Kusonga 6:1-17
-
Mwana-Dimeme me kangula bidimbu sambanu ya ntete (1-17)
-
Muntu ya ke nunga me vanda na zulu mpunda ya mpembe (1, 2)
-
Muntu ya ke tambusa mpunda ya mbwaki ke katula ngemba (3, 4)
-
Muntu ya ke tambusa mpunda ya ndombe ke nata nzala (5, 6)
-
Muntu ya ke tambusa mpunda ya kunzuluka, zina na yandi Lufwa (7, 8)
-
Bantu ya bo fwaka kele na nsi ya mesa-kimenga (9-11)
-
Kunikana ya ngolo ya ntoto (12-17)
-
6 Mono monaka ntangu Mwana-Dimeme+ kangulaka kidimbu mosi na kati ya bidimbu nsambwadi,+ mpi mono waka kigangwa mosi na kati ya bigangwa iya ya moyo+ ke tuba na ndinga bonso makelele ya nzasi nde: “Kwisa!”
2 Mono talaka mpi mono monaka mpunda mosi ya mpembe;+ muntu yina vandaka na zulu na yo vandaka ti munduki ya tolo-tolo; mpi bo pesaka yandi mpu ya kimfumu,+ ebuna yandi basikaka sambu na kununga mpi kununga tii na nsuka.+
3 Ntangu yandi kangulaka kidimbu ya zole, mono waka kigangwa ya moyo ya zole+ ke tuba nde: “Kwisa!”
4 Mpunda ya nkaka basikaka, yo vandaka ya mbwaki; bo pesaka muntu yina vandaka na zulu na yo kiyeka ya kukatula ngemba na ntoto sambu bantu kufwisana; mpi bo pesaka yandi mbele mosi ya nene ya bitumba.+
5 Ntangu yandi kangulaka kidimbu ya tatu,+ mono waka kigangwa ya moyo ya tatu+ ke tuba nde: “Kwisa!” Mono talaka mpi mono monaka mpunda mosi ya ndombe; muntu yina vandaka na zulu na yo vandaka ti kilo na maboko na yandi.
6 Mono waka bonso ndinga mosi ke katuka na kati ya bigangwa iya ya moyo ke tuba nde: “Kilo mosi ya ble sambu na denari*+ mosi, mpi bakilo tatu ya orze sambu na denari mosi; mpi kubebisa ve mafuta ya olive ti vinu.”+
7 Ntangu yandi kangulaka kidimbu ya iya, mono waka ndinga ya kigangwa ya moyo ya iya+ ke tuba nde: “Kwisa!”
8 Mono talaka mpi mono monaka mpunda mosi ya kunzuluka; muntu yina vandaka na zulu na yo, zina na yandi Lufwa. Maziamu* vandaka kulanda yandi na nima kibeni. Bo pesaka bo kiyeka na zulu ya ndambu mosi na kati ya bandambu iya ya ntoto, sambu na kufwa bantu na mbele mosi ya nda ya bitumba, na nzala,+ na maladi ya ke fwaka, mpi na bambisi ya mfinda.+
9 Ntangu yandi kangulaka kidimbu ya tanu, mono monaka na nsi ya mesa-kimenga+ mioyo*+ ya bantu yina bo fwaka sambu na ndinga ya Nzambi mpi sambu na kimbangi yina bo taka.+
10 Bo tubaka na ndinga ya ngolo nde: “Mfumu ya Me Luta Yonso, muntu ya santu mpi ya ke tubaka kieleka,+ tii nki ntangu nge ke vingila sambu na kusambisa mpi kuvutula mbi na bantu yina ke zingaka na ntoto sambu na menga na beto?”+
11 Bo pesaka konso muntu na kati na bo mvwela ya mpembe;+ bo songaka bo na kupema diaka mwa ntangu fioti, tii kuna ntalu ya banduku na bo bampika mpi ya bampangi na bo yina bo zolaka kufwa bonso bo ta lunga.+
12 Mono monaka ntangu yandi kangulaka kidimbu ya sambanu, mpi ntoto nikanaka ngolo; ebuna ntangu kumaka ndombe bonso saki ya bo me sala na mika,* mpi ngonda ya mvimba kumaka bonso menga,+
13 ebuna bambwetete ya zulu bwaka na ntoto, bonso ntangu nti ya bafige ke bwisaka bafige na yo ya mubisu kana mupepe ya ngolo me nikisa yo.
14 Mpi zulu katukaka bonso rulo yina bo ke kanga,+ ebuna bangumba yonso ti bisanga yonso katukaka na bisika na yo.+
15 Bantotila ya ntoto, bamfumu ya nene, bakomanda ya basoda, bamvwama, bantu ya ngolo, bampika yonso, mpi bantu yonso ya kele na kimpwanza bumbanaka na mabulu ya matadi mpi na kati ya matadi ya bangumba.+
16 Mpi bo ke landa kutubila bangumba mpi matadi nde: “Beno bwila beto+ mpi beno bumba beto na ntwala ya luse ya Muntu yina me vanda na kiti ya kimfumu+ mpi na makasi ya Mwana-Dimeme,+
17 sambu kilumbu ya nene ya makasi na bo me kwisa,+ ebuna nani lenda telama?”+
Banoti na nsi ya lutiti
^ Mbongo ya kibende ya Baroma yina me fwanana ti lufutu ya kilumbu ya mvimba. Tala Bangindu ya Ngika B14.
^ To “Hadesi,” disongidila, maziamu ya bantu yonso. Tala Bantendula ya Bangogo.
^ Yo ke monana bonso nde yo ke tubila menga na bo yina bo tiamunaka na mesa-kimenga. Tala Bantendula ya Bangogo.
^ Mbala ya nkaka mika ya nkombo.
