Biblia me fuluka ti bisambu yina Yehowa pesaka bamvutu. Ntangu bansadi ya Nzambi ya ntangu ya ntama monaka mutindu Yehowa waka bisambu na bo na mambu ya mpasi yina bo kutanaka ti yo mpi mutindu yandi sadisaka bo, ntembe kele ve nde yo kumisaka lukwikilu na bo ngolo. Yo kele mfunu na kusonga Yehowa mambu na beto na kisambu mpi beto sosa kuzaba mutindu yandi ke pesa mvutu na bisambu na beto. Beto simba nde Yehowa lenda pesa beto mvutu na mutindu yina beto yindulaka ve. (2Bk 12:7-9; Efe 3:20) Inki mvutu Yehowa lenda pesa na bisambu na beto?

• Yandi lenda pesa beto ngolo ya nitu, mabanza ya mbote mpi ngolo ya kukanga ntima na mambu ya mpasi yina beto ke kutana ti yo.—Fil 4:13

• Yandi lenda pesa beto mayele ya kubaka badesizio ya mbote.—Yak 1:5

• Yandi lenda pesa beto nzala ti ngolo ya kusala mambu.—Fil 2:13

• Yandi lenda pesa beto ngemba ntangu beto ke kudiyangisa.—Fil 4:6, 7

• Yandi lenda sadila bantu ya nkaka sambu na kupesa beto bima yina beto kele na yo mfunu mpi kikesa.—1Yn 3:17, 18

• Yandi lenda sadisa bampangi yina beto ke samba sambu na bo.—Bis 12:5, 11

SONGA VIDEO YEHOWA “MUNTU YA KE WAKA KISAMBU” MPI NA NIMA BENO PESA BAMVUTU NA BANGIUFULA YAI:

• Inki mutindu mbandu ya mpangi Shimizu ke pesa beto kikesa kana beto ke kuka diaka ve kusala mambu yina beto vandaka kusala sambu beto ke bela?

• Inki mutindu beto lenda landa mbandu ya mpangi Shimizu?