Yezu vandaka kusadila mambu yina vandaka kusalama sambu na kulonga bantu. (Luk 13:1-5) Nge lenda sadila mpi mambu yina ke salama sambu na kubenda dikebi ya bantu na kisalu ya kulonga. Na nima ya kutubila mutindu mbongo me kuma mpasi, kisumbula ya lugangu mosi yina me salama, mavwanga ya politiki, mutindu bantu ke bika ve kunwa bima yina ke lawusaka to diambu ya nkaka ya mutindu mosi, yula muntu ngiufula yina ta pusa yandi na kuyindula. Mu mbandu: “Keti nge ke yindula nde kilumbu kele mambu yai ta mana?” to “Nge ke yindula nde nki lenda manisa mambu yai?” Na nima, tangila yandi verse mosi ya ke wakana ti diambu ya beno me tubila. Kana muntu yango me sepela, benda dikebi na yandi na video to mukanda mosi ya kele na Bisadilu Sambu na Kulonga. Kana beto ke sala yonso sambu na kusimba ntima ya bantu ya teritware na beto, beto lenda “sala mambu yonso sambu na nsangu ya mbote.”—1Bk 9:22, 23.

Inki mambu lenda benda dikebi ya bantu na teritware na beno?