Yeremia 32:1-44
32 Yai mambu yina katukaka na Yehowa mpi kwisilaka Yeremia na mvula ya 10 ya Sidikiya ntotila ya Yuda, disongidila, mvula ya 18 ya Nebukadenezare.*+
2 Na ntangu yina basoda ya ntotila ya Babilone ziungaka Yeruzalemi, mpi bo kangaka mbikudi Yeremia na Kibansala ya Bankengidi+ na nzo ya ntotila ya Yuda.
3 Sambu Sidikiya ntotila ya Yuda kangaka yandi+ mpi tubaka nde, “Sambu na nki nge ke bikula mutindu yai? Nge ke tuba nde, ‘Yehowa ke tuba nde: “Mono ta pesa mbanza yai na maboko ya ntotila ya Babilone, ebuna yandi ta botula yo,+
4 mpi Sidikiya ntotila ya Yuda ta mona ve mpila ya kutina bantu ya Kaldea, sambu bo ta pesa yandi kibeni na maboko ya ntotila ya Babilone, ebuna yandi ta solula ti yandi mbunzu na mbunzu mpi ta mona yandi meso na meso.”’+
5 ‘Yandi ta nata Sidikiya na Babilone, mpi yandi ta bikala kuna tii kuna mono ta tudila yandi dikebi,’ Yehowa muntu me tuba. ‘Ata beno ke landa kunwana ti bantu ya Kaldea, beno ta nunga ve.’”+
6 Yeremia tubaka nde: “Ndinga ya Yehowa kwisilaka mono nde,
7 ‘Tala, Anamele mwana ya Shalumi mpangi ya tata na nge ta kwisa kukutana ti nge mpi ta tuba nde: “Sumba kilanga na mono yina kele na Anatoti,+ sambu nge muntu kele ti nswa ya ntete ya kusumba yo diaka.”’”+
8 Anamele mwana ya mpangi ya tata na mono kwisaka kukutana ti mono, kaka mutindu Yehowa tubaka, na Kibansala ya Bankengidi, mpi yandi tubilaka mono nde: “Pardo sumba kilanga na mono yina kele na Anatoti, na ntoto ya Benyamini, sambu nge kele ti nswa ya kubaka yo mpi ya kusumba yo diaka. Sumba yo.” Ebuna mono zabaka nde yo salamaka na kuwakana ti ndinga ya Yehowa.
9 Yo yina mono sumbaka kilanga yina vandaka na Anatoti na maboko ya Anamele mwana ya mpangi ya tata na mono. Mono tesilaka yandi mbongo,+ bashekele* nsambwadi mpi mbongo kumi ya bibende.
10 Ebuna mono sonikaka yo na mukanda ya ke monisa nde muntu me sumba kima,+ mono tulaka yo kashe, mono bingaka bambangi,+ mpi mono tesaka mbongo na bakilo.
11 Mono bakaka mukanda yina ya ke monisa nde muntu me sumba kima, mukanda yina bo tulaka kashe na kulanda nsiku mpi mambu yina nsiku ke lombaka, mono bakaka mpi mukanda yina bo tulaka ve kashe,
12 ebuna mono pesaka mukanda yina na Baruki+ mwana ya Neria+ mwana ya Maseya na meso ya Anamele mwana ya mpangi ya tata na mono, na meso ya bambangi yina tulaka maboko na mukanda yina, mpi na meso ya Bayuda yonso yina vandaka na Kibansala ya Bankengidi.+
13 Ntangu yai mono songaka Baruki na meso na bo nde:
14 “Yehowa ya makesa, Nzambi ya Izraele, ke tuba nde, ‘Baka mikanda yai, mukanda yai ya ke monisa nde muntu me sumba kima, mukanda yina bo me tula kashe mpi mukanda ya nkaka yina bo tulaka ve kashe, mpi tula yo na dibungu, sambu bo bumba yo ntangu mingi.’
