Kusonga 5:1-14
5 Na diboko ya kitata ya Muntu yina me vanda na kiti ya kimfumu,+ mono monaka rulo mosi ya bo me sonika na bandambu yonso zole,* mpi ya bo me kanga ti bidimbu nsambwadi.
2 Mpi mono monaka wanzio mosi ya ngolo ke tuba na ndinga ya ngolo nde: “Nani me fwana na kukangula rulo mpi na kupasula bidimbu na yo?”
3 Kansi, ata muntu mosi ve na zulu, to na ntoto, to na nsi ya ntoto lungaka kukangula rulo yina to kutala yo na kati.
4 Mono dilaka mingi sambu ata muntu mosi ve monanaka nde yandi me fwana na kukangula rulo to na kutala yo na kati.
5 Kansi nkuluntu mosi tubilaka mono nde: “Bika kudila. Tala, Ntambu ya dikanda ya Yuda,+ musisa+ ya Davidi,+ me nungaka,+ yo yina yandi me fwana na kukangula rulo yina ti bidimbu na yo nsambwadi.”
6 Na kati-kati ya kiti ya kimfumu mpi ya bigangwa iya ya moyo mpi na kati-kati ya bankuluntu,+ mono monaka mwana-dimeme+ me telama, yina monanaka bonso nde bo me fwa yandi,+ yandi vandaka ti bibongo nsambwadi mpi meso nsambwadi, ebuna meso yina ke monisa bampeve nsambwadi ya Nzambi+ yina yandi tindaka na ntoto ya mvimba.
7 Yandi kwendaka mpi na mbala mosi yandi bakaka yo na diboko ya kitata ya Muntu yina me vanda na kiti ya kimfumu.+
8 Ntangu yandi bakaka rulo yina, bigangwa iya ya moyo mpi bankuluntu 24+ fukamaka na ntwala ya Mwana-Dimeme, mpi konso muntu vandaka ti kidare mpi malonga ya wolo ya kufuluka ti ndumbu. (Ndumbu ke monisa bisambu ya basantu.)+
9 Mpi bo ke yimba nkunga ya mpa+ nde: “Nge me fwana na kubaka rulo mpi na kukangula bidimbu na yo, sambu bo fwaka nge, mpi ti menga na nge, nge sumbaka bantu ya mabuta yonso, ya bandinga yonso, ya bansi yonso, mpi ya makanda yonso+ sambu na Nzambi,+
10 mpi nge kumisaka bo kimfumu+ mpi banganga-nzambi sambu na Nzambi na beto,+ mpi bo fwete yala bonso bantotila+ na ntoto.”
11 Mono monaka, mpi mono waka ndinga ya bawanzio mingi na nziunga ya kiti ya kimfumu mpi ya bigangwa ya moyo mpi ya bankuluntu, mpi ntalu na bo vandaka bamiriade ya bamiriade* mpi mafunda ya mafunda,+
12 ebuna bo vandaka kutuba na ndinga ya ngolo nde: “Mwana-Dimeme yina bo fwaka+ me fwana na kubaka kiyeka, bimvwama, mayele, ngolo, lukumu, nkembo, mpi lusakumunu.”+
13 Mpi mono waka bigangwa yonso yina kele na zulu, na ntoto, na nsi ya ntoto,+ ti na nzadi-mungwa, mpi bima yonso yina kele na kati na yo, ke tuba nde: “Lusakumunu, lukumu,+ nkembo, mpi ngolo kuvanda mvula na mvula+ na Muntu yina me vanda na kiti ya kimfumu+ mpi na Mwana-Dimeme.”+
14 Bigangwa iya ya moyo vandaka kutuba nde: “Amen!” ebuna bankuluntu fukamaka mpi sambilaka.
Banoti na nsi ya lutiti
^ Na kisina, “na ntwala mpi na nima.”
^ To “makumi ya mafunda mbala makumi ya mafunda.”
