Konso mvula, bansadi ya Yehowa ke vingilaka na kiese yonso kusala Nkinsi ya Kuyibuka Lufwa ya Yezu. Na bamposo ya ntwala mpi ya nima ya Nkinsi ya Kuyibuka Lufwa ya Yezu, beto ke salaka mambu mingi ya mfunu sambu na kukumisa Yehowa mpi kupesa yandi mersi sambu na kimenga ya Yezu. (Efe 1:3, 7) Mu mbandu, beto ke salaka yonso sambu na kubingisa bantu na Nkinsi ya Kuyibuka Lufwa ya Yezu. Bampangi ya nkaka ke yilamaka sambu bo kuma bapasudi-nzila nsadisi mpi sambu bo pesa bangunga 30 to 50 na bangonda ya mars to avril. Keti nge ta zola kulonga mingi nsangu ya mbote na nsungi ya Nkinsi ya Kuyibuka Lufwa ya Yezu? Inki lenda sadisa nge na kusala yo?

Beto lenda sala yo kana beto yilama na ntwala. (Bin 21:5) Sambu nsungi ya Nkinsi ya Kuyibuka Lufwa ya Yezu me kuma pene-pene, beto fwete banda kuyilama bubu yai. Yindula mutindu nge lenda longa mingi nsangu ya mbote na Nkinsi ya Kuyibuka Lufwa ya Yezu mpi yindula mambu yina nge fwete sala sambu na kulungisa balukanu na nge. Na nima, lomba Yehowa na kusakumuna bikesa na nge.​—1Yn 5:14, 15.

Keti nge lenda yindula mambu yina nge fwete sala sambu na kulonga mingi nsangu ya mbote na nsungi ya Nkinsi ya Kuyibuka Lufwa ya Yezu?