Kulonga 27:1-26
27 Ebuna Moize kumosi ti bankuluntu ya Izraele songaka bantu nde: “Beno zitisa konso nsiku yina mono ke pesa beno bubu yai.
2 Na kilumbu yina beno ta sabuka Yordani sambu na kukota na insi yina Yehowa Nzambi na nge ke pesa nge, tulula matadi ya nene sambu na nge mosi mpi fika yo mpemba.*+
3 Na nima, sonika na zulu na yo bangogo yonso ya Nsiku yai ntangu nge ta sabuka, na mpila nde nge kota na insi yina Yehowa Nzambi na nge ke pesa nge, insi yina miliki* ti bwiki kele mingi, kaka mutindu Yehowa, Nzambi ya ba-nkaka na nge, silaka nge.+
4 Ntangu beno ta sabuka Yordani, beno fwete tulula matadi yai na Ngumba ya Ebale+ mpi kufika yo mpemba,* kaka mutindu mono ke songa beno bubu yai.
5 Nge fwete tunga mpi mesa-kimenga kuna sambu na Yehowa Nzambi na nge, mesa-kimenga ya matadi. Nge fwete sadila ve bisadilu ya bibende na zulu na yo.+
6 Nge fwete tunga mesa-kimenga ya Yehowa Nzambi na nge ti matadi ya mvimba mpi kupesa makabu ya kuyoka na Yehowa Nzambi na nge na zulu na yo.
7 Nge fwete pesa bimenga ya kinduku+ mpi kudia yo kuna,+ ebuna nge ta vanda na kiese na ntwala ya Yehowa Nzambi na nge.+
8 Sonika bangogo yonso ya Nsiku yai na mutindu ya pwelele na zulu ya matadi yina.”+
9 Ebuna Moize mpi banganga-nzambi yina kele Balevi tubilaka bantu yonso ya Izraele nde: “O Izraele, vanda pima mpi wa. Bubu yai beno me kuma bantu ya Yehowa Nzambi na beno.+
10 Nge fwete wa ndinga ya Yehowa Nzambi na nge mpi kuzitisa bantuma na yandi+ mpi bansiku na yandi yina mono ke pesa nge bubu yai.”
11 Na kilumbu yina, Moize songaka bantu nde:
12 “Makanda yai ke landa ta telama na zulu ya Ngumba ya Gerizimi+ sambu na kusakumuna bantu kana beno me sabuka Yordani: Simeoni, Levi, Yuda, Isakare, Yozefi, mpi Benyamini.
13 Mpi makanda yai ke landa ta telama na zulu ya Ngumba ya Ebale+ sambu na kusinga: Rubeni, Gadi, Asere, Zebuloni, Dani, mpi Naftali.
14 Ebuna Balevi ta pesa muntu yonso ya Izraele mvutu na ndinga ya ngolo+ nde:
15 “‘Bo fwete singa muntu yina ke sala kiteki ya kibende*+ to kiteki ya nkaka,+ kima ya nzanzi na meso ya Yehowa,+ kisalu ya me salama na maboko ya muntu ya ke salaka kisalu ya maboko,* mpi muntu yina me bumba yo.’ (Ebuna bantu yonso ta vutula nde, ‘Amen!’*)
16 “‘Bo fwete singa muntu yina ke zitisa ve tata na yandi to mama na yandi.’+ (Ebuna bantu yonso ta tuba nde, ‘Amen!’)
17 “‘Bo fwete singa muntu yina ke soba kidimbu ya ndilu+ ya nkweno na yandi.’ (Ebuna bantu yonso ta tuba nde, ‘Amen!’)
18 “‘Bo fwete singa muntu yina ke vidisa kifwa-meso nzila.’+ (Ebuna bantu yonso ta tuba nde, ‘Amen!’)
19 “‘Bo fwete singa muntu yina ke sambisa mambu+ ya munzenza, ya mwana ya me konda tata,* to ya mufwidi ya nkento+ na mutindu ya mbi.’ (Ebuna bantu yonso ta tuba nde, ‘Amen!’)
20 “‘Bo fwete singa muntu yina ke lala ti nkento ya tata na yandi, sambu yandi me katula tata na yandi lukumu.’*+ (Ebuna bantu yonso ta tuba nde, ‘Amen!’)
21 “‘Bo fwete singa muntu yina ke lala ti konso mbisi yina.’+ (Ebuna bantu yonso ta tuba nde, ‘Amen!’)
22 “‘Bo fwete singa muntu yina ke lala ti mpangi na yandi ya nkento, mwana ya tata na yandi to mwana ya mama na yandi.’+ (Ebuna bantu yonso ta tuba nde, ‘Amen!’)
23 “‘Bo fwete singa muntu yina ke lala ti bokilo na yandi ya nkento.’+ (Ebuna bantu yonso ta tuba nde, ‘Amen!’)
24 “‘Bo fwete singa muntu yina ke bumbana sambu na kubasikila nkweno na yandi sambu na kufwa yandi.’+ (Ebuna bantu yonso ta tuba nde, ‘Amen!’)
25 “‘Bo fwete singa muntu yina ke ndima avoka sambu na kufwa* muntu yina me sala mbi ve.’*+ (Ebuna bantu yonso ta tuba nde, ‘Amen!’)
26 “‘Bo fwete singa muntu yina ta zitisa ve mambu ya Nsiku yai mpi ta lungisa yo ve.’+ (Ebuna bantu yonso ta tuba nde, ‘Amen!’)
Banoti na nsi ya lutiti
^ To “pakula yo mukubu ya mpembe.”
^ To “mabele.”
^ To “kupakula yo mukubu ya mpembe.”
^ To “Yo vanda mutindu yina!”
^ To “muntu ya ke salaka kisalu ya mabaya mpi ya bibende.”
^ To “kiteki ya kibende ya bo me lamba na tiya.”
^ To “mwana-nsiona.”
^ Na kisina, “me mona nsongi ya lele ya tata na yandi.”
^ To “kubwisa.”
^ To “moyo ya menga ya muntu yina me sala mbi ve.”
