Yezaya 45:1-25
45 Yai mambu Yehowa ke tuba na muntu yina yandi me tulaka mafuta, na Sirusi,+Yina mono me simba+ diboko na yandi ya kitata,Sambu na kubedisa makanda na ntwala na yandi,+Sambu na kubotula binwaninu* ya bantotila,Sambu na kukangula na ntwala na yandi bakielo ya bikangilu zole,Mpidina bo ta kanga ve bakielo ya nene:
2 “Mono ta kwenda na ntwala na nge,+Mpi mono ta kumisa bangumba ya fioti lelensi.
Mono ta buka bakielo ya kwivre bitini-bitini,Mpi mono ta zenga-zenga+ banti ya kibende.
3 Mono ta pesa nge bimvwama yina kele na mpimpaMpi bimvwama yina kele ya kubumbana na bisika ya kubumbana,+Sambu nge zaba nde mono kele Yehowa,Nzambi ya Izraele, yina ke binga nge na zina na nge.+
4 Sambu na nsadi na mono Yakobi mpi Izraele muntu ya mono me solaka,Mono ke binga nge na zina na nge.
Mono ke pesa nge zina mosi ya lukumu, ata nge zabaka mono ve.
5 Mono kele Yehowa, mpi ya nkaka kele ve.
Katula mono+ Nzambi ya nkaka kele ve.
Mono ta kumisa nge ngolo,* ata nge zabaka mono ve,
6 Sambu bantu kuzabaKatuka na kubasika ya nta- ngu tii na kudinda na yo*Nde katula mono,+ ya nkaka kele ve.
Mono kele Yehowa, mpi ya nkaka kele ve.+
7 Mono me sala nsemo+ mpi me ganga mpimpa,+Mono me sala ngemba+ mpi me ganga mpasi;+Mono, Yehowa, mono ke sala mambu yai yonso.
8 Zulu, beno nokisa mvula tuka na zulu;+Matuti kunokisa lunungu.
Ntoto kukanguka mpi kubuta luguluku,Mpi yo sala nde lunungu kubasika na ntangu yina mosi.+
Mono, Yehowa, mono me sala yo.”
9 Mawa na muntu yina ke tula ntembe* ti Muntu yina salaka yandi,Sambu yandi kele kaka kipesi ya dibungu ya ntotoNa kati ya bipesi ya nkaka ya dibungu ya kele ya kupasuka na ntoto!
Keti ntoto ya tuma lenda tubila Muwumbi* nde: “Inki nge ke sala?”+
To keti kima ya nge ke sala lenda tuba nde: “Yandi kele ve ti maboko”?*
10 Mawa na muntu yina ke tuba na tata nde: “Inki nge me butaka?”
Mpi na nkento nde: “Inki nge ke buta?”*
11 Yehowa, Santu ya Izraele,+ Muntu yina salaka nge, me tuba nde:
“Keti beno fwete yula mono bangiufula sambu na mambu ya ke kwisaMpi kupesa mono nsiku sambu na bana na mono+ ti bisalu ya maboko na mono?
12 Mono salaka ntoto+ mpi gangaka muntu na zulu na yo.+
Mono tandulaka zulu ti maboko+ na mono mosi,Mpi mono ke pesaka bantuma na bambwetete ti na bima yonso+ yina kele kuna.”
13 “Mono me tedimisa muntu mosi na lunungu,+Mpi mono ta kumisa banzila na yandi yonso ya kusungama.
Yandi muntu ta tunga mbanza na mono+Mpi ta pesa kimpwanza+ na bantu na mono ya kimpika kukonda kufuta kima to avoka,”+ Yehowa ya makesa muntu me tuba.
14 Yehowa me tuba nde:
“Luta ya Ezipte* mpi bima ya kuteka* ya Etiopia ti ya bantu ya Sabea, bantu ya nda,Ta kwisa na nge mpi ta kuma ya nge.
