Yozue 1:1-18
1 Na nima ya lufwa ya Moize nsadi ya Yehowa, Yehowa tubilaka Yozue*+ mwana ya Nuni, nsadi+ ya Moize nde:
2 Moize nsadi na mono me fwa.+ Telama ntangu yai, sabuka Yordani, nge ti bantu yai yonso, mpi kota na insi yina mono ke pesa bo, bantu ya Izraele.+
3 Mono ta pesa beno konso kisika yina beno ta tula dikulu na beno, kaka mutindu mono silaka Moize.+
4 Teritware na beno ta yantika na ntoto-makanga tii na Libani mpi tii na nzadi ya nene, Efrate—insi ya mvimba ya bantu ya Heti+—mpi tii na Nzadi-Mungwa ya Nene* na westi.*+
5 Muntu mosi ve ta kuka kubedisa nge ntangu nge kele na luzingu.+ Kaka mutindu mono vandaka ti Moize, mono ta vanda mpi ti nge.+ Mono ta bikisa nge ve mpi ta yambula nge ve.+
6 Vanda kikesa mpi ngolo,+ sambu nge muntu ta nata bantu yai na kubaka ntoto yina mono zengaka kieleka na ba-nkaka na bo nde mono ta pesa bo.+
7 Vanda kaka kikesa mpi ngolo mingi, mpi zitisa mbote-mbote Nsiku yonso yina nsadi na mono Moize pesaka nge. Kuyambula yo ve sambu na kukwenda na diboko ya kitata to na diboko ya kimama,+ sambu nge sala mambu na mayele konso kisika ya nge ke kwenda.+
8 Mukanda yai ya Nsiku fwete katuka ve na munoko na nge,+ mpi nge fwete tanga yo na ndinga ya nsi* mpimpa ti mwini, sambu na kuzitisa mbote-mbote mambu yonso ya bo me sonika na mukanda yina;+ mpidina nge ta nunga, mpi nge ta sala mambu na mayele.+
9 Keti mono me pesa nge ve nsiku? Vanda kikesa mpi ngolo. Kutekita ve mpi kuwa boma ve, sambu Yehowa Nzambi na nge kele ti nge konso kisika yina nge ke kwenda.”+
10 Ebuna Yozue songaka bakapita ya bantu nde:
11 “Beno luta na camp ya mvimba mpi beno songa bantu nde, ‘Beno yidika madia, sambu na nima ya bilumbu tatu beno ta sabuka Yordani sambu na kutoka mpi kubaka insi yina Yehowa Nzambi na beno ke pesa beno na kubaka.’”+
12 Ebuna Yozue tubilaka bana ya Rubeni, bana ya Gadi, mpi ndambu ya dikanda ya Manase nde:
13 “Beno yibuka mambu yina Moize nsadi ya Yehowa songaka beno:+ ‘Yehowa Nzambi na beno ke pesa beno ngemba mpi me pesa beno insi yai.
14 Bankento na beno, bana na beno, mpi bitwisi na beno ta zinga na insi yina Moize me pesa beno na simu yai* ya Yordani,+ kansi beno yonso basoda ya ngolo+ fwete sabuka na ndonga ya bitumba na ntwala ya bampangi na beno.+ Beno fwete sadisa bo
15 tii kuna Yehowa ta pesa bampangi na beno ngemba, kaka mutindu yandi me pesa beno ngemba, ebuna bo mpi ta baka insi yina Yehowa Nzambi na beno ke pesa bo. Na nima, beno ta vutuka na insi yina bo pesaka beno na kuzinga mpi na kubaka, insi yina Moize nsadi ya Yehowa pesaka beno na ndambu ya esti ya Yordani.’”+
16 Bo vutudilaka Yozue nde: “Beto ta sala mambu yonso ya nge me songa beto, mpi beto ta kwenda konso kisika ya nge ta tinda beto.+
17 Beto ta wila nge na mambu yonso kaka mutindu beto wilaka Moize. Bika kaka nde Yehowa Nzambi na nge kuvanda ti nge mutindu yandi vandaka ti Moize.+
18 Konso muntu yina ta kolama na nsiku na nge mpi ta lemfuka ve na konso nsiku yina nge ta pesa yandi, bo ta fwa yandi.+ Vanda kaka kikesa mpi ngolo.”+
Banoti na nsi ya lutiti
^ To “Yehozue,” disongidila “Yehowa Kele Luguluku.”
^ Disongidila, Nzadi-Mungwa ya Mediterane.
^ To “na ndambu yina ntangu ke dindaka.”
^ To “yindulula yo.”
^ Disongidila, ndambu ya esti.
