Ruti 4:1-22
4 Ntangu yai Boazi tombukaka na kielo ya mbanza+ mpi vandaka pana. Ebuna muntu yina lenda sumba diaka yina Boazi tubilaka+ lutaka pene-pene. Yo yina Boazi tubaka nde: “Kingandi, kwisa awa mpi vanda.” Ebuna yandi kwendaka mpi vandaka.
2 Na nima Boazi bakaka bankuluntu kumi ya mbanza+ mpi tubaka nde: “Beno vanda awa.” Ebuna bo vandaka.
3 Ntangu yai Boazi tubilaka muntu yina lenda sumba diaka+ nde: “Naomi, yina me katuka na banseke ya Moabi+ mpi me kwisa kuvutuka, fwete teka bilanga yina vandaka ya mpangi na beto Elimeleki.+
4 Yo yina mono monaka nde mono fwete zabisa nge diambu yina, ‘Sumba yo na meso ya bantu ya mbanza mpi ya bankuluntu ya bantu na mono.+ Kana nge ta sumba yo diaka, sumba yo diaka. Kansi kana nge ta sumba yo diaka ve, songa mono sambu mono zaba, sambu nge kele muntu ya ntete yina kele na nswa ya kusumba yo diaka, mpi mono ke landa na nima na nge.’” Yandi vutulaka nde: “Mono me ndima kusumba yo diaka.”+
5 Ebuna Boazi tubaka nde: “Kilumbu yina nge ta sumba kilanga yina na maboko ya Naomi, nge fwete sumba yo mpi na maboko ya Ruti muntu ya Moabi, nkento ya muntu yina fwaka, sambu na kuvutula zina ya muntu yina fwaka na dikabu na yandi.”+
6 Ebuna muntu yina lenda sumba yo diaka tubaka nde: “Mono lenda sumba yo diaka ve, kana ve mono ta bebisa dikabu na mono. Nge mosi sumba yo na nswa na mono ya kusumba diaka, sambu mono lenda sumba yo diaka ve.”
7 Bo vandaka ti kikalulu ya kusala mutindu yai na Izraele na ntangu ya ntama na yina me tala nswa ya kusumba diaka mpi ya kuyingisa kima sambu na kumonisa nde mambu yonso yina bo me wakana kele ya kieleka: Muntu fwete katula sandale na yandi+ mpi kupesa yo na muntu yina ya nkaka, mpi yai mutindu bantu ya Izraele vandaka kusala sambu na kusonga nde mambu yina bo me wakana kele ya kieleka.
8 Yo yina, ntangu muntu yina tubilaka Boazi nde, “Sumba yo sambu na nge mosi,” yandi katulaka sandale na yandi.
9 Ebuna Boazi tubilaka bankuluntu mpi bantu yonso nde: “Beno kele bambangi+ bubu yai nde mono ke sumba na maboko ya Naomi bima yonso yina vandaka ya Elimeleki mpi bima yonso yina vandaka ya Kilioni ti Maloni.
10 Mono ke kwela mpi Ruti muntu ya Moabi, nkento ya Maloni, sambu na kuvutula zina ya muntu yina fwaka na dikabu na yandi,+ mpidina zina ya muntu yina fwaka bo ta katula yo ve na kati ya bampangi na yandi mpi na kielo ya mbanza ya bwala na yandi. Beno kele bambangi bubu yai.”+
11 Ebuna bantu yonso yina vandaka na kielo ya mbanza mpi bankuluntu tubaka nde: “Beto kele bambangi! Bika nde Yehowa kusakumuna nkento yina ke kota na nzo na nge sambu yandi vanda bonso Rashele mpi Lea, bankento yina tungaka nzo ya Izraele.+ Bika nde nge toma na Efrata+ mpi nge kudisadila zina ya mbote* na Betelemi.+
12 Bika nde nzo na nge kukuma bonso nzo ya Peresi,+ yina Tamare butilaka Yuda, na nzila ya bana yina Yehowa ta pesa nge na leke yai ya nkento.”+
13 Yo yina Boazi kwelaka Ruti mpi yandi kumaka nkento na yandi. Boazi vukisaka nitu ti Ruti, mpi Yehowa bikaka nde yandi baka divumu mpi yandi butaka mwana-bakala.
14 Ebuna bankento tubilaka Naomi nde: “Yehowa kubaka lukumu, yandi muntu yina me bikisa nge ve bubu yai kukonda muntu yina lenda sumba nge diaka. Bika nde bo zabisa zina na yandi na Izraele!
15 Yandi* me vutula* luzingu* na nge mpi yandi ta sadisa nge na kimununu na nge, sambu bokilo na nge yina ke zolaka nge+ me butila nge yandi mpi yandi kele mbote mingi sambu na nge kuluta bana-babakala nsambwadi.”
16 Naomi bakaka mwana yina mpi tulaka yandi na ntulu na yandi, ebuna yandi kumaka ndesi na yandi.*
17 Na nima, bankento yina vandaka kuzinga pene-pene pesaka mwana yina zina. Bo tubaka nde, “Bo me butila Naomi mwana-bakala,” mpi bo pesaka yandi zina Obedi.+ Yandi kele tata ya Yese,+ tata ya Davidi.
18 Yai ndonga ya dibuta* ya Peresi:+ Peresi butaka Esroni;+
19 Esroni butaka Rami; Rami butaka Aminadabi;+
20 Aminadabi+ butaka Nashoni; Nashoni butaka Salmoni;
21 Salmoni butaka Boazi; Boazi butaka Obedi;
22 Obedi butaka Yese;+ mpi Yese butaka Davidi.+
Banoti na nsi ya lutiti
^ Na kisina, “zabisa zina.”
^ Disongidila, mutekolo ya Naomi.
^ To “me kuma muntu yina ke vutula.”
^ To “moyo.”
^ Na kisina, “yandi vandaka kukeba yandi.”
^ Na kisina, “Yai bandonga ya bantu.”
