Bo basisaka kamukanda Widikila Nzambi sambu na kulonga malongi ya mfunu ya Biblia na bantu yina ke kukaka ve kutanga. Konso dilongi kele na balutiti zole; yo kele ti bifwanisu ya kitoko mpi bo me tulaka mwa bidimbu bonso tolo-tolo sambu na kutadila kifwanisu yina ke landa.

Kamukanda Widikila Nzambi mpi Zinga Mvula na Mvula kele ti bifwanisu ya kiteso mosi ti kamukanda Widikila Nzambi, kansi kamukanda Widikila Nzambi mpi Zinga Mvula na Mvula kele ti mambu mingi mpi beto lenda longuka yo ti bantu yina ke tangaka mwa mbote. Bansamuni ke zolaka kusadila yo mpi balongoki ke sadilaka Widikila Nzambi. Balutiti mingi kele ti lupangu yina kele ti malongi ya nkaka ya beno lenda longuka, na kutadila mayele ya longoki.

Nge lenda kabula tumikanda yai konso ngonda, ata yo kele ve ngonda ya kukabula yo. Ntangu nge ke longuka Biblia ti muntu, sadila bifwanisu sambu na kutendula masolo ya Biblia. Yula bangiufula sambu na kutubisa longoki mpi kuzaba kana yandi ke bakisa. Beno tanga mpi beno tadila baverse yina kele na nsi ya balutiti. Kana beno me manisa kamukanda yai, beno kota na mukanda Inki Biblia Kelongaka Mpenza? to Inki Biblia Ke Longa Beto? sambu longoki kuyela mpi kubaka mbotika.