Yezaya 19:1-25
19 Nsangu sambu na Ezipte:+
Tala! Yehowa ke tambula na mpunda na zulu ya dituti mosi ya ke kwenda nswalu mpi yandi ke kwisa na Ezipte.
Banzambi ya kukonda mfunu ya Ezipte ta tekita na ntwala na yandi,+Mpi ntima ya Ezipte ta lemba na kati na yo.
2 “Mono ta pusa bantu ya Ezipte na kunwanisa bantu ya Ezipte,Ebuna bo ta nwana bo na bo,Konso muntu ti mpangi na yandi mpi ti muntu yina ke zingaka pene-pene na yandi,Mbanza mosi ta nwana ti mbanza ya nkaka, kimfumu mosi ti kimfumu ya nkaka.
3 Mpeve ya Ezipte ta kuma kisaka-saka na kati na yo,Mpi mono ta vwalangasa balukanu na yo.+
Bo ta kwenda na banzambi ya kukonda mfunu,Na bandoki, na bantu yina ke solulaka ti bampeve ya bafwa, mpi na bantu yina ke zabisaka bantu mambu yina ta kumina bo.+
4 Mono ta pesa Ezipte na maboko ya mfumu mosi ya makambu ngolo,Mpi ntotila mosi ya nku ta yala bo,”+ Mfumu ya kieleka, Yehowa ya makesa, muntu me tuba.
5 Masa ya nzadi-mungwa ta yuma,Nzadi ta konda masa mpi ta yuma.+
6 Ebuna banzadi ta basisa nsudi ya mbi;Tu-bamasa ya Nile ya Ezipte ta kulumuka mpi ta yuma.
Balukengi mpi matiti ya nda ta beba.+
7 Tu-banti yina kele na lweka ya Nzadi ya Nile, na munoko ya Nile,Mpi insi ya mvimba yina bo kunaka nkeni na lweka ya Nile+ ta yuma.+
Mupepe ta nata yo, mpi yo ta vanda diaka ve.
8 Balobi-mbisi ta wa mawa,Bantu yina ke losaka bandobo na Nile ta wa mawa,Mpi bantu yina ke tandulaka babukondi na bo na zulu ya masa ta lemba.
9 Bantu yina ke salaka kisalu ya kusanuna lino+Mpi bantu yina ke salaka bilele ya mpembe na masini ya kutunga bilele ta wa nsoni.
10 Bantu na yandi yina ke tungaka ta mona mpasi,Bantu yonso ya kisalu yina ke bakaka lufutu ta wa mawa.*
11 Bamfumu ya Soani+ kele bazoba.
Bandongisi ya kuluta mayele ya Farao ke pesa bandongisila ya buzoba.+
Inki mutindu beno lenda tubila Farao nde:
“Mono kele mwana ya bantu ya mayele,Mwana ya bantotila ya ntama”?
12 Ebuna, bantu na nge ya mayele+ kele na wapi?
Kana bo me zaba, bika bo songa nge lukanu yina Yehowa ya makesa me baka sambu na Ezipte.
13 Bamfumu ya Soani me sala mambu na buzoba yonso,Bamfumu ya Nofi*+ me kudikusa,Bamfumu ya makanda na yandi me vidisa Ezipte nzila.
14 Yehowa me tiamuna mpeve ya kisaka-saka+ na zulu na yandi;Mpi bo me vidisa Ezipte nzila na mambu yonso ya yandi ke sala,Bonso muntu mosi ya me lawuka malafu yina ke baluka-baluka na biluki na yandi.
15 Ezipte ta vanda ve ata ti kisalu mosi ya kusala,Yo vanda sambu na ntu to mukila, lutangu to matiti ya nda.*
16 Na kilumbu yina, Ezipte ta kuma bonso bankento, yandi ta tekita mpi ta wa boma ya ngolo sambu na diboko ya Yehowa ya makesa ya ke pesa boma, yina yandi ke nangula sambu na kunwanisa yo.+
17 Insi ya Yuda ta kuma kima ya ke pesa Ezipte boma ya ngolo. Ntangu bo ta wa zina na yo, bo ta tekita sambu na lukanu yina Yehowa ya makesa me baka sambu na bo.+
18 Na kilumbu yina, yo ta vanda ti bambanza tanu na insi ya Ezipte yina ta tuba ndinga ya Kanana+ mpi ta zenga kieleka na ntwala ya Yehowa ya makesa sambu na kubikala ya kwikama. Bo ta binga mbanza mosi Mbanza ya Kubuka.
19 Na kilumbu yina, yo ta vanda ti mesa-kimenga mosi sambu na Yehowa na kati-kati ya insi ya Ezipte mpi dikunzi mosi sambu na Yehowa na ndilu na yo.
20 Yo ta vanda kidimbu mpi kimbangi sambu na Yehowa ya makesa na insi ya Ezipte; sambu bo ta didila Yehowa sambu na bantu ya ke niokulaka bantu, mpi yandi ta tindila bo ngulusi, muntu mosi ya nene, yina ta gulusa bo.
21 Yehowa ta zabana na bantu ya Ezipte, mpi bantu ya Ezipte ta zaba Yehowa na kilumbu yina, ebuna bo ta pesa bimenga ti makabu mpi ta sala lusilu na Yehowa mpi ta lungisa yo.
22 Yehowa ta bula Ezipte,+ yandi ta bula mpi ta belula yo, ebuna bo ta vutuka na Yehowa, mpi yandi ta pesa mvutu na mambu yina bo lombaka mpi ta belula bo.
23 Na kilumbu yina, yo ta vanda ti nzila mosi ya nene+ yina ta katuka na Ezipte mpi ta kwenda tii na Asiria. Ebuna Asiria ta kwisa na Ezipte, mpi Ezipte ta kwenda na Asiria, mpi Ezipte ta sadila Nzambi kumosi ti Asiria.
24 Na kilumbu yina, Izraele ta vanda na kisika ya tatu ti Ezipte mpi Asiria,+ disongidila, lusakumunu sambu na ntoto,
25 sambu Yehowa ya makesa ta sakumuna yo mpi ta tuba nde: “Lusakumunu kuvanda na bantu na mono, Ezipte, na kisalu ya maboko na mono, Asiria, mpi na dikabu na mono, Izraele.”+
Banoti na nsi ya lutiti
^ To “ta vanda na mawa na moyo.”
^ To “Memfisi.”
^ To mbala ya nkaka, “dindala to lukengi.”
