Kubika fioti ntima ya nda ya Yehowa ke monisa sambu na ntoto yai ta mana. Dibundu ya luvunu ta fwa, kimvuka ya makanda ta nwanisa bansadi ya Nzambi mpi Yehowa ta fwa bantu ya mbi na Armagedoni. Bakristu ke vingila ti nzala ya ngolo kumona mambu yai ya mfunu.

Ya kieleka, beto me zaba ve mambu yonso ya fioti-fioti na yina me tala mpasi ya nene. Mu mbandu, beto me zaba ve inki ntangu kibeni yo ta yantika. Beto me zaba ve inki bikuma bantu ya politiki ta pesa sambu na kumonisa nde yo me fwana nde bo nwanisa dibundu. Beto me zaba ve bantangu ikwa bitumba yina makanda ta nwanisa bansadi ya Nzambi ta sala mpi kana yo ta vanda inki mutindu. Beto me zaba mpi ve bametode ya siki-siki yina Yehowa ta sadila sambu na kufwa bantu ya mbi na Armagedoni.

Ata mpidina, Biblia ke songa beto mambu yonso yina yo ke lomba nde beto zaba, sambu beto tula ntima mpi beto vanda kikesa sambu na mambu yina ta salama na bilumbu ya ke kwisa. Mu mbandu, beto me zaba nde beto ke zinga na nsuka ya “bilumbu ya nsuka.” (2Tm 3:1) Beto me zaba nde bitumba ya bo ta nwanisa mabundu ta vanda “nkufi” sambu dibundu ya kieleka kufwa ve. (Mat 24:22) Beto me zaba nde Yehowa ta gulusa bantu na yandi. (2Pi 2:9) Beto me zaba mpi nde Muntu yina Yehowa me pona sambu na kufwa bantu ya mbi mpi kutanina kibuka ya nene na Armagedoni kele muntu ya lunungu mpi ya ngolo.—Kus 19:11, 15, 16.

Ntembe kele ve nde mambu ya ta salama na bilumbu ke kwisa ta sala nde bantu ‘kubwa ngambu sambu na boma.’ Kansi kana beto ke tanga mpi ke yindula na mudindu mutindu Yehowa gulusaka bansadi na yandi na ntangu ya ntama mpi beto ke yindula na mudindu mambu yina yandi me tubaka sambu na bilumbu ke kwisa, beto ta ‘telama ya kusungama mpi ta tedimisa ba-ntu na beto,’ ti kivuvu nde luguluku na beto me kuma pene-pene.—Luk 21:26, 28.