Yezaya 28:1-29
28 Mawa na mpu ya kimfumu* yina ke kudisonga* ya bantu ya Efrayimi+ ya ke lawukaka malafuMpi na kintuntu ya ke beba ya kitoko na yo ya nkembo,Yina kele na nsongi ya muwanda ya ke butaka mingi ya bantu yina vinu me nungaka!
2 Tala! Yehowa kele ti muntu mosi ya ngolo mpi ya kikesa.
Bonso makelele ya banzasi mpi mvula ya matadi, mupepe ya ngolo ya ke fwaka,Bonso mvula ya banzasi ya masa ya mvula ya ngolo,Yandi ta losa yo na ngolo yonso na ntoto.
3 Bampu ya kimfumu ya lulendo* ya bantu ya Efrayimi ya ke lawukaka malafuBo ta niata yo na nsi ya makulu.+
4 Ebuna kintuntu yina ke beba ya kitoko na yo ya nkembo,Yina kele na nsongi ya muwanda ya ke butaka mingi,Ta kuma bonso fige ya ntete- ntete yina ke yelaka na ntwala ya nsungi ya mvula.
Kana muntu kumona yo, yandi ke mina yo kaka na ntangu yina yo kele na diboko na yandi.
5 Na kilumbu yina, Yehowa ya makesa ta kuma mpu ya kimfumu ya nkembo mpi mpu ya kitoko ya bintuntu sambu na bantu+ na yandi yina ta bikala.
6 Ebuna yandi ta kuma mpeve ya lunungu sambu na muntu yina me vanda sambu na kusambisa mpi nto ya ngolo sambu na bantu yina ke kulaka bambeni yina ke nwanisaka na kielo.+
7 Bantu yai mpi ke vila nzila sambu na vinu;Malafu na bo ya ke lawusaka ke sala nde bo tambula na lunziungu.
Nganga-nzambi ti mbikudi ke vila nzila sambu na malafu ya ke lawusaka;Vinu ke kumisa bo kisaka-saka,Mpi bo ke tambula na lunziungu sambu na malafu na bo ya ke lawusaka;Mbona-meso na bo ke sala nde bo vila nzila,Mpi bo ke bula sakuba ntangu bo ke sambisa.+
8 Sambu bamesa na bo me fuluka ti biluki ya mvindu—Ata kisika mosi ve me konda biluki.
9 Na nani bo ta pesa nzayilu,Mpi na nani bo ta tendula nsangu?
Na bayina bo me yambula kunwisa mabele,Bayina bo me katula na mabele?
10 Sambu yo kele “nsiku na nima ya nsiku, nsiku na nima ya nsiku,Ndonga na ndonga, ndonga na ndonga,*+Ndambu awa, ndambu kuna.”
11 Yo yina, yandi ta tubila bantu+ yai na nzila ya bantu yina kele ti lukukama* mpi na nzila ya ndinga ya nzenza.
12 Yandi songaka bo mbala mosi nde: “Yai kele kisika ya kupema. Bika nde muntu yina me lemba, yandi pema; yai kele kisika ya kubaka kikesa,” kansi bo buyaka kuwa.+
13 Yo yina sambu na bo, ndinga ya Yehowa ta vanda nde:
“Nsiku na nima ya nsiku, nsiku na nima ya nsiku,Ndonga na ndonga, ndonga na ndonga,*+Ndambu awa, ndambu kuna,”
Mpidina ntangu bo ta tambula,Bo ta bula sakuba mpi ta bwa mukongo na ntotoEbuna bo ta bukana, ta kangama na mutambu mpi bo ta kanga bo.+
14 Yo yina, beno wa ndinga ya Yehowa, beno bantu ya ke kudikumisaka,Beno bamfumu ya bantu yai na Yeruzalemi,
15 Sambu beno ke tuba nde:
“Beto me sala kuwakana ti Lufwa,+Mpi beto me sala kuwakana* ti Maziamu.*
Ntangu masa mingi yina ke kulumuka na ngolo yonso ta luta,Yo ta kuma ve kisika beto kele,Sambu beto me kumisa luvunu kitininu na betoMpi beto me bumbana na kati ya luvunu.”+
16 Yo yina, Yehowa Mfumu ya Kuluta Nene me tuba nde:
“Awa mono ke tula bonso fondasio na Sioni ditadi+ mosi ya bo me meka,Ditadi+ ya mfunu ya kinkonko ya fondasio+ mosi ya kieleka.
Ata muntu mosi ve ya ke monisa lukwikilu ta wa boma.+
17 Mono ta sala nde lunungu kuvanda nsinga ya kutesila+Mpi kusungama kuvanda nivo.*+
Mvula ya matadi ta komba kitininu ya luvunu,Mpi bamasa ta dindisa kisika ya kubumbana.
