Yeremia 39:1-18
39 Na mvula ya uvwa ya Sidikiya ntotila ya Yuda, na ngonda ya kumi, Nebukadenezare* ntotila ya Babilone ti basoda na yandi yonso kwisaka na Yeruzalemi, mpi bo ziungaka yo.+
2 Na mvula ya 11 ya Sidikiya, na ngonda ya iya, na kilumbu ya uvwa ya ngonda, bo tobulaka kibaka ya mbanza.+
3 Ebuna bamfumu yonso ya ntotila ya Babilone kotaka mpi vandaka na Kielo ya Kati-Kati,+ disongidila, Nergale-sharesere yina vandaka Samgare, Nebo-Sarsekimi yina vandaka Rabsarisi,* Nergale-sharesere yina vandaka Rabmagi,* mpi bamfumu yonso ya nkaka ya ntotila ya Babilone.
4 Ntangu Sidikiya ntotila ya Yuda mpi basoda yonso monaka bo, bo tinaka,+ bo basikaka na mbanza na mpimpa na nzila ya masamba ya ntotila, na kielo yina vandaka na kati-kati ya bibaka zole, ebuna bo landaka kukwenda na nzila ya Araba.+
5 Kansi basoda ya bantu ya Kaldea landaka bo, mpi bo kangaka Sidikiya na ntoto ya zelo na zelo ya Yeriko.+ Bo kangaka yandi mpi bo nataka yandi na Nebukadenezare* ntotila ya Babilone na Ribla+ na insi ya Amati,+ kisika yandi zengilaka yandi nkanu.
6 Ntotila ya Babilone songaka bantu na kufwa bana ya Sidikiya ya babakala na meso na yandi na Ribla, mpi yandi songaka bantu na kufwa+ bantu yonso ya lukumu ya Yuda.
7 Ebuna yandi tobulaka Sidikiya meso, na nima yandi kangisaka yandi miniololo ya kwivre sambu na kunata yandi na Babilone.+
8 Na nima bantu ya Kaldea yokaka nzo ya ntotila ti banzo ya bantu,+ mpi bo bwisaka bibaka ya Yeruzalemi.+
9 Nebuzaradani+ mfumu ya bantu yina ke taninaka ntotila nataka na Babilone bantu ya nkaka yina bikalaka na mbanza, ti bantu yina tinaka mpi kwendaka kuvukana ti yandi, mpi konso muntu yina bikalaka.
10 Kansi Nebuzaradani mfumu ya bantu yina ke taninaka ntotila bikisaka bantu ya nkaka yina vandaka bansukami ya ngolo na insi ya Yuda, bantu yina vandaka ve ata ti kima. Na kilumbu yina, yandi pesaka bo mpi bilanga ya vinu ti bilanga ya nkaka ya kusala.*+
11 Ntangu yai, Nebukadenezare* ntotila ya Babilone pesaka Nebuzaradani mfumu ya bantu yina ke taninaka ntotila bantuma yai sambu na Yeremia:
12 “Baka yandi mpi keba yandi; kusala yandi mbi ve, mpi pesa yandi konso kima yina yandi ke lomba nge.”+
13 Yo yina Nebuzaradani mfumu ya bantu yina ke taninaka ntotila, Nebushazbani yina vandaka mfumu ya bakapita ya nzo ya ntotila,* Nergale-sharesere yina vandaka Rabmagi,* mpi bantu yonso ya mfunu ya ntotila ya Babilone tindaka bantu
14 mpi bo basisaka Yeremia na Kibansala ya Bankengidi,+ ebuna bo pesaka yandi na Gedalia+ mwana ya Ahikami+ mwana ya Shafani+ sambu yandi nata yandi na nzo na yandi. Yo yina Yeremia zingaka na kati ya bantu.
15 Ntangu Yeremia vandaka na boloko na Kibansala ya Bankengidi,+ ndinga ya Yehowa kwisilaka yandi nde:
16 “Kwenda kusonga Ebedi-meleki,+ muntu ya Etiopia, nde, ‘Yehowa ya makesa, Nzambi ya Izraele, ke tuba nde: “Mono ke lungisa mambu yina mono tubaka sambu na mbanza yai, sambu na mpasi kansi ve sambu na mambote, mpi na kilumbu yina nge ta mona mutindu yo ta salama.”’
17 “‘Kansi mono ta gulusa nge na kilumbu yina,’ Yehowa muntu me tuba, ‘mpi bo ta pesa nge ve na maboko ya bantu yina nge ke wa boma.’
18 “‘Sambu mono ta gulusa nge kibeni, mpi nge ta fwa ve na mbele ya bitumba. Nge ta baka luzingu* na nge bonso kima ya nge me botula na bitumba,*+ sambu nge tudilaka mono ntima,’+ Yehowa muntu me tuba.”
Banoti na nsi ya lutiti
^ Na kisina, “Nebukadrezare,” mutindu ya nkaka ya kusonika yo.
^ To na kutadila mutindu ya nkaka ya kukabula masonama ya Kiebreo, “Nergale-sharesere, Samgare-nebo, Sarsekimi, Rabsarisi.”
^ To “mfumu ya bantu ya mazi (muntu yina ke zabisaka makwisa na nsadisa ya bambwetete).”
^ Na kisina, “Nebukadrezare,” mutindu ya nkaka ya kusonika yo.
^ To mbala ya nkaka, “ti kisalu ya kingolo-ngolo.”
^ Na kisina, “Nebukadrezare,” mutindu ya nkaka ya kusonika yo.
^ To “mfumu ya bakapita ya nzo.”
^ To “mfumu ya bantu ya mazi (muntu yina ke zabisaka makwisa na nsadisa ya bambwetete).”
^ To “moyo.”
^ To “ta guluka ti luzingu na nge.”
