ya kuluta mbi,+ ebuna bo ta baka banzo na bo,+ mpi mono ta sukisa lulendo ya bantu ya ngolo, mpi bo ta vweza bisika na bo ya santu.+
25 Ntangu mpasi na bo ta kwisa, bo ta sosa ngemba kansi yo ta vanda ve.+
26 Mpasi ta kwisa na zulu ya mpasi mpi nsangu mosi na nima ya nsangu ya nkaka, ebuna bantu ta sosa mbona-meso na mbikudi mosi,+ kansi nsiku* ta vila na nganga-nzambi mpi ndongisila ta vila na bankuluntu.+
27 Ntotila ta vanda na mawa,+ mfumu ta konda kivuvu,* mpi maboko ya bantu ya insi ta tekita na boma. Mono ta sadila bo mambu na kutadila banzila na bo, mpi mono ta sambisa bo mutindu bo sambisaka. Ebuna bo ta zaba nde mono kele Yehowa.’”+
Banoti na nsi ya lutiti
^ Na kisina, “ta telama na mpongi.”
^ To mbala ya nkaka, “Mpu ya bintuntu me kwisa.”
^ To mbala ya nkaka, “Mpu ya bintuntu me kwisa.”
^ Disongidila, yo vanda bantu yina ke sumba ntoto to bantu yina ke teka yo, ata muntu mosi ve ta bakila yo mambote, sambu bo yonso ta fwa.
^ To mbala ya nkaka, “na kifu na bo.”
^ Disongidila, bo ta suba sambu na boma.
^ Disongidila, bo ta zenga nsuki ya ntu na bo sambu na mawa.
^ Na kisina, “me fika.”
^ To “Mioyo na bo.”
^ Disongidila, arza na bo mpi wolo na bo.
^ Disongidila, bima na bo ya wolo mpi ya arza.
^ Disongidila, arza na bo mpi wolo na bo yina bo sadilaka sambu na kusala biteki.
^ Yo ke monana bonso nde yo ke tubila kitini ya kati ya kisika ya santu ya Yehowa.
^ Disongidila, miniololo ya kimpika.
^ To “malongi.”
^ To “ta wa boma ya ngolo.”
