Biblia ya bo me kotisaka ndinga kele nki? Yo kele Biblia​—Mbalula ya Nsi-Ntoto ya Mpa yina bo me tomisaka mpi yina bo me kotisaka ndinga. Bo ke basisaka yo malembe-malembe na bandinga mingi. Yo kele ti bima mingi ya kitoko. Mu mbandu, bo ke sadilaka bandinga ya bantu ya kuswaswana sambu na konso muntu yina Biblia ke tubilaka. Bo ke tangaka bangogo mbote kibeni mpi bo ke basisaka mawi ntangu bo ke tanga sambu na kubasisa mbote nsangu ya Biblia.

Inki mutindu bantu ya nkaka ke bakaka mambote na Biblia yina bo me kotisaka ndinga? Bantu mingi yina ke landaka Biblia yina bo me kotisaka ndinga ke zolaka yo sambu yo ke sadisaka bo kibeni na kumona na mabanza mambu yina bo ke landa. Ntangu bo ke widikilaka ndinga ya konso muntu yina Biblia ke tubilaka, bo ke monaka na mabanza mambu yina salamaka ya kele na Biblia mpi bo ke bakisaka mbote kibeni mambu yina bo me sonikaka. (Bin 4:5) Diaka, bantu mingi ke bakisaka nde ntangu bo ke landaka Biblia yina bo me kotisaka ndinga, yo ke lembikaka bo ntangu bo kele ti basusi.​—Nk 94:19.

Kuwidikila lutangu ya Ndinga ya Nzambi yina bo ke tanga na ndinga ya ngolo lenda sadisa beto mingi kibeni. (2Bs 34:19-21) Kana Biblia yina bo me kotisaka ndinga kele ya kitini to ya mvimba na ndinga yina nge ke bakisaka mbote, nge lenda kuma kulanda yo mbala na mbala.

SONGA VIDEO MUTINDU BO KE SALAKA BIBLIA YINA BO KE KOTISAKA NDINGA​—KITINI NA YO MPI BENO PESA MVUTU NA NGIUFULA YAI:

Inki ke sepedisa nge na yina me tala mutindu bo ke salaka Biblia yina bo me kotisaka ndinga?