Kulonga 3:1-29
3 “Na nima, beto balukaka mpi tombukaka na nzila ya Bashani. Ebuna Ogi, ntotila ya Bashani, basikaka ti bantu na yandi yonso sambu na kunwanisa beto na Edrei.+
2 Yo yina Yehowa tubilaka mono nde, ‘Kuwa yandi boma ve, sambu mono ta pesa yandi, bantu na yandi yonso, mpi insi na yandi na maboko na nge; mpi nge ta sala yandi kaka mutindu nge salaka Sihoni, ntotila ya bantu ya Amore, yina vandaka kuzinga na Eshboni.’
3 Ebuna Yehowa Nzambi na beto pesaka mpi Ogi ntotila ya Bashani ti bantu na yandi yonso na maboko na beto, mpi beto fwaka bo tii kuna ata muntu mosi ve na kati ya bantu na yandi gulukaka.
4 Na nima, beto botulaka bambanza na yandi yonso. Kuvandaka ve ata ti bwala mosi ya beto bakaka ve na bo—bambanza 60, ntoto ya mvimba ya Argobi, kimfumu ya Ogi na Bashani.+
5 Bambanza yai yonso vandaka ya kutanina ti bibaka ya nda, bakielo mpi banti ya mabaya, kumosi ti babwala mingi yina vandaka ve na bibaka.
6 Kansi, beto fwaka yo,+ kaka mutindu beto salaka Sihoni ntotila ya Eshboni, ntangu beto fwaka konso mbanza, ti babakala, bankento mpi bana.+
7 Ebuna beto bakaka bitwisi yonso mpi bima ya beto botulaka na bambanza.
8 Na ntangu yina, beto botulaka insi ya bantotila yina zole ya bantu ya Amore+ yina vandaka pene-pene ya Yordani, katuka na Muwanda ya Arnoni tii na Ngumba ya Ermoni+
9 (ngumba yina bantu ya Sidoni vandaka kubinga Sirioni, mpi yina bantu ya Amore vandaka kubinga Senire),
10 bambanza yonso yina vandaka na zulu ya ngumba, Gileadi ya mvimba, mpi Bashani ya mvimba tii na Saleka mpi na Edrei,+ bambanza ya kimfumu yina vandaka ya Ogi na Bashani.
11 Sambu Ogi, ntotila ya Bashani, vandaka muntu ya nsuka yina bikalaka na dikanda ya Refayimi. Mbeto yina bo tulaka mvumbi na yandi* bo salaka yo na kibende,* mpi yo kele kaka na Raba ya bantu ya Amoni tii bubu yai. Nda na yo vandaka maboko* uvwa, nene na yo maboko iya, na kutadila diboko yina bo ke sadilaka.
12 Na ntangu yina, beto bakaka insi yai: katuka na Aroere,+ yina kele pene-pene ya Muwanda ya Arnoni, mpi kati-kati ya ntoto ya bangumba ya Gileadi, mpi mono me pesa bambanza na yo na bana ya Rubeni mpi na bana ya Gadi.+
13 Ndambu ya ntoto ya Gileadi yina bikalaka mpi Bashani ya mvimba ya kimfumu ya Ogi, mono me pesa yo na ndambu ya dikanda ya Manase.+ Ntoto yonso ya Argobi, yina kele ya Bashani, zabanaka bonso insi ya bantu ya Refayimi.
14 “Yaire+ mwana ya Manase bakaka ntoto yonso ya Argobi+ tii na ndilu ya bantu ya Geshure ti ya bantu ya Maakati,+ mpi yandi pesaka babwala yina ya Bashani zina na yandi, Avoti-yaire,*+ tii bubu yai.
15 Mono me pesa Gileadi na Makire.+
16 Na bana ya Rubeni ti ya Gadi,+ mono me pesa ntoto yina ke yantika na Gileadi tii na Muwanda ya Arnoni, yina ndilu na yo kele kati-kati ya muwanda, mpi tii na Yaboki, muwanda yina kele ndilu ya bantu ya Amoni,
17 mpi Araba, Yordani, ti ndilu, katuka na Kinereti tii na Nzadi-Mungwa ya Araba, Nzadi ya Mungwa,* na nsi ya tu-bangumba ya Pisga na ndambu ya esti.+
18 “Ebuna mono songaka beno nde: ‘Yehowa Nzambi na beno me pesa beno insi yai sambu beno baka yo. Babakala na beno yonso ya kikesa ta baka minduki mpi ta sabuka na ntwala ya bampangi na beno, bantu ya Izraele.+
19 Kaka bankento na beno, bana na beno, mpi bitwisi na beno (mono me zaba mbote nde beno kele na bitwisi mingi) bantu ta landa kuzinga na bambanza yina mono me pesa beno,
20 tii kuna Yehowa ta pesa bampangi na beno ngemba, mutindu yandi me sala sambu na beno, ebuna bo mpi bo baka ntoto yina Yehowa Nzambi na beno ta pesa bo na simu ya Yordani. Na nima, beno ta kwisa kuvutuka, konso muntu na ntoto na yandi yina mono me pesa beno.’+
21 “Na ntangu yina, mono songaka Yozue+ nde: ‘Nge me mona na meso na nge mosi mambu yina Yehowa Nzambi na nge me sala na bantotila yai zole. Yehowa ta sala mutindu mosi na bimfumu yonso yina nge ta luta.+
22 Beno fwete wa bo boma ve, sambu Yehowa Nzambi na beno Muntu ke nwana sambu na beno.’+
23 “Na ntangu yina, mono bondilaka Yehowa nde,
24 ‘O Yehowa Mfumu ya Kuluta Nene, nge me yantika kumonisa nsadi na nge bunene na nge mpi diboko na nge ya ngolo,+ sambu nki nzambi, na zulu to na ntoto, ke salaka bisalu ya nene ya mutindu yai bonso nge?+
25 Pardo bika mono luta mpi mono mona insi ya mbote yina kele na simu ya Yordani, ntoto ya bangumba yai ya mbote mpi Libani.’+
26 Kansi Yehowa landaka kuwila mono makasi ya ngolo sambu na beno+ mpi yandi vandaka kuwila mono ve. Nkutu, Yehowa tubilaka mono nde, ‘Yo me lunga! Kutubila mono diaka ve ata fioti diambu yai.
27 Tombuka na nsongi ya Pisga+ mpi tala na westi, na nordi, na sudi mpi na esti, ebuna tala insi yina na meso, sambu nge ta sabuka ve Yordani+ yai.
28 Pesa Yozue+ kisalu, pesa yandi kikesa mpi pesa yandi ngolo, sambu yandi muntu ta sabuka+ na ntwala ya bantu yai mpi yandi muntu ta twadisa bo na kubaka insi yina nge ta mona.’
29 Mambu yai yonso salamaka ntangu beto vandaka kuzinga na muwanda yina kele na ntwala ya Bete-peore.+
Banoti na nsi ya lutiti
^ To “Sanduku na yandi ya ditadi; Sanduku na yandi.”
^ To mbala ya nkaka, “ditadi ya ndombe ya bo ke bingaka bazalte.”
^ Diboko mosi kele basantimetre 44,5. Tala Bangindu ya Ngika B14.
^ Yo ke tendula “Babwala ya Batenta ya Yaire.”
^ Disongidila, Nzadi-Mungwa ya Kufwa.
