Yobi 22:1-30
22 Elifazi+ muntu ya Temani vutulaka nde:
2 “Keti muntu lenda vanda mfunu na meso ya Nzambi?
Keti konso muntu yina kele ti mayele ya kubakisa mambu lenda vanda mfunu na meso na yandi?+
3 Kana nge kele muntu ya lunungu, keti yo me tala Nkwa-Ngolo Yonso,*To keti yandi ke bakaka luta sambu nge ke landa nzila ya kwikama?+
4 Keti yandi ta pesa nge ndolaMpi ta samba ti nge sambu nge ke zitisaka Nzambi?
5 Keti yo kele ve sambu mbi na nge kele mingi kibeniMpi bifu na nge kele ve ti nsuka?+
6 Sambu nge me simba kukonda kikuma bima yina bampangi na nge me simbisa nge sambu na mfuka,Mpi nge me katula bantu bilele na bo, nge me bika bo kinkonga.*+
7 Nge me pesa ve muntu yina me lemba masa ya kunwa,Mpi nge me yimina madia na muntu yina kele na nzala.+
8 Insi kele ya muntu ya ngolo,+Mpi muntu ya me ndimama ke zingaka na kati na yo.
9 Kansi nge vutulaka mifwidi ya bankento maboko mpamba,Mpi nge niokulaka* bana ya me konda batata.*
10 Yo yina mitambu* ke ziunga nge,+Mpi boma ya kintulumukina ke titisa nge;
11 Yo yina mpimpa kele mingi kibeni na mpila nde nge lenda mona ve,Mpi masa ya mingi ke fika nge.
12 Keti Nzambi ke vandaka ve na zulu kibeni?
Mpi tala mutindu bambwetete yonso kele na zulu kibeni.
13 Kansi nge me tuba nde: ‘Inki Nzambi me zaba kibeni?
Keti yandi lenda sambisa na mpimpa ya ngolo?
14 Matuti me fika yandi yo yina yandi ke mona veNa ntangu yandi ke tambula-tambula na nziunga* ya zulu.’
15 Keti nge ta landa nzila ya ntamaYina bantu ya mbi tambulaka,
16 Bantu yina bo me katulaka na kingolo-ngolo* na ntwala ya ntangu na bo,Bayina mvula ya ngolo*+ nataka fondasio na bo?
17 Bo vandaka kutubila Nzambi ya kieleka nde: ‘Yambula beto!’
Mpi nde, ‘Inki Nkwa-Ngolo Yonso lenda sala beto?’
18 Ata mpidina, yandi Muntu fulusaka banzo na bo ti bima ya mbote.
(Bangindu ya mbi ya mutindu yina kele ntama ti ya mono.)
19 Muntu ya lunungu ta mona diambu yai mpi ta wa kiese,Mpi muntu ya me sala mbi ve ta seka bo mpi ta tuba nde:
20 ‘Bo me fwa bambeni na beto,Mpi tiya ta yoka bitini ya nitu na bo yina me bikala.’
21 Sosa kuzaba yandi mpi nge ta vanda na ngemba;Ebuna mambu ya mbote ta kwisila nge.
22 Ndima nsiku ya ke katuka na munoko na yandi,Mpi bumba na ntima na nge mambu yina yandi ke tuba.+
23 Kana nge vutukila Nkwa-Ngolo Yonso, nge ta toma diaka;+Kana nge katula mambu ya kukonda lunungu na tenta na nge,
24 Kana nge losa wolo na nge* na mfututuMpi wolo ya Ofire+ na mabengi ya matadi,
25 Nkwa-Ngolo Yonso ta kuma wolo na nge,*Mpi yandi ta vanda arza na nge ya kuluta kitoko.
26 Mpidina kiese na nge ta vanda na Nkwa-Ngolo Yonso,Mpi nge ta nangula luse na nge na ndambu ya Nzambi.
27 Nge ta bondila yandi, mpi yandi ta wa nge;Ebuna nge ta lungisa balusilu na nge.
28 Konso kima yina nge ke kana kusala ta nunga,Mpi nsemo ta sema na nzila na nge.
29 Sambu nge ta wa nsoni ntangu nge ta tuba na lulendo yonso,Kansi yandi ta gulusa muntu ya kudikulumusa.*
30 Yandi ta gulusa bantu yina me sala mbi ve;Yo yina kana maboko na nge kele bunkete, nge ta guluka kibeni.”
Banoti na nsi ya lutiti
^ To “keti yo ke sepedisaka Nkwa-Ngolo Yonso.”
^ Na kisina, “me katula bilele ya bantu yina kele kinkonga.”
^ Na kisina, “tutaka maboko ya.”
^ To “ya bana-nsiona.”
^ Na kisina, “mitambu ya bandeke.”
^ To “nkongolo.”
^ To “bo kumisaka luzingu na bo nkufi.”
^ Na kisina, “nzadi.”
^ To “tu-bitini na nge ya wolo.”
^ To “tu-bitini na nge ya wolo.”
^ To “muntu yina kele ti meso ya ke tala na ntoto.”
