Yobi 32:1-22
32 Ebuna babakala yai tatu yambulaka kusosa kupesa Yobi mvutu, sambu yandi vandaka kundima kibeni lunungu na yandi mosi.*+
2 Kansi Elihu mwana ya Barakele muntu ya Buze+ ya dibuta ya Rami waka makasi mingi. Yandi wilaka Yobi makasi sambu yandi vandaka kusosa kudimonisa muntu ya mbote* na kisika ya Nzambi.+
3 Yandi wilaka mpi banduku tatu ya Yobi makasi mingi sambu bo kukaka ve kuzwa mvutu ya kupesa, kansi bo tubaka nde Nzambi kele muntu ya mbi.+
4 Elihu vandaka kuvingila sambu na kupesa Yobi mvutu, sambu bo vandaka bambuta na yandi.+
5 Ntangu Elihu monaka nde babakala yina tatu vandaka ve ata ti mvutu ya kupesa, makasi na yandi kumaka ngolo kibeni.
6 Yo yina Elihu mwana ya Barakele muntu ya Buze yantikaka kutuba nde:
“Mono kele leke*Mpi beno kele bambuta.+
Yo yina na luzitu yonso mono buyaka kutuba,+Mpi mono zolaka ve kusonga beno mambu yina mono me zaba.
7 Mono yindulaka nde, ‘Bika kimbuta* kutuba,Mpi bika bamvula ya mingi kuzabisa mayele.’
8 Kansi yo kele mpeve na kati ya bantu,Mpema ya Nkwa-Ngolo Yonso, yina ke pesaka bo mayele ya kubakisa mambu.+
9 Kimbuta yo mosi* ke kumisaka ve muntu mayele,Bambuta kaka mpi ve bantu ke bakisaka mambu ya mbote.+
10 Yo yina mono ke tuba nde, ‘Beno wa mono,Ebuna mono ta songa beno mpi mambu yina mono me zaba.’
11 Tala! Mono vandaka kuvingila mambu ya beno vandaka kutuba;Mono landaka kuwa bangindu na beno,+Ntangu beno vandaka kusosa mambu ya kutuba.+
12 Mono tudilaka beno dikebi mbote-mbote,Kansi ata muntu mosi ve na kati na beno lendaka kumonisa nde Yobi kele na kifu*To kupesa mvutu na bangindu na yandi.
13 Yo yina beno tuba ve nde, ‘Beto me mona mayele;Yo kele Nzambi muntu me bedisa yandi, kansi muntu ve.’
14 Mambu yina yandi vandaka kutuba, yandi vandaka kutuba yo ve na mono,Yo yina mono ta vutudila yandi ve mvutu ti bangindu na beno.
15 Bo ke wa boma, bo kele diaka ve ti bamvutu ya kupesa;Bo kele ve ti kima ya nkaka ya kutuba.
16 Mono me vingila, kansi bo ke tuba diaka ve;Bo me telama kaka pana, mvutu ya nkaka kele ve.
17 Yo yina mono mpi ta pesa mvutu;Mono mpi ta tuba mambu ya mono me zaba,
18 Mono kele ti mambu mingi ya kutuba;Mpeve yina kele na kati na mono ke pusa mono na kutuba.
19 Kati na mono kele bonso vinu yina kele ve ti dibulu ya mupepe;Bonso mabungu ya mpa ya vinu ya mpusu ya mbisi ya ke zola kupasuka.+
20 Beno bika mono, mono tuba sambu mono lembama!
Mono ta kangula munoko na mono mpi ta pesa mvutu.
21 Mono ta monisa ve kikalulu ya kupona-pona ata na muntu mosi;+Mono ta leba mpi ve ata* muntu mosi,
22 Sambu mono me zaba ve mutindu bo ke lebaka;Kana mono zabaka, Muntu yina salaka mono zolaka kufwa mono nswalu.
Banoti na nsi ya lutiti
^ To “sambu yandi vandaka muntu ya lunungu na meso na yandi mosi.”
^ To “nde moyo na yandi vandaka.”
^ Na kisina, “fioti na bilumbu.”
^ Na kisina, “bilumbu.”
^ To “Bilumbu mingi yo mosi.”
^ To “lendaka kunganina Yobi.”
^ To “Mono ta pesa mpi ve titre ya lukumu na.”
