Na ngonda ya Septembre, beto ta sadila kamukanda Zinga Mvula na Mvula! sambu na kulonguka Biblia ti bantu. Bansamuni lenda kuma bapasudi-nzila nsadisi yina ke pesaka bangunga 30. Inki mutindu beto ta pesa maboko na kampani yai ya sipesiali?

• Na Mbala ya Ntete ya Nge Me Kutana ti Muntu, Sadila nima ya lutiti ya nsuka ya kamukanda yai sambu na kubenda dikebi ya muwi mpi songa yandi mutindu beto ke longukaka Biblia ti bantu. Kuvila ve bantu yina monisaka nde bo kele ti mfunu ya kulonguka Biblia mpi bantu yina nge vutukilaka. Ata bo buyaka kulonguka Biblia na bilumbu me luta, mbala ya nkaka bo lenda ndima kulonguka na bametode yai ya mpa ya beto ke sadila to kamukanda yai. Beto lenda pesa ve to kutinda kamukanda yai na bantu yina ndimaka ve kulonguka Biblia sambu na mbala ya ntete. Komite ya Kisalu ya Dibundu lenda yidika mambu sambu na kuyika balukutakanu ya kisalu ya kusamuna yina ta salama na ngonda yai.

• Mabaku ya Nkaka: Kana dibundu na beno ke sadilaka bashario ya mikanda, beno tula kamukanda Zinga Mvula na Mvula! Songa bantu yina me monisa mpusa nde kana bo me baka kamukanda yai, bo lenda longuka mpi Biblia ya ofele. Ntangu nge ke solula ti muntu, songa yandi na bunkufi mutindu beto ke longukaka Biblia ti bantu to yilama sambu na kusala yo na nima. Nkengi na Kisalu lenda songa bampangi yina ke longaka mbote na kukwenda bisika yina bantu ke salaka mumbongo sambu na kubanda kulonguka Biblia ti bantu. Nge lenda longuka mpi Biblia ti banduku na nge ya kisalu to bantu yina nge ke kutana ti bo.

Yezu lombaka beto na ‘kukumisa bantu balongoki,’ mpi na ‘kulonga bo.’ (Mat 28:19, 20) Bika nde kampani yai ya sipesiali kusadisa beto na kulungisa mambu yai ntangu beto ke sadila kamukanda Zinga Mvula na Mvula!