Yezaya 51:1-23
51 “Beno wa mono, beno bantu yina ke landa lunungu,Beno bantu yina ke sosa Yehowa.
Beno tala ditadi yina kisika bo zengaka benoMpi dibulu yina bo basisaka beno.
2 Beno tala Abrahami tata na benoMpi Sara+ yina butaka beno.*
Sambu yandi vandaka kaka yandi mosi ntangu mono bingaka yandi,+Ebuna mono sakumunaka yandi mpi kumisaka yandi mingi.+
3 Yehowa ta lembika Sioni.+
Yandi ta lembika mayumbu na yandi yonso,+Yandi ta kumisa ntoto-makanga na yandi bonso Edeni+Mpi ntoto na yandi ya zelo na zelo bonso kilanga ya Yehowa.+
Kuyangalala ti kiese ta vanda na kati na yandi,Kupesa matondo ti nkunga ya kitoko.+
4 O bantu na mono, beno tula dikebi na mono,Dikanda na mono,+ beno widikila mono.
Sambu nsiku ta basika na munoko na mono,+Mpi mono ta tula lunungu na mono bonso nsemo sambu na bantu.+
5 Lunungu na mono me finama.+
Luguluku na mono ta basika,+Mpi maboko na mono ta sambisa bantu.+
Bisanga ta tula kivuvu na mono,+Mpi yo ta vingila diboko* na mono.
6 Beno tala na zulu;Mpi beno tala na ntoto.
Sambu zulu ta panzana bitini-bitini bonso midinga;Ntoto ta lemba bonso lele,Mpi bantu na yo ta fwa bonso bambembele.
Kansi luguluku na mono ta vanda ya mvula na mvula,+Mpi lunungu na mono ta suka ve ata fioti.*+
7 Beno wa mono, beno bantu ya me zaba lunungu,Bantu ya kele ti nsiku* na mono na ntima na bo.+
Beno wa ve boma ya masota ya bantu,Mpi beno tekita ve sambu na mafingu na bo.
8 Nselele ta dia bo kaka bonso lele;Nselele* ya bilele ta dia bo bonso lene.+
Kansi lunungu na mono ta zinga kimakulu,Mpi luguluku na mono sambu na bimvuka yonso ya bantu.”+
9 Telama na mpongi! Telama na mpongi! Lwata ngolo,O diboko ya Yehowa!+
Telama na mpongi bonso na bilumbu ya ntama, bonso na bimvuka ya bantu ya ntangu ya ntama.
Keti nge ve muntu bukaka Rahabi*+ bitini-bitini?Keti nge ve muntu tobulaka mbisi ya boma ya nzadi-mungwa?+
10 Keti nge ve muntu yumisaka nzadi-mungwa, bamasa ya mudindu ya ngolo?+
Keti nge ve muntu salaka nde bisika ya mudindu ya nzadi-mungwa kukuma nzila sambu bantu yina bo sumbaka diaka kusabuka?+
11 Bantu yina Yehowa me sumbaka diaka ta vutuka.+
Bo ta kwisa na Sioni ti milolo ya kiese,+Mpi kiese ya ke manaka ve ta vanda na zulu na bo bonso mpu.*+
Bo ta yangalala mpi ta vanda na kiese,Mpi mawa ti kudila ta tina.+
12 “Mono mosi Muntu ke lembika beno.+
Sambu na nki nge fwete wa boma ya muntu yina ta fwa+Mpi ya mwana ya muntu yina ta yuma bonso matiti ya mubisu?
13 Sambu na nki nge me vila Yehowa, Muntu yina salaka nge,+Muntu yina tandulaka zulu+ mpi tulaka fondasio ya ntoto?
Kilumbu ya mvimba nge vandaka ntangu yonso kuwa boma ya makasi ya muniokudi,*Bonso nde yandi kele ya kuyilama sambu na kufwa nge.
Ntangu yai, wapi makasi ya muniokudi yina?
14 Ntama mingi ve, bo ta yambula+ muntu yina fumbamaka na bashene;Yandi ta fwa ve mpi ta kwe- nda ve na dibulu,Yandi ta konda mpi ve dimpa.
15 Kansi mono kele Yehowa Nzambi na nge,Muntu yina ke nikisaka nzadi-mungwa mpi ke salaka nde bitembo na yo kutula makelele+—Zina na yandi Yehowa ya makesa.+
16 Mono ta tula bangogo na mono na munoko na nge,Mpi mono ta fika nge+ ti kivudi ya diboko na mono,Sambu na kutula zulu mpi kutula fondasio ya ntoto+Mpi kutuba na Sioni nde, ‘Beno kele bantu na mono.’+
17 Telama na mpongi! Telama na mpongi! Telama, O Yeruzalemi,+Nge ya me nwa na diboko ya Yehowa dikopa ya makasi na yandi.
Nge me nwa gobele;Nge me manisa dikopa yina ke pesaka lunziungu.+
18 Na kati ya bana yonso yina yandi butaka, ata mosi ve kele pana sambu na kutwadisa yandi,Mpi na kati ya bana yonso yina yandi yedisaka, ata mosi ve simbaka diboko na yandi.
19 Mambu yai zole me bwila nge.
Nani ta wila nge mawa?
Lufwa ti kubeba, nzala ti mbele ya bitumba!+
Nani ta lembika nge?+
20 Bana na nge me bwa ngambu.+
Bo me lala na binkonko ya babala-bala yonso*Bonso dimeme ya mfinda na kati ya mutambu.
Bo me fuluka ti makasi ya Yehowa, kunganina ya Nzambi na nge.”
21 Yo yina pardo wa mambu yai,O nkento ya ke mona mpasi mpi ya me lawuka, kansi vinu ve.
22 Mfumu na nge Yehowa, Nzambi na nge yina ke nwaninaka bantu na yandi, me tuba nde:
“Tala! Mono ta baka na diboko na nge dikopa ya ke pesaka lunziungu,+Gobele, dikopa ya makasi na mono;Nge ta nwa yo diaka ve ata fioti.+
23 Mono ta tula yo na diboko ya bantu yina ke monisa nge mpasi,+Bayina tubilaka nge* nde, ‘Fukama sambu beto tambula na zulu na nge!’
Yo yina nge kumisaka mukongo na nge bonso ntoto,Bonso bala-bala sambu bo luta.”
Banoti na nsi ya lutiti
^ To “yina basisaka beno ti misongo.”
^ To “ngolo.”
^ To “ta beba ve.”
^ To “malongi.”
^ To mbala ya nkaka, “Musobi.”
^ Tala Bantendula ya Bangogo.
^ Na kisina, “vanda na zulu ya ba-ntu na bo.”
^ To “ya muntu yina ke ziunga nge.”
^ Na kisina, “na ntu ya babala-bala yonso.”
^ To “moyo na nge.”
