Yeremia 43:1-13
43 Ntangu Yeremia manisaka kutubila bantu yonso mambu yonso yina Yehowa Nzambi na bo tubaka, konso diambu yina Yehowa Nzambi na bo tindaka yandi na kusonga bo,
2 Azaria mwana ya Oshaya, Yohanani+ mwana ya Karea, mpi bantu yonso ya lulendo tubilaka Yeremia nde: “Nge ke tuba mambu ya luvunu! Yehowa Nzambi na beto me tinda nge ve na kutuba nde, ‘Beno kwenda ve na Ezipte sambu na kuzinga kuna.’
3 Kansi Baruki+ mwana ya Neria ke pusa nge na kunwanisa beto sambu na kupesa beto na maboko ya bantu ya Kaldea, sambu bo fwa beto to bo nata beto na Babilone.”+
4 Yo yina Yohanani mwana ya Karea, bamfumu yonso ya basoda, mpi bantu yonso lemfukaka ve na ndinga ya Yehowa ya kubikala na insi ya Yuda.
5 Kansi, Yohanani mwana ya Karea mpi bamfumu yonso ya basoda nataka kumosi ti bo, bantu yonso ya Yuda yina bikalaka, bayina katukaka na bansi yonso yina bo panzanaka+ sambu na kukwisa kuzinga na insi ya Yuda.
6 Bo bakaka babakala, bankento, bana, bana ya ntotila ya bankento, mpi bantu* yonso yina Nebuzaradani+ mfumu ya bantu yina ke taninaka ntotila bikisaka na maboko ya Gedalia+ mwana ya Ahikami+ mwana ya Shafani;+ bo bakaka mpi mbikudi Yeremia ti Baruki mwana ya Neria.
7 Ebuna bo kwendaka na insi ya Ezipte, sambu bo lemfukilaka ve ndinga ya Yehowa, mpi bo kwendaka tii na Tapanesi.+
8 Ebuna ndinga ya Yehowa kwisilaka Yeremia na Tapanesi nde:
9 “Baka matadi ya nene na diboko na nge, mpi bumba yo na poto-poto, na pavema ya babriki yina kele na munoko ya nzo ya Farao na Tapanesi, ntangu Bayuda ke tala.
10 Na nima tubila bo nde, ‘Yehowa ya makesa, Nzambi ya Izraele, ke tuba nde: “Tala, mono ke tinda bantu na kubinga Nebukadenezare* ntotila ya Babilone, nsadi na mono,+ mpi mono ta tula kiti na yandi ya kimfumu na zulu ya matadi yai ya mono me bumba, mpi yandi ta yalumuna tenta na yandi ya kimfumu na zulu na yo.+
11 Ebuna yandi ta kwisa mpi ta bedisa insi ya Ezipte.+ Muntu yina kele sambu na maladi ya ke fwaka, na maladi ya ke fwaka, muntu yina kele sambu na kimpika, na kimpika, mpi muntu yina kele sambu na mbele ya bitumba, na mbele ya bitumba.+
12 Mpi mono ta tula banzo* ya banzambi ya Ezipte tiya,+ mpi yandi ta yoka yo mpi ta nata yo na kimpika. Yandi ta kudiziunga insi ya Ezipte mutindu ngungudi ke kudiziungaka lele na yandi, mpi yandi ta katuka kuna na ngemba.*
13 Yandi ta zenga makunzi* ya Bete-shemeshi* bitini-bitini na insi ya Ezipte, mpi yandi ta yoka banzo* ya banzambi ya Ezipte tiya.”’”
Banoti na nsi ya lutiti
^ To “mioyo.”
^ Na kisina, “Nebukadrezare,” mutindu ya nkaka ya kusonika yo.
^ To “batempelo.”
^ To “kukonda nde bo sala yandi mbi.”
^ To “makunzi ya matadi.”
^ To “Nzo (Tempelo) ya Ntangu,” disongidila, Eliopolisi.
^ To “batempelo.”