18 Kuwakana na beno ti Lufwa ta suka,Mpi kuwakana na beno ti Maziamu* ta zinga ve.+
Ntangu masa mingi ya ke kulumuka na ngolo yonso ta luta,Yo ta fwa beno.
19 Mbala yonso yina yo ta luta,Yo ta komba beno;+Sambu yo ta luta konso suka,Na mwini mpi na mpimpa.
Boma mpamba ta sala nde bo bakisa nsangu yina.”*
20 Sambu mbeto kele nkufi kibeni sambu na kuditandula,Mpi lele ya kufika ya bo me tunga kele fioti kibeni sambu na kudifika.
21 Yehowa ta telama bonso na Ngumba ya Perazimi;Yandi ta telama bonso na muwanda* yina kele pene-pene ya Gibeoni,+Sambu yandi sala kisalu na yandi—kisalu na yandi ya kuyituka—Mpi yandi lungisa kisalu na yandi—kisalu+ na yandi ya kuyituka.
22 Ntangu yai, beno vweza ve,+Sambu bo kanga diaka ve ngolo bansinga na beno,Sambu mono me wa mambu ya me katuka na Mfumu ya Kuluta Nene, Yehowa ya makesa,Nde bo me baka lukanu ya kumanisa insi ya mvimba.*+
23 Beno tula dikutu mpi beno wa ndinga na mono;Beno tula dikebi mpi beno wa mambu ya mono ke tuba.
24 Keti muntu ya ke bundulaka ke landaka kubundula kilumbu ya mvimba na ntwala nde yandi kuna nkeni?
Keti yandi ke bukaka mpi ke bundulaka ntoto+ na yandi ntangu yonso?
25 Kana yandi me kumisa ntoto kukonda ngumba,Keti na nima yandi ke mwangaka ve kumini ya ndombe mpi ke kunaka ve kumini?Keti yandi ke kunaka ve ble, mpondo, ti orze na bisika na yoMpi ble ya mutindu ya nkaka*+ na lweka ya bandilu?
26 Sambu yandi ke longa yandi* na mutindu ya mbote;Nzambi na yandi ke longa yandi.+
27 Sambu bo ke tutaka ve kumini ya ndombe ti kima ya bo ke tutaka bambuma sambu na kukatula yo bampusu,+Mpi bo ke lutisaka ve makulu ya pusu-pusu na zulu ya kumini.
Kansi, bo ke bulaka kumini ya ndombe ti nti ya fioti,Mpi kumini ti nti ya nene.
28 Keti muntu ke tutaka bambuma sambu na kusala dimpa?
Ve, yandi ke tutaka yo ve mbala na mbala sambu na kukatula yo bampusu;+Mpi ntangu yandi ke tambusaka makulu ya pusu-pusu na yandi na zulu na yo ti bampunda na yandi,Yandi ke tutaka yo ve.+
29 Diambu yai mpi me katuka na Yehowa ya makesa,Yina ndongisila* na yandi kele ya kuyitukaMpi yina mambu ya yandi ke salaka kele nene.*+
Banoti na nsi ya lutiti
^ Yo ke monana bonso nde yo ke tubila ntu-mbanza Samaria.
^ To “ya lulendo.”
^ Na kisina, “ya ke kudisonga.”
^ To “Nsinga ya kutesila na zulu ya nsinga ya kutesila, nsinga ya kutesila na zulu ya nsinga ya kutesila.”
^ Na kisina, “bikobo ya lukukama.”
^ To “Nsinga ya kutesila na zulu ya nsinga ya kutesila, nsinga ya kutesila na zulu ya nsinga ya kutesila.”
^ To mbala ya nkaka, “me lungisa mbona-meso.”
^ To “Sheole,” disongidila, maziamu ya bantu yonso. Tala Bantendula ya Bangogo.
^ To “nsinga ya bamaso.”
^ To “Sheole,” disongidila, maziamu ya bantu yonso. Tala Bantendula ya Bangogo.
^ To mbala ya nkaka, “Ntangu bo ta bakisa, bo ta wa boma ya ngolo.”
^ To “ntoto ya kukonda ngumba.”
^ To “ntoto ya mvimba.”
^ Ngogo ya Kiebreo ke tubila mutindu ya ble mosi ya mbote mingi ve yina bo vandaka kukuna na Ezipte ya ntama.
^ To “ke pesa yandi malongi; ke pesa yandi ndola.”
^ To “lukanu.”
^ To “Mpi yina mayele na yandi kele mingi.”
