Yeremia 42:1-22
42 Ebuna bamfumu yonso ya basoda, mpi Yohanani+ mwana ya Karea, Yezania mwana ya Oshaya, mpi bantu yonso, yantika na muntu ya kukonda mfunu tii na muntu ya mfunu mingi, bo pusanaka
2 mpi bo tubilaka mbikudi Yeremia nde: “Pardo, wa mambu ya beto ke lomba sambu nge wila beto mawa, mpi samba Yehowa Nzambi na nge sambu na beto, sambu na bantu yonso yai ya me bikala, sambu bantu vandaka mingi kansi bo me bikala fioti,+ mutindu nge ke mona.
3 Bika Yehowa Nzambi na nge kusonga beto nzila yina beto fwete tambula mpi mambu yina beto fwete sala.”
4 Mbikudi Yeremia vutudilaka bo nde: “Mono me wa beno, mpi mono ke samba Yehowa Nzambi na beno na kutadila mambu ya beno me lomba; mpi mono ta songa beno mambu yonso yina Yehowa ta tubila beno. Mono ta bumbila beno ve ata diambu mosi.”
5 Bo vutudilaka Yeremia nde: “Bika Yehowa kuvanda mbangi ya kieleka mpi ya kwikama sambu na beto kana beto sala ve mambu yonso yina Yehowa Nzambi na nge ta songa beto na nzila na nge.
6 Yo vanda ya mbote to ya mbi, beto ta lemfukila ndinga ya Yehowa Nzambi na beto, yina beto ke tinda nge na yandi, sambu mambu kukwendila mbote sambu na beto sambu beto ke lemfukilaka ndinga ya Yehowa Nzambi na beto.”
7 Ebuna bilumbu kumi na nima, ndinga ya Yehowa kwisilaka Yeremia.
8 Yo yina yandi bingaka Yohanani mwana ya Karea, bamfumu yonso ya basoda yina vandaka ti yandi, mpi bantu yonso, yantika na muntu ya kukonda mfunu tii na muntu ya mfunu mingi.+
9 Yandi tubilaka bo nde: “Yai mambu yina Yehowa Nzambi ya Izraele ke tuba, yina beno tindaka mono na yandi sambu mono monisa na ntwala na yandi mambu ya beno ke lomba sambu yandi wila beno mawa:
10 ‘Kana beno bikala kibeni na insi yai, mono ta tunga beno kansi mono ta bwisa beno ve, mpi mono ta kuna beno kansi mono ta tumuna beno ve, sambu mono ta wa mawa sambu na mpasi yina mono me natila beno.+
11 Beno wa ve ntotila ya Babilone boma, yina beno ke wa boma.’+
“‘Beno wa yandi boma ve,’ Yehowa muntu me tuba, ‘sambu mono kele ti beno, sambu na kugulusa beno mpi sambu na kukatula beno na maboko na yandi.
12 Mono ta wila beno mawa,+ ebuna yandi ta wila beno mawa mpi ta vutula beno na insi na beno.
13 “‘Kansi kana beno tuba nde, “Ve, beto ta bikala ve na insi yai!” mpi beno zitisa ve ndinga ya Yehowa Nzambi na beno
14 mpi beno tuba nde, “Ve, kansi beto ta kwenda na insi ya Ezipte,+ kisika beto ta mona ve bitumba, ta wa ve makelele ya kibongo, mpi ta wa ve nzala ya dimpa; beto ta zinga kuna,”
15 beno wa ndinga ya Yehowa, O bantu ya Yuda yina me bikala. Yehowa ya makesa, Nzambi ya Izraele, ke tuba nde: “Kana beno kele ti lukanu ya ngolo ya kukwenda na Ezipte mpi beno kwenda kuzinga kuna,*
16 mbele ya bitumba yina beno ke wa boma ta kanga beno kuna na insi ya Ezipte, mpi nzala yina beno ke wa boma ta landa beno na Ezipte, ebuna beno ta fwa kuna.+
17 Mpi bantu yonso yina kele ti lukanu ya ngolo ya kukwenda na Ezipte sambu na kuzinga kuna, ta fwa na mbele ya bitumba, na nzala, mpi na kipupa.* Muntu mosi ve na kati na bo ta guluka to ta tina mpasi yina mono ta natila bo.”’
18 “Sambu Yehowa ya makesa, Nzambi ya Izraele, ke tuba nde: ‘Kaka mutindu mono monisaka makasi na mono mpi nganzi na mono na bantu ya Yeruzalemi,+ mutindu mosi mpi mono ta monisila beno makasi na mono kana beno kwenda na Ezipte, mpi beno ta kuma kima ya kusinga, kima ya ke pesa boma, mpi kima ya nsoni,+ ebuna beno ta mona diaka ve kisika yai ata fioti.’
19 “O bantu ya Yuda yina me bikala, Yehowa me tubila beno. Beno kwenda ve na Ezipte. Beno fwete zaba kibeni nde mono me kebisa beno bubu yai
20 nde kifu na beno ta fwisa beno.* Sambu beno tindaka mono na Yehowa Nzambi na beno nde, ‘Samba Yehowa Nzambi na beto sambu na beto, mpi songa beto mambu yonso yina Yehowa Nzambi na beto ke tuba, ebuna beto ta sala yo.’+
21 Mpi mono me songa beno bubu yai, kansi beno ta lemfukila ve ndinga ya Yehowa Nzambi na beno mpi beno ta sala ve mambu yonso yina yandi me tinda mono na kusonga beno.+
22 Yo yina, beno zaba kibeni nde beno ta fwa na mbele ya bitumba, na nzala, mpi na kipupa na kisika yina beno ke zola kukwenda kuzinga.”+
Banoti na nsi ya lutiti
^ To “sambu na kuzinga ntangu fioti.”
^ To “maladi.”
^ To “ta fwa mioyo na beno.”
