Yude 1:1-25
1 Mono Yude, mpika ya Yezu Kristu, kansi mpangi ya Yakobo,+ mono ke sonikila bantu ya bo me bingaka+ yina Nzambi, Tata na beto ke zolaka mpi bayina bo me bumbaka sambu na Yezu Kristu:+
2 Mawa, ngemba, mpi zola kukuma mingi na kati na beno.
3 Bampangi ya mono ke zolaka mingi, ata mono vandaka kusala ngolo sambu na kusonikila beno mambu yina me tala luguluku yina beto kele na yo na kimvuka,+ mono monaka nde yo kele mfunu na kusonikila beno sambu na kusiamisa beno na kunwana ngolo kibeni sambu na lukwikilu+ yina bo me pesaka basantu mbala mosi mpamba.
4 Mono ke sonikila beno sambu bantu ya nkaka me kotaka na kati na beno, bantu yina bo me solaka tuka ntama na Masonuku sambu na lusambisu yai; bo kele bantu yina ke vwezaka Nzambi, bo ke sobaka ntima ya mbote ya nene ya Nzambi na beto mpi bo ke kumisaka yo kikuma ya kusala mambu ya mbi kukonda nsoni*+ mpi bo ke buyaka munkwa na beto mosi kaka mpi Mfumu, Yezu Kristu.+
5 Ata beno me zaba mambu yai yonso mbote-mbote, mono ke zola kuyibusa beno nde Yehowa* gulusaka bantu na insi ya Ezipte,+ kansi na nima yandi fwaka bantu yina kwikilaka ve.+
6 Ebuna bawanzio yina taninaka ve kisika na bo ya luyantiku kansi yina yambulaka kisika yina bo vandaka kuzinga,+ yandi me bumbaka bo ti miniololo ya kimakulu na mpimpa ya ngolo kibeni sambu na kusambisa ya kilumbu ya nene.+
7 Mutindu mosi mpi Sodome ti Gomore ti bambanza yina vandaka pene-pene na bo kudipesaka mpi na pite* ya mingi, mpi bo lungisaka banzala ya kinsuni+ na mutindu yina me fwana ve; bo bakaka ndola ya tiya ya mvula na mvula,+ mpi na mutindu yina bo kele mbandu ya ke kebisa sambu na beto.
8 Ata mpidina, bantu yai ke kudipesa mpi na bandosi, bo ke bebisa nitu, bo ke vweza kiyeka, mpi bo ke finga bantu ya nkembo.+
9 Kansi, ntangu Mikaele,+ mfumu ya bawanzio,+ tulaka ntembe ti Diabulu mpi tubanaka ti yandi sambu na nitu ya Moize,+ yandi mekaka ve kusambisa yandi mpi kutubila yandi ti mafingu,+ kansi yandi tubaka nde: “Bika Yehowa* kunganina nge.”+
10 Kansi bantu yai ke vweza mambu yonso yina bo ke bakisa kibeni ve.+ Mpi na mambu yonso yina bo ke bakisa kukonda kuyindula bonso bambisi ya me konda mayele,+ bo ke landa na kudibebisa.
11 Mawa na bo, sambu bo me landaka nzila ya Kaini,+ mpi bo me kudikotisaka nswalu na nzila ya mbi ya Balami+ sambu na kubaka lufutu, mpi bo me fwaka sambu bo tubaka mambu ya kukolama+ bonso Kora!+
12 Bo kele matadi yina me bumbanaka na nsi ya masa na bankinsi ya beno ke salaka sambu na kumonisa zola+ ntangu bo ke diaka ti beno, bo kele bangungudi yina ke diaka bo mosi kukonda boma;+ bo kele matuti ya kukonda masa yina mupepe ke nataka ndambu na ndambu;+ bo kele banti ya ke butaka ve mbuma kana ntangu na yo me lunga, yo me fwaka mbala zole* mpi bo me tumunaka yo;
13 bo kele bitembo ya ngolo ya nzadi-mungwa yina ke basisaka mafulu-fulu sambu na nsoni na bo mosi;+ bo kele bambwetete yina kele ve ti nzila ya sikisiki, yina bo me bumbilaka mpimpa ya ngolo kibeni kimakulu.+
14 Ya kieleka, Enoki,+ muntu ya nsambwadi na ndonga ya bantu katuka na Adami, bikulaka mpi sambu na bo ntangu yandi tubaka nde: “Beno tala, Yehowa* kwisaka ti bamiriade* na yandi ya santu+
15 sambu na kusambisa bantu yonso,+ mpi kubedisa bantu yonso yina ke vwezaka Nzambi sambu na bisalu na bo yonso ya kuvweza Nzambi yina bo me salaka, mpi sambu na mambu yonso ya mbi yina bansumuki yina ke vwezaka Nzambi tubaka sambu na yandi.”+
16 Bantu yai ke bokutaka+ mpi ke dila-dilaka sambu na luzingu na bo, bo ke landaka banzala na bo mosi,+ mpi minoko na bo ke tubaka mambu ya lulendo mingi, ntangu bo ke lebaka bankaka sambu na mambote na bo mosi.+
17 Kansi beno, bampangi ya mono ke zolaka mingi, beno yibuka mambu yina bantumwa ya Mfumu na beto Yezu Kristu tubaka ntete,
18 ntangu bo vandaka kutubila beno nde: “Na ntangu ya nsuka, ta vanda ti bantu ya ke sekaka, bo ta landa banzala na bo mosi ya mambu ya kuvweza Nzambi.”+
19 Bo bantu ke kotisaka kukabwana,+ bo kele bonso bambisi,* bo kele ve ti mpeve ya Nzambi.
20 Kansi beno, bampangi ya mono ke zolaka mingi, beno kuditunga na zulu ya lukwikilu na beno ya kuluta santu mpi beno samba ti mpeve santu+
21 sambu beno bikala na zola ya Nzambi,+ ntangu beno ke vingila mawa ya Mfumu na beto Yezu Kristu yina ke nata na luzingu ya mvula na mvula.+
22 Diaka, bantu ya nkaka yina ke tula ntembe,+ beno landa kuwila bo mawa;+
23 beno katula bo+ na tiya sambu na kugulusa bo. Kansi beno landa kuwila bantu ya nkaka mawa, beno sala yo ti boma, na ntangu beno ke menga ata bilele yina nitu me bebisaka.+
24 Ntangu yai, na muntu yina lenda tanina beno sambu beno bula ve sakuba mpi kusala nde beno vanda ya kukonda mvindu+ na ntwala ya nkembo na yandi ti kiese mingi,
25 na Nzambi mosi kaka Ngulusi na beto na nzila ya Yezu Kristu, Mfumu na beto, kuvanda nkembo, bunene, ngolo, mpi kiyeka katuka na ntangu yonso ya me lutaka, bubu yai, mpi na ntangu yonso ya kukonda nsuka. Amen.
Banoti na nsi ya lutiti
^ Na kisina, “mambu ya poto-poto.” Na Kigreki, a·selʹgei·a. Tala Bantendula ya Bangogo.
^ Tala Bangindu ya Ngika A5.
^ Tala Bantendula ya Bangogo.
^ Tala Bangindu ya Ngika A5.
^ To “me fwaka kimakulu.”
^ Tala Bangindu ya Ngika A5.
^ To “makumi ya mafunda.”
^ To “bantu ya kinsuni.”
