Kusonga 9:1-21
9 Wanzio ya tanu bulaka mpungi.+ Ebuna mono monaka mbwetete mosi ke katuka na zulu mpi ke kwisa kubwa na ntoto, mpi bo pesaka yandi nsapi ya dibulu ya nda.+
2 Yandi kangulaka dibulu ya nda, mpi midinga basikaka na dibulu bonso midinga ya fulu mosi ya nene, ebuna ntangu mpi mupepe kumaka mpimpa+ sambu na midinga ya dibulu yina.
3 Bampasu basikaka na midinga yina mpi bo kwisaka na ntoto;+ mpi bo pesaka bo kiyeka bonso kiyeka yina bankutu* ya ntoto ke vandaka na yo.
4 Bo songaka bo na kusala ve mbi na matiti ya ntoto, na konso kimenina, to na konso nti, kansi na kusala mbi kaka na bantu yina kele ve ti kidimbu ya Nzambi na bambunzu na bo.+
5 Bo pesaka ve bampasu kiyeka ya kufwa bantu, kansi bo pesaka bo kiyeka ya kumonisa bo mpasi bangonda tanu, mpi mpasi yina bo vandaka kumonisa bantu vandaka bonso mpasi yina nkutu*+ ke pesaka kana yo tatika muntu.
6 Na bilumbu yina, bantu ta sosa lufwa kansi bo ta mona yo ve ata fioti, mpi bo ta zola kufwa, kansi lufwa ta tina bo.
7 Bampasu yina vandaka kumonika bonso bampunda ya me yilama sambu na bitumba;+ mpi na ba-ntu na bo kuvandaka ti bima yina vandaka kumonika bonso bampu ya kimfumu ya wolo, mpi baluse na bo vandaka bonso baluse ya bantu,
8 kansi nsuki na bo vandaka bonso nsuki ya bankento. Meno na bo vandaka bonso meno ya bantambu,+
9 bo vandaka ti bitaninu-ntulu bonso bitaninu-ntulu ya bibende. Makelele ya mapapu na bo vandaka bonso makelele ya bapusu-pusu yina bampunda ke bendaka, yina ke kwenda ntinu na bitumba.+
10 Diaka, bo kele ti mikila mpi bantunga bonso bankutu,* mpi kiyeka na bo ya kumonisa bantu mpasi bangonda tanu kele na mikila na bo.+
11 Bo kele ti ntotila, wanzio ya dibulu ya nda.+ Na Kiebreo zina na yandi Abadoni,* kansi na Kigreki zina na yandi Apolioni.*
12 Mawa ya ntete me luta. Tala! Mawa zole+ ya nkaka ke kwisa na nima ya mambu yai.
13 Wanzio ya sambanu+ bulaka mpungi.+ Ebuna mono waka ndinga mosi ke basika na bibongo ya mesa-kimenga ya wolo+ yina kele na ntwala ya Nzambi,
14 mpi yo ke tubila wanzio ya sambanu, yina vandaka ti mpungi, nde: “Kangula bawanzio iya yina kele ya kukanga pene-pene na nzadi ya nene Efrate.”+
15 Ebuna yandi kangulaka bawanzio yina iya, yina yilamaka sambu na ngunga yina, kilumbu yina, ngonda yina, mpi mvula yina, sambu na kufwa ndambu mosi na kati ya bandambu tatu ya bantu.
16 Ntalu ya basoda yina ke kwendaka na zulu ya bampunda vandaka bamiriade zole ya bamiriade;* mono waka ntalu na bo.
17 Yai mutindu mono monaka bampunda na mbona-meso mpi bantu yina vandaka na zulu na bo: Bo vandaka ti bitaninu-ntulu ya mbwaki bonso tiya, ya ble bonso yasente, mpi ya zione bonso sufre; ba-ntu ya bampunda yina vandaka bonso ba-ntu ya bantambu,+ mpi tiya, midinga, ti sufre vandaka kubasika na minoko na bo.
18 Ndambu mosi na kati ya bandambu tatu ya bantu fwaka na bampasi yai tatu: tiya, midinga, mpi sufre yina vandaka kubasika na minoko na bo.
19 Sambu kiyeka ya bampunda yina kele na minoko na bo mpi na mikila na bo; sambu mikila na bo kele bonso banioka mpi yo kele ti ba-ntu, mpi bo ke sala bantu mbi na ba-ntu yina.
20 Kansi bantu yina bikalaka, bayina fwaka ve na bampasi yai balulaka ve ntima na bisalu ya maboko na bo; bo yambulaka ve kusambila bademo mpi biteki ya wolo, ya arza, ya kwivre, ya matadi, mpi ya mabaya, yina ke monaka ve, ke waka ve, mpi ke tambulaka ve.+
21 Mpi bo balulaka ve ntima na bisalu na bo ya kufwa bantu, na bisalu na bo ya bampeve ya mbi, na pite* na bo, mpi na muyibi na bo.
Banoti na nsi ya lutiti
^ To “binkala-nkala.”
^ To “kinkala-nkala.”
^ To “binkala-nkala.”
^ Yo ke tendula “Lufwa.”
^ Yo ke tendula “Muntu ya Ke Fwaka Bantu.”
^ To “20 000 fokula na 10 000,” disongidila 200 000 000.
^ Na Kigreki, por·neiʹa. Tala Bantendula ya Bangogo.
