MFUNU NA YO: Mukanda ya 1 Bakorinto kele na kati ya mikanda 14 yina ntumwa Polo sonikaka sambu na kupesa bampangi kikesa. Kana muntu me sonika mukanda mpi me pona bangogo ya mbote, muntu yina yandi me sonikila ta tanga yo mbala na mbala. Kusonika mikanda kele mutindu ya mbote ya kuta kimbangi na bampangi to na banduku na beto. Yo ke sadisaka mpi na kuta kimbangi na bantu yina beto ke kutanaka ti bo na mpasi. Mu mbandu, muntu lenda sepela ti nsangu kansi yo kele mpasi na kukuta yandi na nzo. Diaka, yo lenda vanda mpasi na kukutana ti bantu ya nkaka yina ke zingaka na banzo ya nene yina ke vandaka ti lutaninu ya ngolo, na bakartie yina balupangu ke vandaka ti bakielo ya kutanina mbote-mbote to na bisika ya kingenga. Inki mambu ya nkaka nge fwete vila ve mingi-mingi ntangu nge ke sonikila muntu yina nge me kutanaka ntete ve ti yandi?

MUTINDU YA KUSALA YO:

• Sonika mambu yina nge zolaka kusonga yandi kana nge kutanaka ti yandi. Sonika zina mpi adresi na nge na luyantiku ya mukanda mpi kikuma yina nge ke sonikila yandi. Nge lenda yula yandi ngiufula yina ta pusa yandi na kuyindula mpi songa yandi na kukota na site Internet na beto. Na nima, tendudila yandi mutindu beto ke longukaka Biblia ti bantu na banzo na bo mpi sonikila yandi mwa bantu-diambu ya bakapu ya mukanda mosi yina ke sadisaka beto na kulonguka ti bantu. Nge lenda tula mpi karti ya viziti ya JW.ORG, emvitasio mosi to trakiti na kati ya mukanda yina

• Kutuba ve mambu mingi. Mukanda na nge fwete vanda ve nda kana ve muntu yina nge ke tindila ta tanga yo ve yonso.—Tala mbandu ya mukanda

• Tanga yo mbote-mbote sambu na kuyidika bifu. Sosa kuzaba kana bangindu kele na ndonga mpi kana yo kele ve mpasi na kutanga. Zikisa nde yo kele ti bangogo ya mawete mpi ya mbote