15 Sambu Yehowa ya makesa, Nzambi ya Izraele, ke tuba nde, ‘Bo ta sumba diaka banzo, bilanga, mpi bilanga ya vinu na insi yai.’”+
16 Ebuna, mono sambaka Yehowa na nima ya kupesa mukanda yina na Baruki mwana ya Neria, nde:
17 “O Yehowa Mfumu ya Kuluta Nene! Tala! Nge muntu salaka zulu ti ntoto na ngolo na nge ya nene+ mpi na diboko na nge ya kutandula. Kima mosi ve kele ya kuyituka kibeni sambu na nge,
18 Muntu yina ke monisaka zola ya kwikama na mafunda ya bantu, kansi yina ke futaka kifu ya batata na* bana na bo,+ Nzambi ya kieleka, Muntu ya nene mpi ya ngolo, yina zina na yandi kele Yehowa ya makesa.
19 Nge kele nene na yina me tala bandongisila* mpi ngolo na bisalu,+ nge muntu yina meso na nge ke talaka banzila yonso ya bantu,+ sambu na kupesa konso muntu na kutadila banzila na yandi mpi mambu yina yandi ke salaka.+
20 Nge salaka bidimbu mpi bimangu na insi ya Ezipte, yina me zabanaka tii bubu yai, mpi na mutindu yina nge me kudisadilaka zina na Izraele mpi na kati ya bantu,+ mutindu yo kele bubu yai.
21 Mpi nge basisaka bantu na nge Izraele na insi ya Ezipte, ti bidimbu, ti bimangu, ti diboko ya ngolo mpi ya kutandula, mpi ti bisalu ya ke pesa boma.+
22 “Na nima nge pesaka bo insi yai yina nge zengaka kieleka na kupesa na ba-nkaka na bo,+ insi yina miliki* ti bwiki+ kele mingi.
23 Bo kotaka mpi bo bakaka yo, kansi bo lemfukaka ve na ndinga na nge mpi bo zitisaka ve nsiku na nge. Bo salaka ve mambu yonso yina nge songaka bo na kusala, yo yina nge salaka nde bampasi yai yonso kubwila bo.+
24 Tala! Bantu me kwisa kusala mwa bangumba sambu na kubotula mbanza,+ mpi sambu na mbele ya bitumba,+ nzala, mpi kipupa,*+ mbanza yai ta bwa kibeni na maboko ya bantu ya Kaldea yina ke nwanisa yo; mambu yonso ya nge tubaka me salama, mutindu nge ke mona ntangu yai.
25 Kansi O Yehowa Mfumu ya Kuluta Nene, nge me songa mono nde, ‘Sumba kilanga na mbongo mpi binga bambangi,’ ata bo ta pesa kibeni mbanza na maboko ya bantu ya Kaldea.”
26 Ebuna ndinga ya Yehowa kwisilaka Yeremia nde:
27 “Tala, mono kele Yehowa, Nzambi ya bantu yonso.* Keti kele ti kima mosi ya kuyituka kibeni sambu na mono?
28 Yo yina, Yehowa ke tuba nde, ‘Tala mono ke pesa mbanza yai na maboko ya bantu ya Kaldea mpi na maboko ya Nebukadenezare* ntotila ya Babilone, ebuna yandi ta botula yo.+
29 Mpi bantu ya Kaldea yina ke nwanisa mbanza yai ta kota mpi ta tula yo tiya mpi bo ta yoka yo+ kumosi ti banzo yina na zulu ya baludi na yo bo pesaka bimenga na Baale mpi bo tiamunaka makabu ya malafu sambu na banzambi ya nkaka sambu na kupesa mono makasi.’+
30 “‘Sambu bantu ya Izraele mpi ya Yuda me sala kaka mambu ya mbi na meso na mono, katuka kileke na bo+ tii kuna; bantu ya Izraele ke landa kupesa mono makasi na kisalu ya maboko na bo,’ Yehowa muntu me tuba.
31 ‘Sambu mbanza yai, katuka na kilumbu yina bo tungaka yo tii bubu yai, yo kele kaka kima ya ke pesaka mono makasi mpi nganzi,+ yo yina bo fwete katula yo na ntwala ya luse na mono,+
32 sambu na mambu yonso ya mbi yina bantu ya Izraele mpi ya Yuda me sala sambu na kupesa mono makasi—bo, bantotila na bo,+ bamfumu na bo,+ banganga-nzambi na bo, bambikudi na bo,+ mpi bantu ya Yuda ti bantu ya Yeruzalemi.
