Yonasi 1:1-17
1 Ndinga ya Yehowa kwisilaka Yonasi*+ mwana ya Amitai nde:
2 “Telama, kwenda na Ninive+ mbanza ya nene, mpi samuna nde mono ta sambisa yo, sambu mambu na bo ya mbi me kuma tii na ntwala na mono.”
3 Kansi Yonasi telamaka sambu na kutina Yehowa, yandi kwendaka na Tarsisi; yandi kulumukaka na Yope mpi monaka maswa mosi yina vandaka kukwenda na Tarsisi. Yo yina yandi futaka tike mpi kotaka sambu na kukwenda ti bo na Tarsisi, ntama ti Yehowa.
4 Ebuna Yehowa tindaka mupepe mosi ya ngolo na nzadi-mungwa, mpi mupepe vandaka ngolo kibeni na nzadi-mungwa na mpila nde maswa zolaka kupanzana.
5 Bantu ya ke salaka na maswa waka boma ya ngolo, yo yina konso muntu yantikaka kubinga nzambi na yandi sambu na kulomba lusadisu. Ebuna bo yantikaka kulosa bima yina vandaka na maswa na nzadi-mungwa, sambu na kukumisa yo pepele.+ Kansi Yonasi kulumukaka na nsi ya kibeya ya maswa,* kuna yandi lalaka mpi mpongi ya ngolo simbaka yandi.
6 Kapitene ya maswa pusanaka mpi tubilaka yandi nde: “Sambu na nki nge ke lala? Telama, binga nzambi na nge! Mbala ya nkaka Nzambi ya kieleka ta tudila beto dikebi, mpi beto ta fwa ve.”+
7 Ebuna bo tubaka bo na bo nde: “Beno kwisa, beto bula zeke+ sambu na kuzaba mpasi yai me kwisila beto sambu na nani.” Bo bulaka zeke, mpi yo bwaka na Yonasi.+
8 Bo tubilaka yandi nde: “Pardo songa beto, mpasi yai me kwisila beto sambu na nani? Nge ke salaka nki, mpi nge me katuka na wapi? Inki kele insi na nge, mpi nge kele muntu ya nki dikanda?”
9 Yandi vutulaka nde: “Mono kele Mu-Ebreo, mono ke waka Yehowa Nzambi ya zulu boma, Muntu yina salaka nzadi-mungwa mpi ntoto ya kuyuma.”
10 Ebuna bantu yina waka diaka boma mingi kuluta, mpi bo yulaka yandi nde: “Inki mambu nge me sala?” (Bantu yina waka nde yandi vandaka kutina Yehowa, sambu yandi zabisaka bo yo.)
11 Yo yina bo songaka yandi nde: “Beto fwete sala nge nki sambu nzadi-mungwa kukuma pima?” Sambu nzadi-mungwa vandaka kaka kunikana ngolo.
12 Yandi vutulaka nde: “Beno tombula mono mpi beno losa mono na nzadi-mungwa, ebuna nzadi-mungwa ta kuma pima; sambu mono me zaba nde mupepe yai ya ngolo me kwisila beno sambu na mono.”
13 Kansi bantu yina lukaka nkayi ngolo* sambu na kuvutula maswa na mukidi, kansi bo kukaka ve, sambu nzadi-mungwa vandaka kaka kunikana ngolo kibeni na nziunga na bo.
14 Ebuna bo bingaka Yehowa mpi tubaka nde: “A, Yehowa, pardo, kubika ve nde beto fwa sambu na muntu yai!* Kutula ve menga ya muntu ya me sala kima ve na ntu na beto, sambu nge me sala mambu mutindu nge monaka mbote, O Yehowa.”
15 Na nima bo tombulaka Yonasi mpi losaka yandi na nzadi-mungwa; mpi nzadi-mungwa kumaka pima.
16 Ebuna boma ya ngolo ya Yehowa+ simbaka bantu yina, bo pesaka Yehowa kimenga mpi bo salaka balusilu.
17 Kansi, Yehowa tindaka mbisi mosi ya nene ya masa sambu yo mina Yonasi, yo yina Yonasi vandaka na divumu ya mbisi yina bilumbu tatu mpi bampimpa tatu.+
Banoti na nsi ya lutiti
^ Yo ke tendula “Pizio.”
^ Na kisina, “na nsi kibeni ya maswa.”
^ To “salaka ngolo sambu na kuzwa nzila ya kuluta.”
^ To “sambu na moyo ya muntu yai!”
