Kulonga 31:1-30
31 Ebuna Moize basikaka mpi tubaka mambu yai na Izraele ya mvimba,
2 yandi tubilaka bo nde: “Mono kele ti bamvula 120 bubu yai.+ Mono lenda twadisa nge diaka ve,* sambu Yehowa me tubila mono nde, ‘Nge ta sabuka ve Yordani yai.’+
3 Yehowa Nzambi na nge muntu ke sabuka na ntwala na nge, mpi yandi mosi muntu ta manisa makanda yai na ntwala na nge, ebuna nge ta kula bo.+ Yozue muntu ta twadisa nge ntangu nge ta sabuka,+ kaka mutindu Yehowa tubaka.
4 Yehowa ta sala bo kaka mutindu yandi salaka Sihoni+ mpi Ogi,+ bantotila ya bantu ya Amore, mpi mutindu yandi salaka insi na bo ntangu yandi manisaka bo.+
5 Yehowa ta bedisa bo sambu na beno, mpi beno fwete sadila bo mambu na kuwakana ti nsiku yonso yina mono me pesa beno.+
6 Beno vanda kikesa mpi ngolo.+ Beno wa boma ve mpi beno tekita ve na boma na ntwala na bo,+ sambu Yehowa Nzambi na nge muntu ke tambula ti nge. Yandi ta bikisa nge ve mpi ta yambula nge ve.”+
7 Ebuna Moize bingaka Yozue mpi tubilaka yandi na meso ya Izraele ya mvimba nde: “Vanda kikesa mpi ngolo,+ sambu nge muntu ta kotisa bantu yai na insi yina Yehowa zengaka kieleka na ba-nkaka na bo sambu na kupesa bo, mpi nge ta pesa bo yo bonso dikabu.+
8 Yehowa muntu ke tambula na ntwala na nge, mpi yandi ta landa kuvanda ti nge.+ Yandi ta bikisa nge ve mpi ta yambula nge ve. Kuwa boma ve mpi kutekita ve.”+
9 Ebuna Moize sonikaka Nsiku yai+ mpi pesaka yo na banganga-nzambi, Balevi, yina ke nataka sanduku ya kuwakana ya Yehowa, mpi na bankuluntu yonso ya Izraele.
10 Moize songaka bo nde: “Na nsuka ya konso bamvula nsambwadi, na ntangu na yo na mvula ya kuyambula kulomba mfuka,+ na nsungi ya Nkinsi ya Bisasa,*+
11 ntangu Izraele ya mvimba ke kwisa na ntwala ya Yehowa+ Nzambi na nge na kisika yina yandi ke sola, nge fwete tanga Nsiku yai sambu nde Izraele ya mvimba kuwa yo.+
12 Vukisa bantu,+ babakala, bankento, bana,* mpi munzenza yina kele na kati ya bambanza* na nge, na mpila nde bo widikila, bo longuka, mpi bo wa Yehowa Nzambi na beno boma mpi bo sala yonso sambu na kuzitisa mambu yonso ya Nsiku yai.
13 Ebuna bana na bo yina zabaka ve Nsiku yai ta widikila+ mpi ta longuka na kuwa Yehowa Nzambi na beno boma bilumbu yonso yina beno ta zinga na insi yina beno ke sabuka Yordani sambu na kubaka.”+
14 Ebuna Yehowa tubilaka Moize nde: “Tala! Ntangu ya lufwa+ na nge me finama. Binga Yozue, mpi beno kwenda na tenta ya lukutakanu, sambu mono pesa yandi kisalu.”+ Yo yina Moize ti Yozue kwendaka na tenta ya lukutakanu.
