Yezaya 3:1-26
3 Tala! Mfumu ya kieleka, Yehowa ya makesa,Ke katula na Yeruzalemi ti na Yuda lusadisu yonso mpi bima yonso yina ke simbaka luzingu,Lusadisu yonso ya ke tadila mampa mpi masa,+
2 Muntu ya ngolo mpi soda,Zuzi mpi mbikudi,+ nganga-ngombo mpi nkuluntu,
3 Mfumu ya bantu 50,+ muntu ya lukumu, mpi ndongisi,Muntu ya ke zabaka kusala mazi mbote-mbote mpi muntu ya ke vandaka ti mayele ya kukinisa nioka.+
4 Mono ta kumisa bana-babakala bamfumu na bo,Mpi bantu yina ke soba-sobaka mabanza* ta yala bo.
5 Bantu ta niokula bantu ya nkaka,Konso muntu ta niokula nkweno na yandi.+
Mwana-bakala ta nwanisa mbuta-muntu,Mpi muntu ya bo ke zitisaka mingi ve ta tula ntembe ti muntu ya bo ke zitisaka.+
6 Konso muntu ta simba mpangi na yandi na kati ya nzo ya tata na yandi mpi ta tuba nde:
“Nge kele ti kazaka—vanda mfumu na beto.
Baka kiyeka na zulu ya mayumbu yai ya bo me bwisa.”
7 Kansi na kilumbu yina yandi ta buya nde:
“Mono ta vanda ve muntu yina ta kangisa bamputa na nge babande sambu na kusansa yo,*Mono kele ve ti madia to bilele na nzo na mono.
Kutula mono ve mfumu ya bantu.”
8 Sambu Yeruzalemi me bula sakuba,Mpi Yuda me bwa,Sambu bo ke nwanisa Yehowa na bangogo mpi na bisalu;Bo ke sala mambu na ntembe yonso na meso na yandi ya nkembo.*+
9 Mutindu baluse na bo ke monana ke funda bo,Mpi bo ke zabisa disumu na bo bonso Sodome;+Bo ke sosa ve kubumba yo.
Mawa na bo,* sambu bo ke kudinatila mpasi!
10 Songa bantu ya lunungu nde mambu ta kwendila mbote sambu na bo,Bo ta pesa bo matabisi sambu na mambu yina bo ke sala.*+
11 Mawa na muntu ya mbi!
Mpasi ta bwila yandi,Sambu mambu yina maboko na yandi me sala, bo ta sala yandi mpi mutindu yina!
12 Na yina me tala bantu na mono, bantu ya ke pesaka bo kisalu kele nku,Mpi bankento ke yala bo.
Bantu na mono, bantwadisi na beno ke sala nde beno yungana-yungana,Mpi bo ke vwalangasa nzila ya bitambi na beno.+
13 Yehowa me yilama sambu na kutuba makambu na yandi,Yandi me telama sambu na kuzengila bantu nkanu.
14 Yehowa ta samba ti bankuluntu mpi bamfumu ya bantu na yandi.
“Beno me yoka kilanga ya vinu tiya,Mpi bima yina beno me yiba bansukami kele na kati ya banzo na beno.+
15 Inki mutindu beno me baka kikesa ya kubedisa bantu na mono,Mpi ya kuniokula kibeni bansukami?”+ Mfumu ya Kuluta Nene, Yehowa ya makesa, muntu me tuba.
16 Yehowa me tuba nde: “Sambu bana-bankento ya Sioni kele lulendo,Bo ke tambula ba-ntu na zulu,*Ke ladisa meso, ke denda-denda,Mpi ke sala makelele ti mitaku ya makulu na bo,
17 Yehowa ta basisa mpi bana-bankento ya Sioni bibala ya bamputa na ntu,Mpi Yehowa ta bika bambunzu na bo pululu.+
18 Na kilumbu yina Yehowa ta katula bima na bo yonso ya ke kumisaka nitu kitokoMitaku ya makulu, bilele ya kukanga na ntu, mpi bima ya ke kumisaka nitu kitoko ya kele bonso ngonda,+
19 Bima-makutu, mitaku ya maboko, mpi bilele ya kufika ntu,
20 Bampu,* mayaka ya makulu, mpi bilele ya kukanga na ntulu,Bima ya kutudila mananasi* mpi bima ya ke kumisaka kitoko,*
21 Balupetu ya musapi mpi balupetu ya mbombo,
22 Barobe ya bankinsi, bamvwela, bakazaka, tu-basaki ya kunatila mbongo,
23 Batala-tala ya maboko+ mpi bilele ya lino,*Batirbani mpi bilele ya kufika ntu.
24 Na kisika ya mafuta ya balsami+ ta vanda nsudi ya kupola;Na kisika ya mukaba, nsinga;Na kisika ya nsuki ya bo me yidika mbote, dibandi;+Na kisika ya lele ya ntalu, lele ya saki;+Mpi na kisika ya kitoko kidimbu ya tiya.
25 Bantu na nge ta bwa na mbele ya bitumba,Mpi bantu na nge ya ngolo ta bwa na bitumba.+
26 Bakielo na yandi ta dila mpi ta wa mawa,+Yandi ta vanda na ntoto mpi ta bikala mpamba.”+
Banoti na nsi ya lutiti
^ To “bantu yina ke sobaka bangindu.”
^ To “muntu yina ke belula nge.”
^ Na kisina, “na meso ya nkembo na yandi.”
^ To “na moyo na bo.”
^ Na kisina, “ta dia mbuma ya bisalu na bo.”
^ Na kisina, “ti nkingu ya kutandula.”
^ To “Bima ya kufika ntu.”
^ Na kisina, “Banzo ya moyo.”
^ To “bazeke ya ke kumisaka nitu kitoko mpi ya ke salaka makelele.”
^ To “bilele ya kati.”
