Beto kele ti bavideo iya ya kulonguka yina beto lenda sadila na kisalu ya kulonga nsangu ya mbote. Sambu na nki bo basisaka yo?

• Sambu na Nki Beto Fwete Longuka Biblia?​—Video ya Nda: Bo basisaka yo sambu na kusadisa bantu ya mabundu yonso na kusepela ti Biblia. Yo ke siamisaka bantu yina ke tala yo na kusosa na Biblia bamvutu na bangiufula ya mfunu ya me tala luzingu mpi yo ke pesaka bamvutu ya me fwana mpi ya pwelele. Yo ke tendulaka mutindu muntu lenda lomba nde bo longuka ti yandi Biblia.

• Sambu na Nki Beto Fwete Longuka Biblia? (video ya nkufi): Yo kele kiteso mosi ti video na yo ya nda kansi yo, yo kele nkufi kibeni. Bantu lenda sepela ti yo mingi na bisika yina bantu ke vandaka ve ti ntangu mingi ya kusolula ti bantu.

• Inki Mutindu Kulonguka ya Biblia Ke Salamaka? : Bo basisaka yo sambu na kusadisa bantu na kusepela ti manaka na beto ya kulonguka ti bantu Biblia ya ofele mpi yo ke pesaka bamvutu na bangiufula yina bantu lenda kudiyula sambu na kulonguka ya Biblia mpi mutindu muntu lenda lomba nde bo longuka Biblia ti yandi.

• Mutindu Kulonguka ya Biblia Ta Salamaka: Bo basisaka yo sambu na kusonga balongoki ya Biblia. Ata video yango kele na lutiti ya zole ya mukanda Zinga Mvula na Mvula! beto lenda tala yo mpi ntangu beto ke longuka ti bantu kamukanda Zinga Mvula na Mvula! Video yango ke tubila mambu yina kele na mukanda Zinga Mvula na Mvula! mpi mambu yina longoki ta mona ntangu bo ta longukaka.

Ata bo basisaka bavideo yina sambu na kikuma mosi ya siki-siki, beto lenda songa yo bantu to kutindila bantu kana beto me mona nde yo kele mfunu na kusala yo. Bansamuni fwete zaba bavideo yina mbote-mbote mpi kusadila yo mbote na kisalu ya kulonga nsangu ya mbote.