15 Ebuna Yehowa monikaka na tenta na kati ya dikunzi ya dituti, mpi dikunzi ya dituti telamaka na munoko ya tenta.+
16 Ntangu yai Yehowa tubilaka Moize nde: “Tala! Kubika fioti nge ta fwa,* ebuna bantu yai ta yantika kusala kindumba ya kimpeve ti banzambi ya banzenza yina kele na nziunga na bo na insi yina bo ke kwenda.+ Bo ta yambula mono+ mpi ta fwa kuwakana yina mono salaka ti bo.+
17 Na ntangu yina, mono ta wila bo makasi,+ ebuna mono ta yambula bo+ mpi ta bumbila bo luse na mono+ tii kuna bo ta fwa. Ebuna na nima ya bampasi mingi mpi ya mambu mingi ya mawa yina ta bwila bo,+ bo ta tuba nde, ‘Keti yo kele ve sambu Nzambi na beto kele ve na kati na beto yo yina bampasi yai me bwila beto?’+
18 Kansi mono ta landa kubumba luse na mono na kilumbu yina sambu na mambu yonso ya mbi yina bo me sala mutindu bo me kwenda na banzambi ya nkaka.+
19 “Ntangu yai, beno sonika nkunga yai sambu na beno mosi+ mpi longa yo bantu ya Izraele.+ Songa bo bo longuka yo* na mpila nde nkunga yai kuvanda bonso mbangi na mono sambu na bantu ya Izraele.+
20 Ntangu mono ta nata bo na insi yina mono diaka ndefi na ba-nkaka na bo+—insi yina mabele ti bwiki kele mingi+—ebuna bo dia tii bo fuluka mpi bo toma,*+ bo ta kwenda na banzambi ya nkaka ebuna bo ta sambila bo mpi ta sadila mono mambu kukonda luzitu mpi ta fwa kuwakana na mono.+
21 Ntangu mambu mingi ya mpasi mpi ya ke pesa mawa ta bwila bo,+ nkunga yai ta vanda bonso mbangi sambu na bo (sambu bana na bo fwete vila yo ve), sambu mono me zaba dezia kikalulu yina bo me yedisaka,+ na ntwala nkutu nde mono kotisa bo na insi yina mono diaka ndefi.”
22 Ebuna Moize sonikaka nkunga yai kilumbu yina mpi longaka yo na bantu ya Izraele.
23 Ebuna yandi* pesaka Yozue+ mwana ya Nuni kisalu mpi tubaka nde: “Vanda kikesa mpi ngolo,+ sambu nge muntu ta kotisa bantu ya Izraele na insi yina mono zengaka kieleka+ na kupesa bo, mpi mono ta landa kuvanda ti nge.”
24 Ntangu Moize manisaka kusonika mambu yonso+ ya Nsiku yai na mukanda mosi,
25 Moize songaka Balevi yina ke nataka sanduku ya kuwakana ya Yehowa nde:
26 “Beno baka mukanda yai ya Nsiku+ mpi beno tula yo na lweka ya sanduku+ ya kuwakana ya Yehowa Nzambi na beno, mpi yo ta vanda mbangi na nge kuna.
27 Sambu mono mosi me zaba mbote nde nge kele nkolami+ mpi ntu-ngolo.*+ Kana beno ke kolama kibeni na Yehowa awa ya mono kele ntete na luzingu ti beno, ntembe kele ve nde beno ta kolama diaka ngolo na nima ya lufwa na mono!
28 Beno vukisa na ntwala na mono bankuluntu yonso ya makanda na beno mpi bakapita na beno, ebuna bika nde mono tuba mambu yai na makutu na bo, mpi bika nde mono baka zulu mpi ntoto bonso bambangi sambu na bo.+
29 Sambu mono me zaba mbote nde na nima ya lufwa na mono, beno ta sala kibeni mambu ya mbi+ mpi beno ta yambula nzila yina mono me songa beno. Ebuna bampasi ta bwila beno kibeni+ na nsuka ya bilumbu, sambu beno ta sala mambu ya mbi na meso ya Yehowa mpi beno ta pesa yandi makasi na bisalu ya maboko na beno.”
30 Ebuna Moize tubaka na ndinga ya ngolo bangogo ya nkunga yai katuka luyantiku tii na nsuka na makutu ya dibundu ya mvimba ya Izraele:+
Banoti na nsi ya lutiti
^ Na kisina, “basika diaka ve mpi kukota diaka ve.”
^ To “Bisika ya Kuzinga ya Ntangu Fioti.”
^ Na kisina, “bana ya fioti.”
^ Na kisina, “bakielo.”
^ Na kisina, “ta lala ti batata na nge.”
^ Na kisina, “Tula yo na minoko na bo.”
^ Na kisina, “kuma mafuta-mafuta.”
^ Yo ke monana nde yo kele Nzambi.
^ Na kisina, “nkingu ngolo.”
