Paki ya nsuka yina Yezu salaka vandaka mfunu mingi. Sambu yo bikalaka fioti nde yandi kufwa, yandi yidikaka mambu sambu na kudia Paki ti balongoki na yandi mpi yandi yantikisaka nkinsi ya mpa yina bo fwete salaka konso mvula disongidila, Madia ya Nkokila ya Mfumu. Yo yina yandi tindaka Piere ti Yoane na kuyidika kisika ya kusala yo. (Luk 22:7-13; tala kifwanisu ya lutiti ya zulu.) Yo ke yibusa beto nde yo kele mfunu nde beto kudibongisa sambu na Nkinsi ya Kuyibuka Lufwa ya Yezu na Marsi 27. Ntembe kele ve nde mabundu me yidika mambu na yina me tala mutubi, mampa ti vinu mpi buna na buna. Kansi, inki konso muntu na kati na beto lenda sala na kuyilama sambu na nkinsi yai?

Yidika ntima na nge: Tanga baverse ya Biblia ya Nkinsi ya Kuyibuka Lufwa ya Yezu mpi yindulula yo mingi. Nge lenda sadila manaka yina kele na kamukanda Beto Fimpa Masonuku Konso Kilumbu. Bangindu ya Ngika B12 ya Biblia—Mbalula ya Nsi-Ntoto ya Mpa yina bo me tomisa kele ti manaka yina ke tendula mambu mingi. (Tala mpi Mukanda ya Lukutakanu Luzingu mpi Kisalu ya Aprili 2020) Mabuta lenda baka malongi ya kutadila na lusambu ya dibuta yina ke monisa nde kimenga ya Yezu kele mfunu na Index des publications des Témoins de Jéhovah to na Mukanda ya Bansosa Sambu na Bambangi ya Yehowa.

Lomba bantu ya nkaka na kukwisa: Kabula emvitasio na bantu mingi. Yindula bantu yina nge lenda bingisa mu mbandu, bantu yina nge ke vutukilaka, bantu yina nge longukaka ti bo Biblia ntama, bantu yina nge me zabana ti bo mpi bantu ya dibuta na beno. Bankuluntu fwete bingisa bantu yina me lembaka na kimpeve. Kuvila ve nde kana muntu mosi ke zingaka ve na kartie na beno, nge lenda sosa ntangu mpi kisika yina Nkinsi ya Kuyibuka Lufwa ya Yezu ta salama na kartie na bo. Sambu na kumona yo, kota na lutiti ya luyantiku ya jw.org mpi bweta kisika bo me sonika MAMBU YA ME TALA BETO, na nima bweta na kisika bo me sonika “Lusungiminu.”

Beto lenda sala diaka nki sambu na kudibongisa?