Bo ta tambula na nima na nge na miniololo.
Bo ta kwisa mpi ta fukimina nge.+
Bo ta tubila nge na kisambu nde, ‘Ya kieleka Nzambi kele ti nge,+Mpi ya nkaka kele ve; Nzambi ya nkaka kele ve.’”
15 Ya kieleka nge kele Nzambi yina ke kudibumbaka,O Nzambi ya Izraele, Ngulusi.+
16 Bo ta pesa bo yonso nsoni mpi ta kulumusa bo;Bantu ya ke salaka biteki, bo yonso ta wa nsoni.+
17 Kansi Yehowa ta gulusa Izraele ti luguluku+ ya kimakulu.
Nge ta waka ve nsoni kibeni mvula na mvula.+
18 Sambu Yehowa,Ngangi ya zulu,+ Nzambi ya kieleka,Muntu yina yidikaka ntoto, Muntu yina salaka yo, yina tulaka yo ngolo,+Yina gangaka yo ve kaka sambu na mpamba,* kansi yina salaka yo sambu bantu kuzinga,+ me tuba nde:
“Mono kele Yehowa, mpi ya nkaka kele ve.
19 Mono tubaka ve na kisika+ mosi ya kubumbana, na insi mosi ya mpimpa;Mono tubilaka ve bana* ya Yakobi nde,‘Beno sosa mono kaka sambu na mpamba.’
Mono kele Yehowa, yina ke tubaka mambu yina kele ya lunungu mpi ke zabisaka mambu ya mbote.+
20 Beno vukana kumosi mpi beno kwisa.
Beno pusana kumosi, beno bantu ya me tinaka makanda.+
Bantu yina ke nataka bitekiMpi ke sambaka nzambi yina lenda gulusa bo ve,+ bo me zaba kima ve.
21 Beno pesa nsangu na beno, beno nata dikambu na beno.
Bika nde bo pesana mabanza na bumosi.
Nani tubilaka mambu yai na ntwala tuka ntamaMpi zabisaka yo tuka bantangu ya me luta?
Keti yo kele ve mono, Yehowa?
Katula mono, Nzambi ya nkaka kele ve;Katula mono,+ Nzambi ya lunungu mpi Ngulusi+ kele ve.
22 Ntoto ya mvimba, beno kwisa na mono mpi beno guluka,+Sambu mono kele Nzambi, ya nkaka kele ve.+
23 Mono me zenga kieleka na zina na mono mosi;Ndinga me basika na munoko na mono na lunungu,Mpi yo ta vutuka ve:+
Konso dibolongo ta fukimina mono,Konso ludimi ta zenga kieleka na kubikala ya kwikama+
24 Mpi ta tuba nde, ‘Lunungu ya kieleka mpi ngolo kele kibeni na Yehowa.
Bantu yonso yina ke wila yandi makasi ya ngolo ta kwisa na ntwala na yandi na nsoni.
25 Na Yehowa, bana* yonso ya Izraele ta vanda bantu ya mbote,+Mpi bo ta kudikumisa na yandi.’”
Banoti na nsi ya lutiti
^ Na kisina, “kukangula luketo.”
^ Na kisina, “ta kanga nge ngolo.”
^ To “Katuka na esti tii na westi.”
^ To “ke swana.”
^ To “tubila Muntu yina salaka yo.”
^ To mbala ya nkaka, “To keti ntoto ya tuma fwete tuba nde: ‘Kisalu na nge kele ve ti maboko’?”
^ To “Nge kele na mpasi ya kubuta sambu na kubuta inki?”
^ To mbala ya nkaka, “Bantu ya Ezipte ya ke salaka kisalu ya ngolo.”
^ To mbala ya nkaka, “mpi bantu ya mumbongo.”
^ To mbala ya nkaka, “sambu yo vanda ya mpamba.”
^ Na kisina, “nkuna.”
^ Na kisina, “nkuna.”
