Yozue 13:1-33
13 Kansi Yozue vandaka me nuna mpi vandaka ti bamvula mingi.+ Ebuna Yehowa tubilaka yandi nde: “Nge me nuna mpi nge me kuma ti bamvula mingi; kansi ntoto yina me bikala ya beno fwete baka* kele nene.
2 Ntoto yina me bikala+ yo yai: ntoto yonso ya bantu ya Filistia mpi ya bantu ya Geshure+
3 (yantika na kitini ya Nile* yina kele na esti ya* Ezipte tii na ndilu ya Ekroni na nordi, yina bo vandaka kutadila ntete bonso teritware ya bantu ya Kanana)+ mpi ntoto ya bamfumu tanu ya bantu ya Filistia+—bantu ya Gaza, bantu ya Ashdodi,+ bantu ya Ashkeloni,+ bantu ya Gati,+ mpi bantu ya Ekroni;+ ntoto ya bantu ya Avi+
4 na sudi; insi ya mvimba ya bantu ya Kanana; Meara, yina kele ya bantu ya Sidoni,+ tii na Afeki, na ndilu ya bantu ya Amore;
5 ntoto ya bantu ya Gebale+ mpi Libani ya mvimba na ndambu ya esti, yantika na Baale-gadi na nsi ya Ngumba ya Ermoni tii na Lebo-amati;*+
6 bantu yonso ya ke zingaka na ntoto ya bangumba, yantika na Libani+ tii na Misrefoti-mayimi;+ mpi bantu yonso ya Sidoni.+ Mono ta kula bo na ntwala ya bantu ya Izraele.+ Nge fwete pesa yo na bana ya Izraele bonso dikabu, kaka mutindu mono songaka nge.+
7 Ntangu yai nge fwete kabisa ntoto yai bonso dikabu na makanda uvwa mpi na ndambu ya dikanda ya Manase.”+
8 Ndambu ya nkaka ya dikanda ya Manase, bana ya Rubeni mpi bana ya Gadi bakaka dikabu na bo yina Moize pesaka bo na ndambu ya esti ya Yordani, kaka mutindu Moize nsadi ya Yehowa pesaka bo:+
9 yantika na Aroere,+ yina kele na ndilu ya Muwanda ya Arnoni,+ mpi mbanza yina kele na kati-kati ya muwanda, mpi ngumba ya mvimba ya Medeba tii na Diboni;
10 mpi bambanza yonso ya Sihoni ntotila ya bantu ya Amore, yina vandaka kuyala na Eshboni, tii na ndilu ya bantu ya Amoni;+
11 diaka Gileadi mpi teritware ya bantu ya Geshure mpi ya bantu ya Maakati+ mpi Ngumba ya Ermoni yonso mpi Bashani+ ya mvimba tii na Saleka;+
12 mpi ntoto yonso ya kimfumu ya Ogi na Bashani, yina vandaka kuyala na Ashtaroti mpi na Edrei. (Yandi vandaka na kati ya bantu ya nsuka ya Refayimi.)+ Moize bedisaka bo mpi kulaka bo.*+
13 Kansi bantu ya Izraele kulaka ve*+ bantu ya Geshure mpi ya Maakati, sambu bantu ya Geshure ti bantu ya Maakati ke zingaka na kati ya Izraele tii bubu yai.