33 Bo landaka kupesa mono mikongo na bo kansi baluse na bo ve;+ ata mono mekaka kulonga bo mbala na mbala,* muntu mosi ve vandaka kuwa sambu na kubaka ndola.+
34 Mpi bo tulaka biteki na bo ya nzanzi na nzo yina kele ti zina na mono, sambu na kukumisa yo mvindu.+
35 Diaka, bo tungaka bisika ya kunanguka ya Baale na Muwanda ya Mwana ya Inomi,*+ sambu na kuyoka* bana na bo ya babakala mpi ya bankento na tiya sambu na Moleki,+ diambu yina mono songaka+ bo ve mpi yina me kwisilaka mono ntete ve ata fioti na ntima* na kusala diambu ya nzanzi ya mutindu yai, ebuna bo nataka Yuda na kusala disumu.’
36 “Yo yina, yai mambu yina Yehowa Nzambi ya Izraele ke tuba sambu na mbanza yai ya beno ke tuba nde bo ta pesa yo na maboko ya ntotila ya Babilone na nsadisa ya mbele ya bitumba, ya nzala, mpi ya kipupa,
37 ‘Mono ta vukisa bo katuka na bansi yonso yina mono panzaka bo na makasi na mono, na nganzi na mono, mpi na makasi na mono ya ngolo,+ ebuna mono ta vutula bo na kisika yai mpi mono ta bika nde bo zinga na lutaninu.+
38 Bo ta vanda bantu na mono, mpi mono ta vanda Nzambi na bo.+
39 Ebuna mono ta pesa bo ntima mosi+ mpi nzila mosi sambu bo wa mono boma ntangu yonso, sambu na mambote na bo mosi mpi mambote ya bana na bo.+
40 Mono ta sala kuwakana ya mvula na mvula ti bo,+ nde mono ta yambula ve kusadila bo mambu ya mbote;+ mpi mono ta tula boma na mono na bantima na bo, sambu bo yambula mono ve.+
41 Mono ta yangalala sambu na bo sambu na kusadila bo mambu ya mbote,+ mpi mono ta kuna bo ngolo na insi yai,+ na ntima na mono ya mvimba mpi na moyo* na mono ya mvimba.’”
42 “Sambu Yehowa ke tuba nde, ‘Kaka mutindu mono me natila bantu yai mpasi yai yonso ya nene, mutindu mosi mpi mono ta natila bo mambu yonso ya mbote* ya mono ke sila bo.+
43 Mpi bo ta sumba diaka bilanga na insi yai,+ ata beno ke tuba nde: “Yo kele ntoto ya mpamba ya me konda muntu mpi mbisi, mpi bo me pesaka yo na maboko ya bantu ya Kaldea.”’
44 “‘Bo ta sumba bilanga na mbongo, bo ta sonika mpi ta tula kashe na mukanda ya ke monisa nde muntu me sumba kima, mpi bo ta binga bambangi na ntoto ya Benyamini,+ na bisika yina kele na nziunga ya Yeruzalemi, na bambanza ya Yuda,+ na bambanza ya ntoto ya bangumba, na bambanza ya ntoto yina kele na ndambu ya nsi,+ mpi na bambanza ya sudi, sambu mono ta vutula bantu na bo yina bo nataka na kimpika,’+ Yehowa muntu me tuba.”
Banoti na nsi ya lutiti
^ Na kisina, “Nebukadrezare,” mutindu ya nkaka ya kusonika yo.
^ Shekele mosi kele bagrame 11,4. Tala Bangindu ya Ngika B14.
^ Na kisina, “na ntulu ya.”
^ To “nene na yina me tala balukanu na nge.”
^ To “mabele.”
^ To “maladi.”
^ Na kisina, “nsuni yonso.”
^ Na kisina, “Nebukadrezare,” mutindu ya nkaka ya kusonika yo.
^ Na kisina, “mono vandaka kutelama na suka-suka mpi kulonga bo.”
^ To “yina me kotaka ntete ve ata fioti na mabanza na mono.”
^ Na kisina, “kulutisa.”
^ Tala Bantendula ya Bangogo, “Gehena.”
^ Tala Bantendula ya Bangogo.
^ Na kisina, “bumbote yonso.”
