Bantangu ya nkaka beto ke monaka bonso nde mambu yonso ya beto ke salaka sambu na bantu ya nkaka, bo ke bakaka yo ve na valere to bo ke vilaka yo nswalu. Inki beto lenda tuba sambu na kisalu ya beto ke sadilaka Yehowa? Nzambi na beto ke bakaka kisalu na beto na valere mpi yandi ke vilaka ve ata fioti bikesa ya beto ke salaka na ntima ya mvimba sambu na kusadila yandi. Ata beto ke kuka diaka ve kusadila yandi mutindu beto vandaka kusadila yandi ntete sambu beto me bela, yandi ta yambula beto ve.—Ebr 6:10.

TALA VIDEO YEHOWA KE YIBUKAKA, MPI NA NIMA BENO PESA BAMVUTU NA BANGIUFULA YAI:

• Inki mutindu Mpangi Hibshman sadilaka Yehowa ngolo na mabaku mingi na kisalu na yandi?

• Inki mutindu Yehowa monisaka nde yandi yibukaka Mpangi Hibshman na nima ya lufwa ya nkento na yandi mpi ntangu yandi kumaka mbuta mpi lendaka diaka ve kusala mambu yina yandi vandaka kusala ntete?

• Sambu na nki beto lenda tuba nde luzingu ya Mpangi Hibshman na kisalu ya ntangu yonso natilaka yandi balusakumunu?—Bin 10:22