14 Kaka na dikanda ya Balevi mpamba yandi pesaka ve dikabu.+ Makabu ya bo ke yokaka na tiya sambu na Yehowa Nzambi ya Izraele kele dikabu na bo,+ kaka mutindu yandi silaka bo.+
15 Na nima Moize pesaka dikabu na dikanda ya bana ya Rubeni, na kutadila mabuta na bo,
16 mpi teritware na bo vandaka yantika na Aroere, yina kele na ndilu ya Muwanda ya Arnoni, mpi mbanza yina kele na kati-kati ya muwanda, mpi ngumba ya mvimba ya Medeba;
17 Eshboni mpi babwala na yo+ yonso yina kele na zulu ya ngumba, Diboni, Bamoti-baale, Bete-baale-meoni,+
18 Yahasi,+ Kedemoti,+ Mefaati,+
19 Kiriatayimi, Sibma,+ mpi Sereti-shahare na ngumba ya muwanda,*
20 Bete-peore, bangumba ya Pisga,+ Bete-yeshimoti,+
21 bambanza yonso ya ngumba, mpi ntoto yonso ya kimfumu ya Sihoni ntotila ya bantu ya Amore, yina vandaka kuyala na Eshboni.+ Moize bedisaka yandi+ mpi bamfumu yai ya Madiani: Evi, Rekemi, Sure, Hure, mpi Reba,+ bayina vandaka na nsi ya kiyeka ya Sihoni, yina vandaka kuzinga na insi yina.
22 Balami+ mwana ya Beore, nganga-ngombo,+ vandaka na kati ya bantu yina bantu ya Izraele fwaka ti mbele ya bitumba, kumosi ti bantu ya nkaka yina bo fwaka.
23 Ndilu ya bana ya Rubeni vandaka Yordani; mpi teritware yai vandaka dikabu ya bana ya Rubeni na kutadila mabuta na bo, ti bambanza mpi babwala na yo.
24 Diaka, Moize pesaka dikabu na dikanda ya Gadi, na bana ya Gadi na kutadila mabuta na bo,
25 mpi teritware na bo vandaka: Yazere+ mpi bambanza yonso ya Gileadi mpi ndambu ya insi ya bantu ya Amoni+ tii na Aroere, yina ke talana ti Raba;+
26 mpi yantika Eshboni+ tii na Ramati-mispe mpi Betonimi, mpi yantika na Mahanayimi+ tii na ndilu ya Debire;
27 mpi na muwanda,* Bete-arami, Bete-nimra,+ Sukoti,+ mpi Safoni, ntoto yina bikalaka ya kimfumu ya Sihoni ntotila ya Eshboni,+ Yordani vandaka ndilu yantika na nsuka ya sudi ya Nzadi-Mungwa ya Kinereti*+ na ndambu ya esti ya Yordani.
28 Yai vandaka dikabu ya bana ya Gadi na kutadila mabuta na bo, ti bambanza mpi babwala na yo.
29 Diaka Moize pesaka dikabu na ndambu ya dikanda ya Manase, na ndambu ya dikanda ya Manase na kutadila mabuta na bo.+
30 Teritware na bo yantikaka na Mahanayimi+ mpi yo bakaka Bashani ya mvimba, ntoto yonso ya kimfumu ya Ogi ntotila ya Bashani, mpi babwala yonso ya batenta ya Yaire+ na Bashani, babwala 60.
31 Ndambu ya Gileadi, mpi Ashtaroti ti Edrei,+ bambanza ya ntoto ya kimfumu ya Ogi na Bashani, bo pesaka yo na bana ya Makire+ mwana ya Manase, na ndambu ya bana ya Makire na kutadila mabuta na bo.
32 Yai dikabu yina Moize pesaka bo na ntoto ya zelo na zelo ya Moabi na simu ya Yordani, na esti ya Yeriko.+
33 Kansi Moize pesaka ve dikabu+ na dikanda ya Balevi. Yehowa Nzambi ya Izraele kele dikabu na bo, kaka mutindu yandi silaka bo.+
Banoti na nsi ya lutiti
^ To “botula.”
^ Na kisina, “na ntwala ya.”
^ To “yantika na Shihore.”
^ To “kisika ya kukotila na Amati.”
^ To “botulaka ntoto na bo.”
^ To “botulaka ve ntoto ya.”
^ To “ntoto ya kukonda ngumba.”
^ Disongidila, dizanga ya Genezareti, to Nzadi-Mungwa ya Galilea.
^ To “ntoto ya kukonda ngumba.”
